سندھ سرکار ءَ ٹاہ داتگ کہ ما وتکش تراک کنگ ءِ شوربندی ءَ ھواریں جنک ءِ دزگیر کتگ ۔ سندھ پولیس ءَ کسانسالیں جنک ءِ گپتگ ءُ ھمے بھتام جتگ کہ آ چاگردی ترامجاھاں چہ بلوچ لبریشن آرمی ءِ باسکاں گوں ھال کنگ ءَ بوتگ ءُ وتکش تراک کنگ ءِ تیاری ءَ کنگ ءَ بوتگ ۔
گوستگیں روچ ءَ سندھ پولیس ءُ سوبائی وزیر داکلہ ضیاءُالحسن ءَ اھوالکاراں گوں تران کنان ءَ بلوچ زالبولے ءِ دزگیر کنگ ءِ ٹاپار جتگ ۔
سندھ ءِ وزیر ضیاءُالحسن ءَ گوشتگ کہ دزگیر کنگ بوتگیں جنک ءِ بگیری ءَ پلھال کتکاری ءِ جرم جنگ نہ بیت ءُ بلکیں آ ریاست ءِ پھریز ءَ دارگ بیت ۔
آئی ءَ گوشتگ کہ زالبول ءِ سرا جرم نہ جنگ ءِ سوب ھمیش انت کہ گندگ ءَ آ انچوکیں کتکارے نہ بوتگ بلکیں آجوئی لوٹوکانی گوشگ ءَ سانمند بوتگ ۔
آئی ءَ گوشتگ کہ اے جنک ھما وھد ءَ دزگیر کنگ بوتگ کہ پولیس چہ بلوچستان ءَ کراچی ءَ سپر کنوکانی پٹ ءُ پول ءَ بوتگ ۔ ءُ اے وتی دگہ کمکارے ءِ دچار کپگ ءَ رؤگ ءَ بوتگ ۔
سندھ سرکار ءَ اے وتکش کنوک ءُ آئی ءِ مات ھم میڈیائے دیم ءَ آؤرتگ انت بلے پدا ھم آیانی دیم چیر دیگ بوتگ ءُ آیانی نام ھم زاھر کنگ نہ بوتگ ۔
زانگ بہ بیت گوست ءَ سندھ سرکار ءَ کراچی بالی پٹ ءِ نزیک ءَ چینی کاروان ءِ سرا ارش ءَ ھواریں یک زالبولیں کمکارے ءِ دزگیر کنگ ءِ ٹاہ ھم داتگ ات ، بلے آئی ءِ درگت ءَ ھم رسانکدراں باوری سرپدی ھم دیگ نہ بوتگ ات ۔
چدوپیسر چہ شال ءَ پی پی سرکار ءِ سروزیر سرپراز بگٹی ءَ ھم میڈیائے دیم ءَ زالبولیں جنین ءِ آورتگ ءُ آئی ءِ وتکش بمبار ءِ بھتام جتگ ات ۔ ھمے وڈ ماھل نامیں جنکے ھم سی ٹی ڈی ءَ نیمگ ءَ میڈیائے دیم ءَ آرگ بوتگ انت بلے پدا آمیدگس ءَ آ یل کتگ ات.
ھمے زیتاں بلوچستان ءِ جتا جتائیں ھند ءُ دمگاں ھوار ھاسکر ھب چوکی ءَ کاؤنٹر ٹررازم ڈیپارٹمنٹ ءُ ایندگہ پاکستانی پوج ءُ چیریں ادارھانئ کارمنداں بلوچ زالبول دزگیر کتگ ءُ پدا رند ءَ بیگواہ کتگ انت ۔
بلوچستان ءَ ھستیں وھد ءَ بلوچ زالبولانی زورانسری آوارجنی ءِ درچ ءِ بگیری ءَ گوستگیں روچ ءَ بلوچ یکجھتی کمیٹی ءِ نیمگ ءَ پنچ روچی زھرشانی مھم ءِ چلائینگ بوتگ ، وھدیکہ پاکستان ہیومن رائٹس کمیشن ءَ ھوار ایندگہ انسانی ھکانی ادارھاں زالبولانی زورانسری آوار جنی ترندی ءَ گوں ایرجتگ ۔