بلوچستان ءِ دمگ پنجگور ءَ پاکستانی لشکر ءِ نیمگ ءَ کتگیں آپریشن ءَ پد یک مردمے بیگواہ کنگ بوتگ ۔
دمگی مردمانی رد ءَ اے وئیل پنجگور ءِ دمگ گوارگو فتح علی ءَ بوتگ کہ گوستگیں روچ ءَ پاکستانی لشکر ءَ دمگ ءَ اُرش کتگ ءُ لوگ پہ لوگ پٹ ءُ پول بندات کتگ۔ دمگی مردمانی گْوشگ اِنت کہ ھمے وھد ءَ بازیں لوگاں چہ ارزشت داریں چیز ءُ موٹر سائیکل ھم برتگ اَنت۔
دمگی مردمانی گشگ ءِ رد ءَ آپریشن ءِ وھد ءَ یک مردمے دزگیر کنگ بوتگ کہ ایشی ءَ پد آ بیگواہ اِنت۔ بیگواھیں مردم ءِ پجار نعمت اللہ ء بادل ءِ نام ءَ بوتگ ۔
کھول ءِ مردمانی گشگ اِنت کہ نعمت اللہ لشکر ءَ برتگ بلے چہ ایشی ءَ پد آئی ءِ بابت ءَ ھچ وڑیں ھال ءُ اھوال دیگ نہ بوتگ انت ءُ نہ کہ آئی ءِ ھچ وڑیں بندی جاہ پدر کنگ بوتگ ۔
بلوچستان ءَ زورانسری بیگواہ کنگ ءِ جیڑہ بازیں وھدے ءَ باوستانی تہ ءَ اِنت ءُ انسانی ھکانی گلاں باز رند ءَ اے وڑیں وئیلانی سر ءَ دلپدردی درشان کتگ۔ آماچیں کھول لوٹ کنگ ءَ اَنت کہ بیگواھیں مردم انساپ ءِ دیم ءَ آرگ بہ بنت یا آیانی بابت ءَ تچکیں ھال ءُ اھوال دیگ بہ بیت۔