کتاب ءِ ارزشت
نبشتہ کار: ھانی بلوچ
دی بلوچستان پوسٹ
کتاب بنی آدم ءِ راجدپتر ءِ مستریں ایجاد اِنت. اے زانت ءُ زانشت ءِ ھزانگ گُشگ بیت۔ وھدیکہ بنی آدم ءَ وانگ ءُ نبشتہ کنگ بندات کُت گڑا آئی ءَ سوبمندی ءِ اولی گام ایر کُت۔
کتاب ءَ بنی آدم تھاری ءَ چہ در کُت ءُ رژن ءُ رژنائی بکشات۔کتاب یک انچیں بے تواریں رھشونے کہ مئے سوج ءُ سَر کنگ ءَ ھچ دَم نہ بارت، اے بنی آدم ءِ مجگ ءَ شاھگان کنت آئی ءِ جیڑگ ءُ پکر کنگ ءِ تاگت ءَ مزن کنت.
کتاب وانگ ءَ چہ زانت گیش بیت۔ ایشی ءَ ابید زُبان ھم زگر بیت ۔یک کتاب وانوکے شوکیں انسانے جوڑ بیت. پرچا کہ کتاب انسان ءِ توک ءَ سبر ءُ اوپار، سوچ ءُ پکر کنگ ءِ آدت ءَ مان کنت-
نودربرے ءِ زند ءِ توک ءَ کتاب ءِ ارزشت سک باز اِنت، کتاب نودربرے ءِ سنگت ءُ سوبین بوگ ءِ سوب جوڑ بیت۔ اے آئی ءَ جھد ءِ ارزشت ءَ سوج دنت، ۔زند ءِ ھمُک پِڑ ءِ بابت ءَ سرپدی دنت۔ ءُ وھد ءِ ارزشت ءَ سوج دنت۔ چکاس ءِ سوبمندی بہ بیت یا زندمان ءِ یا دگہ پِڑ بہ بنت، کتاب ھمُک وھد ءَ ھمرھداری کنت۔
کتاب چاگرد ءِ دیمروی ءِ توک ءَ مزنیں کردے پیلو کنت۔ھما راج کہ گوں کتاباں نزیکی کن اَنت ،گوں الم ءُ زانت ءَ بندوک بنت آ زانت ءُ پولکاری ءِ توک ءَ دیم ءَ رو اَنت۔
راجدپتر شاھِد اِنت کہ آجو بوتگیں یا دیمروی کتگیں راجاں دائم کتاب ءَ را ازت بکشاتگ۔کتاب سوچ ءَ مزن کَنت ۔ بنی آدم ءِ مجگ ءَ شاھگان کنت ۔
شرّی ءُ ھرابی ءِ میان ءَ تپاوت سوج کَنت۔ مرچیگیں دور ءَ اگاں ٹیکنالوجی ءَ دیمروی کُتگ بلے انگت کتاب ءِ ارزشت ھلاس نہ بوتگ۔
ڈیجیٹل شکل ءَ بہ بیت یا کاگد ءِ سر ءَ کتاب مرچی ھم سوبمندی ءِ وسیلہ اِنت۔ کتاب وانگ المّی اِنت باید اِنت ما کتاب بہ وانیں ءُ وتی راج ءُ زُبان ءِ پھازوک جوڑ بِہ بَہ ایں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-