نمدی یے مھروانیں رھشون ڈاکٹر مھرنگ ءِ نام ءَ
نبشتہ کار : فوزیہ بلوچ شاشانی
دی بلوچستان پوسٹ
دروت ءُ دراھبات ئے منی مھروان!
اُمیت کن آں کہ تو وش ءُ سلامت بہ ئے ءُ اے وھد ءَ ھم بندیگ جاہ ءِ تنک ءُ تھاریں کوٹیاں پہ راج ءَ چیزے جیڑگ ءَ بہ ئے۔ اے ساھت ءَ کہ من اے نمدی ءَ پہ تو نبشتہ کنگ ءَ آں، شپ ءِ یک بج اِنت۔ دسمبر ءِ برپ بادینتگیں سارتی گیش بوان اِنت ءُ بازیں مردم واب ءِ ملاران اَنت بلے منی چمّانی واب چو بلوچ ماتانی زھگ ءَ گار ءُ بیگواہ اِنت۔ من ءَ تئی اے گپ ھم یات اِنت کہ تو گُشتگ اَت “شُمارا مھلہ وپسگی اِنت ءُ مھلہ پاد آیگی اِنت، وتی وانگ ءُ گَلی کار کنگی اَنت، بلے چے بہ کنت مردم واب آیگ ءَ نہ اِنت دو رند ءَ جُھد کُتگ کہ واب بہ کپاں بلے واب شُتگ گار اِنت۔
مھروانیں رھشون! مروچی پہ ترا گیش زھیر بوگ ءَ اِنت۔، چو نہ اِنت کہ پیسر ءَ پہ ترا زھیر نہ بوتگ یا تئی یات ءَ نہ کپتگ آں۔ من ھر روچ تئی زھیرانی شاگ ءَ چیک وراں، چو بُگش کہ ھر روچ تئی زھیر گیش بوان اَنت۔ بلے بیا کہ مروچی واب نہ کپگ ءِ دگہ سوبے ھم ھست اِنت۔ من زاناں کہ تو سرپد ئے بلے انگت ترا ھال دیگ لوٹ آں کہ بلوچ ءِ زھگ ءُ زالبولانی گار ءُ بیگواھی ءِ توک ءَ تیزی آرگ بوتگ۔ تھنا چہ ھب چوکی ءَ چار زالبول گوں یک دو سالی زھگے ءَ بیگواہ کنگ بوتگ اَنت۔ اِیشانی تہ ءَ یکے نسرین بلوچ اِنت کہ آ 15 سال ءِ جنکے، آئی ءَ ماھے ءَ چہ گیش اِنت کہ گار ءُ بیگواہ اِنت۔ آئی ءِ لوگ والا ھر روچ ھال کن اَنت کہ شُما چے گُش اِت ما چے بہ کن اِیں؟ ما کئی در ءَ بہ ٹُکیں کہ مئے جنک آجو کنگ بہ بیت۔ ما سکیں بزگیں مردم ایں۔ ما ھچ نہ زان اِیں، مارا مردماں رد داتگ ءُ زر گپتگ کہ شُما ھچ مہ گُش اِت ما شمے زھگ ءَ کار اِیں، بلے مارا رد داتگ اِش مئے زھگ انگت گار اِنت۔
پد ءَ ھانی ءُ ھیرالنساہ ، ھانی ھشت ماہ ءِ لاپ پُری (pregnant) زالبولے چہ وتی چُکانی دیم ءَ برگ بیت ءُ ھیرالنساہ 17 سال ءِ جنکے۔ ءُ دگہ بازیں جیڑہ کہ دیم ءَ کپ اَنت مردم ءَ پہ جیڑگ ءَ لاچار کن اَنت واب ءُ کراراں اَچ ما پُل اَنت ءُ دُور بر اَنت۔
منی رھشون! نوں بیا کہ من ءَ گوں تو دیوانے کنگی اَت بلے تو زان ئے من گپ ءَ بندات کن آں پد ءَ بے ھیال باں کہ کُجام سرھال ءِ سر ءَ گپ ءَ بوتگ اَنت۔ ککککککک منی مھروانیں رَھشون تئی ساڑی نہ بوگ ءِ کمی ھر وھد ءَ مارا مُلور کنت پد ءَ راج۔
راج ءِ گپ کنگ نہ بیت ھرچ یک مردمے کہ من دیستگ یا کہ من ءَ پون ئِے کُتگ جوڑ ءُ وشی ءَ رَند اولی تئی جُست ئِے کُتگ کہ ڈاکٹر ماھرنگ چون اِنت ؟ تبیت ئِے چون اِنت ؟ باریں کدی در کیت؟ منی پسو مُدام بس ھمے بوتگ کہ ڈاکٹر وش اِنت سلامت اِنت در آیگ ءِ زانگ نہ بیت شُما درست زان اِت کہ ڈاکٹر ءِ سر ءَ ھچ کیس نیست بس اے ریاست مارا شُمارا نزور کنگ ءِ ھاتر ءَ ڈاکٹر ءَ یل نہ کنت، بلے شُما زان اِت کہ ڈاکٹر نزور نہ بیت دژمن ءِ دیم ءَ کدی ھم سر ءَ جھل نہ کنت ، درستانی گپ ھمے بوتگ کہ انشاللہ مئے دوا گون اَنت ڈاکٹر الم کیت پہ سلامتی اے وھد مئے بلوچ راج ءِ سر ءَ یک چکاسے ءُ مئے رھشون ڈاکٹر ماھرنگ اِنت ما الم اے چکاس ءَ سوبمند بیں اے دژمن یک روچے چک پروش بنت۔
ڈاکٹر جان! من ءَ ھما روچ انگت یات اِنت ءُ کدی ھم بے ھال کنگ نہ بیت کہ مارچ ءِ وھد اَت کہ ما درامدیں دیار اسلام آباد ءِ سارتی ءِ پُروش دیگ ءِ ھاتر ءَ آس ءِ سر ءَ نشتگ اِتیں۔ آ ساھت شپ ءِ 12:45 ءِ وھد اَت کہ سنگتے ءَ چہ ھمد ءَ گُشت کہ باندا 2024 ءِ اولی روچ اِنت بزاں کہ 1 جنوری اِنت ڈاکٹر ءِ ودی بوگ ءِ روچ اِنت، آس ءِ چپ ءُ چاگرد ءَ نشتگ اِت اِیں دو سے سنگت ءَ ترا چار اِت تو شوکیں بچکندے وتی لُنٹانی باھوٹ کُت ءُ پد ءَ وتی سر جھل کُت۔ آ وھد ءَ من گوں تو انچو باز نزدیک نہ اِتاں بلے بس دل ءَ ھمے گپ اتک کہ ما سکیں وش بھتیں مردم این ءُ جنوری ءِ ماہ ھم سکیں وشیں ماھے کہ اے ماہ ءَ ماھرنگ ودی بوتگ۔
آ شپ ءَ سنگتانی دل ءَ باز ھست اَت کہ ما پہ تئی ودی بوگ ءِ روچ ءِ ھاتر ءَ چیزے بہ کن اِیں بلے تو کہ یک زندے نہ کُت گُڑا گپ دیم ءَ شُت نہ کنت۔ تو زان ئے ، آ وھد چینچو گران ءُ چینچو نہ وشیں روچے اَت اَنت۔ بزگی اَت، ازابی اَت، اسلام آباد ءِ برپ بادینتگیں سارتی اَت، درامدیں مردم اِت اَنت، درامدیں زمینے اَت، در پہ دری اَت، بلے یک چیزے وش اَت، آ اِیش اَت کہ ما گوں تو ھمراہ اِتیں، گوں راج ءَ ھور جُھد کنگ ءَ اِتیں۔
بلے اے سال۔ اے سال ءَ تو پہ راج ءَ جُھد کنگ ءَ ئے زندانی ئے، گوں چاریں سنگتاں رَنج ءُ ازاب سگگ ءَ ئے ، بلے ما لوگ ءَ نشتگ ءُ جیڑگانی بوجیگ ءَ سواریں، پہ شمے آجوئی ءِ ھاتر ءَ نزانیں کُجام توجیل ءَ بہ سازیں۔
منی رھشون! منی ھیال ءَ تئی بوتن ءِ روچ ءَ پہ تو شرتریں سوگاتاں چہ یک سوگاتے اِیش اِنت کہ تئی ھما گچین کُتگیں کِشک اِنت ھمائی ءِ سر ءَ گوں پگر ءُ لیکہ ءَ جُنزگ۔ بلوچ راج ءِ ھما بُنکی ھک اِنت آیانی پچگرگ ءِ ھاتر ءَ گھگیری کنگ، تئی داتگیں پنت ءُ سکینانی سر ءَ اَمل کنگ پہ تئی بوتن ءَ یک جوانیں سوگاتے بیت کن اَنت۔ من ءَ اُمیت اِنت بلوچ راج تئی ڈس اِتگیں کِشک ءِ مُساپر بیت ءُ گھگیری ءِ کندیلاں بال اِیت۔
مارا بلوچ راج ءَ را تئی ودی بوگ ءِ روچ مراد بات منی مھروان ، ما سکیں وش بھتیں راج ایں کہ مارا تئی وڑیں رھشون ھست ، مئے راجی رھشون ھست ءُ سلامت بات ئے زوت واتر کنات ئے کہ راج ءَ تئی زلورت اِنت۔ وشیانی منگیراں بات ئے ءُ آجوئی ءِ مُراداں بات ئے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-