بلوچ زالبولانی زورانسری آوار جنی ءِ ھلاپ ءَ مھم برجاہ

سرجمیں بلوچستان ءَ زَھری ، انسانی ھکانی سنگینیں ھلاپ ورزیانی سر ءَ دلپدردی درشان-

بلوچستان ءَ زالبولانی زورانسری آوار جنی ءِ ھلاپ ءَ بلوچ یکجھتی کمیٹی ءِ نیمگ ءَ چہ بندات بیتگیں پنچ روچی مھم یکشل ءَ برجاہ ءَ اِنت، چریشی ءِ میان ءَ جتاجتائیں پارٹیانی نیمگ ءَ تُرندی گم ءُ زھری ءُ دلپدردی درشان کنگ بیگ ءَ اِنت- انسانی ھکانی کارکنان، سانمندیں کھولاں، نودربر ءُ چاگردی گلانی گوشگ اِنت کہ زورانسری آوار جنی ءِ دْرچ نو بلوچ جنیناں چہ سر بیتگ ءُ یک تُرسناکیں ءُ ناکابلیں کبول اِنت-

زھرشانی کنوکانی رِد ءَ، زورانسری آوار جنی یک پردے نہ اِنت بلکیں سرجمیں کھول ءُ چاگرد ءَ مُچی سزا ءِ دوچار کنت – بلوچ جنیناں نشانگ کنگ ناں تھنا بُنیادی انسانی ھکانی سنگینیں ھلاپ ورزی اِنت بلکیں بلوچ چاگرد ءِ شرپ، پجّار ءُ مُچی ھستی ءِ سر ءَ اُرش کنگ ءِ زانگ بیت-

مھم ءِ میان ءَ شنگ بیتگیں تامُربندیں درشاناں گوشگ بیتگ کہ بلوچ جنین بے توار نہ بیتگ اَنت بلکیں آیاں گھگیری کتگ ءُ جُھد ءِ راہ گچین کتگ- ترانکاراں گوشتگ کہ زورانسری آوار جنیانی تواراں بے توار کُت نہ کن ئے نانکہ راستی ءَ مدام بندیگ کت کن ئے- انساپ ءِ توار ایرموش کنگ نہ بیت ءُ بلوچ جنین وتی ھکانی ھاتر ءَ اوشتاتگ اَنت-

نامی ئیں اِھوالکار منیزہ جھانگیر ءَ مھم ءِ درگت ءَ وتی درشان ءِ تہ ءَ گوشتگ ک زورانسری آوار جنی پاکستان ءَ یک سنگینیں جرمے ءُ اے کار ڈیھی کانود ءُ درانڈیھی انسانی ھکانی مُھادانی تچکی ءَ ھلاپ ورزی اِنت- آئی ءَ تچک کتگ گوشتگ اے وھد ءَ بلوچستان ءَ زالبولانی زورانسری آوار جنی ءِ یک تُرسناکیں وڑے ءَ گیش بیتگ، آیانی تہ ءَ یک بیست ھپت سالی ئیں لاپ پُریں زالبول ءُ یک ھپدہ سالی ئیں جنکے ءِ کیس ھوار اِنت، کہ آیانی کھول تنی وھدے آیانی درگت ءَ سرپدی نیست-

آئی ءِ گوشگ اِنت کہ اے وڑیں وئیل سانمندیں کھولاں سک سسّائی ازیت ءَ دوچار کنت ءُ ریاستی ادارھانی درگت ءَ چہ راج ءِ تہ ءَ بے ستکی گیش بوان اِنت- آیاں زور داتگ کہ اگاں کسے ءِ سر ءَ بھتام ھست گُڑا ریاست ءِ گور ءَ آئینی ءُ کانودی راہ ھست، زورانسری آوار جنی ھچ وڑ جائز نہ اِنت-

مھم ءِ چارمی روچ ءِ درگت ءَ زھرشانی کنوکاں گوشتگ بلوچستان ءَ زورانسری آوار جنی نو دگاں چہ لوگاں سر بیتگ- نودربر، مات ءُ لاپُریں زالبولاں تاں نشانگ کنگ مچی سزا ءِ یک دروشمے – ترانکارانی رِد ءَ یک بلوچ زالبولے ءَ سانکلاں بندیگ کنگ ءَ گندگ یک ھیرانیں گپے نہ اِنت بلکیں ھمکروچے ھساب ءَ جوڑ بیگ ءَ اِنت-

زھرشانی کنوکاں لوٹ کتگ اے سرجمیں بیگواھیں بلوچ زالبولاں زوت ءُ پہ سلامتی یل کنگ بہ بنت، زورانسری آوار جنی ءِ دْرچ بند کنگ بہ بیت میان استمانی انسانی ھکانی گل اے سنگین ءِ جاورانی سر ءَ گامگیج بزور اِیت-

مھم ءَ ھوار مردماں میان استمانی اداراھاں، اکوام متھدہ ءُ انسانی ھکانی گلاں چہ دزبندی کتگ کہ آ بلوچستان ءَ بلوچ زالبولانی زورانسری آوار جنی ءِ سر ءَ دلگوش بدنت ءُ ریاست پاکستان ءَ چہ پسہ بہ لوٹ اِیت-