بھارتی تامر ءِ شوکین سال 2026 ءَ جاسوسی تھرلر ءُ درساں گیش کمائی کنوکیں ھندی تامر دھریندر ءِ سنسر بوتگیں ورژن ءَ چار انت ، پرچاکہ تامر ءِ تہ ءَ لھتے ردیں گپ بدل کنگ بوتگ انت ۔
بھارتی رسانکدرانی رد ءَ تامر ءِ تہ ءِ لھتے ھنچیں گپ بوتگ انت کہ پہ بلوچ راج ءِ دلچلی بوت انت کہ بازیں نہ منگ ءَ پد یک مکالمہ ءِ مٹ کنگ بوتگ ءُ دو لپز کہ آیانی تہ ءَ لپز ءِ بلوچ ھوار بوتگ ھاموش کنگ بوتگ انت ۔
تامر ءِ شنگ بوگ ءَ پد گجرات ءِ شھر جوناگڑھ ءَ مکرانی بلوچ برادری ءَ زھرشانی کتگ ۔ ھمے ڈائیلاک گشوک سنجے دت بوتگ ، کہ آ گش ایت مگر مچھ ءِ سرا اوست دارگ بیت بلے بلوچ ءِ سرا ناں ۔
جوناگڑھ ءِ بلوچ مکرانی سوسائٹی ءِ سرکماش ءُ وکیل اجاز مکرانی ءَ پولیس ءِ گور ءَ ارزی داتگ ءُ اداکار ، ڈائیلاک گشوک ءُ ہدایت کار ءِ بگیری ءَ کانودی کاروائی کنگ ءِ لوٹ کتگ ۔ اشی ءَ ابید نبیل بلوچ ءَ ھم ہدایت کار آدیتہ دھر ءُ سنجے دت ءَ نوٹس دیم داتگ ءُ ھمے گوشتگ پھلی بہ لوٹ ایت ءُ تامر ءِ ردیں گپانی بدل کنگ ءِ لوٹ کتگ ۔
گوستگیں ھپتگ گجرات ہائی کورٹ ءَ پیشی ءِ میان جسٹس اے پی مائی ءَ ارزی دیوک چہ استفسار کتگ کہ اے ڈائیلاک کجام وڈا بلوچ مکرانی برادری ءِ بدنامی ءِ سوب جوڈ بوتگ ۔
بھارتی رسانکدر ءِ رد ءَ دھریندر تامر ءِ رد ءُ بدل کتگیں ورژن سینما گساں دیگ بوتگ ءُ سرجمیں ڈیھ ءِ سنیما گساں نوکیں ڈی سی پی دیگ بوتگ انت ۔
درسیں جیڑواں ابید تامر گوں سوبمندی ءَ دیم ءَ روان انت بس 29 روچانی تہ ءَ تامر ءَ کساس 7.4 ارب بھارتی کلدار کمائی کتگ ءُ باکس آفس ریکارڈ پروشتگ ۔