کیچ : زالبولانی زورانسری آوار جنی ءِ ھلاپ ءَ زھرشانی دومی روچ ءَ برجاہ

کیچ، تجابان ءَ زالبولاں ھوار زورانسری آوار بیگواھیں مردمانی یل کنائینگ ءِ ھاتر ءَ سی پیک شھدگ بند، زھرشانی دومی روچ ءَ پُترتگ-

تربت ءِ دمگ تجابان ءَ چار زورانسری بیگواھیں مردمانی کھول ءَ انتزامیہ ءِ نیمگ ءَ چہ مھاد ءِ ھلاپ ورزی ءِ ھلاپ ءَ یکرندے پد ءَ سی پیک شھدگ بند کنگ بیتگ- زھرشانی دومی روچ ءَ ھم برجاہ اود ءَ تُرندیں سارتی ءَ اَبید زالبول ءُ چُک شپ ءِ تھاری ءَ دگ سر ءَ ساڑی اَنت-

زھرشانی کنوکانی گوشگ اِنت کہ دمگی انتزامیہ گوستگیں ھپتگ ءَ بیتگیں گپ دیوان ءَ بیگواھیں مردم ھاسکار زالبول ءِ یل کنائینگ ءِ دلجمی دیگ بیتگ چریشی ءَ پد نندانک ھلاس کتگ بلے کول سرجم نہ کنگ ءِ سوب ءَ دوبر زھرشانی بندات کتگ-

زھرشانی کنوکانی رِد ءَ یکیں کھول چار مردم تنی وھدے بیگواہ اَنت آیانی تہ ءَ دو زالبول ھوار اَنت وھدے کہ اشانی تہ ءَ یک لاپ پُریں نُھ ماھی زالبولے ھم ھوار اِنت- زھرشانی کنوکانی گوشگ اِنت کہ کھول ءِ یل نہ کنگ یک تُرسے ودی بیتگ-

دومی نیمگ ءَ زھرشانی کنوکانی گوشگ اِنت کہ لشکر ءَ تجابان ءَ چہ سیادی داروکیں دو زالبول ءَ ھوار چار مردم چہ ھب چوکی ءَ آوار جتگ ءُ ناشناسیں جاھے ءَ برتگ اَنت- زھرشانی کنوکانی رِد ءَ اے مردمانی سر ءَ وتکش تراک اُرش ءِ شوربندی ءِ بھتام سوشل میڈیا ءَ شنگ اِنت کہ آیاں کھول ءُ زھرشانی کنوک رد کن اَنت-

زھرشانی کنوکانی گوشگ اِنت کہ یک نیمگے جھان نوکیں سال ءِ مراگشاں دلگوش اَنت وھدے کہ دومی نیمگ ءَ بلوچستان ءَ زالبول ءُ چُک وتی دوستناکانی یل کنائینگ ءِ ھاتر ءَ تُرندیں سارتی ءِ سر ءَ دگانی سر ءَ زھرشانی ءَ لاچار اَنت-

تنی وھدے دمگی انتزامیہ یا پوجی ادارھانی نیمگ ءَ چہ اے جیڑہ سر ءَ ھچ وڑیں درشان دیم ءَ نیتکگ-

زانگ بہ بیت اے اولی رند نہ اِنت اے کھول ءِ مردماں زھرشانی کتگ – شش روچ ءَ ساری ھم کرکی تجابان ءَ نندانک داتگ، کہ دمگی انتزامیہ ءِ گوم ءَ گپ دیوان ءَ پد مھتل داشتگ- بلے کھول ءِ گوشگ اِنت کہ کولاں ابید بیگواھیں مردمانی درگت ءَ ھچ وڑیں گامگیج نہ زیرگ ءَ آ دوبر زھرشانی کنگ ءَ لاچار بیتگ اَنت-

بلوچستان ءَ زورانسری آوار جنی ءِ جیڑہ یک بلاھیں مدتے ءَ چہ ھساس بیتگ، ءُ انسانی ھکانی گل مدام اشی ءِ سر ءَ دلپردی درشان کنگ ءُ آیگ ءَ اَنت-

سی پیک شھدگ ءِ بندی سوب ءَ ناں تھنا دمگی آبادی بلکیں دری سپر کنوکیں مساپر ھم سک اسرمند اَنت، وھدے کہ زھرشانی کنوکاں گوشتگ دانکہ آیانی لوٹ منّگ نہ بیت اَنت، زھرشانی برجاہ بیت-