وائس فار بلوچ مسنگ پرسن ءِ رھشون ءُ بیگواھیں مردمانی ھاتر ءَ جد ءُ جھد کنوکیں ماما قدیر بلوچ بیران بوتگ۔
ماما قدیر ءِ بیرانی ءِ گپ وائس پار بلوچ مسنگ پرسن ءَ راست کتگ ءُ گوشتگ کہ گوں دردناکیں ھمے ھال ءَ شنگ کنگ ءَ ایں کہ وی بی ایم پی ءِ رھشون ماما قدیر بیران بوتگ۔ آئی لاش آریا نادراھجاہ ءَ ایر اِنت ءُ سوراب ءَ گلزمین ءِ میار کنگ بیت۔
ماما قدیر وی بی ایم پی ءِ بنداتی رھشون اِنت ءُ گوستگیں شانزہ سال اِنت کہ پہ زور بیگواھیں مردمانی آجوئی ءَ جھد کنگ ءَ اِنت۔ شال ءُ کراچی پریس کلب ءِ دیم ءَ شدکشیں زھرشانی بنجل جنگ ءُ نندگ ءَ ابید چہ شال ءُ کراچی ءَ داں اسلام آباد ءَ پہ زور بیگواھیں مردمانی آجوئی ءَ پیادگیں روانک ءِ سروکی ءِ کتگ۔
اے روانک ءَ گوں ماما قدیر ءَ ھوار فرزانہ مجید ءُ آدگہ زور بیگواھیں مردمانی کھول ھم گوں بوتگ اَنت۔ چہ ریاست ءِ نیمگ ءَ پہ اے روانک ءِ دارگ ءَ دو سے جاہ ءَ پہ دگ ویلانی نیمون ءَ ماما قدیر ءُ بیگواھیں مردمانی کھولانی لگت دیگ ءِ جھد کنگ بءتگ۔
ماما قدیر ءَ گوستگیں باز ماہ اِنت کہ نادراہ اِنت آ کراچی ءُ شال ءِ نادراھجاھاں الاج ءَ بوتگ کہ آ مرچی بیران بوتگ۔
چہ ماما قدیر ءِ بیرانی ءِ ھال ءِ شنگ بوگ ءَ ماں چاگردی رسانکدر ءَ جتاجتائیں تکاں سیادی داروکیں مردم دلپدردی درشان کنگ ءَ اَنت۔
ماما قدیر بلوچ پہ بیگواھیں مردماں یک مزنیں رھشونے ءِ بستار ءَ زانگ بیتگ کہ داں گڈی وھداں آئی ءَ پہ بندیگیں بلوچانی ھاتر ءَ جد ءُ جھد کنگ ءِ سکین داتگ –
ایشی ءَ ابید گوستگیں وھداں ماما قدیر بلوچ ءِ زھگ جلیل ریکی ءِ لاش ھم پہ ماما قدیر ءَ سوگات کنگ بیتگ کہ آ ریاستی چیریں ادارھاں آوار جتگ ءُ برتگ بیتگ-
ماما قدیر ءَ وتی اندوھانی درد آسر کتگ انت بلے آئی ءَ پہ بلوچ ءُ بلوچستان ءِ پرسیگیں جاوراں یل دات انت-