چہ حب ءَ دگہ دو زالبول پاکستانی پوج ءَ آوار جتگ انت

بلوچستان ءِ واپاری شھر چہ حب چوکی ءَ پاکستانی پوج ءَ دو زالبول آوار جنگ ءَ پد ناشناسیں جاھاں برتگ انت-

گیشیں اھوالانی رد ءَ حب چوکی ءِ ھند گنجی گھوٹ داروھوٹل ءَ مروچی بامسار ءِ ساھت سَے ءَ یکیں کھول ءِ دو زالبول آوار جنگ ءَ پد بیگواہ کتگ انت-

آوار جنگ بیتگیں زالبولانی پجار ھیرنسا ء واھد ءُ ھانی ء دلوش ءِ ناماں زانگ بیتگ انت –

کھول ءِ رد ءَ مروچی بامسار ءِ ساھت سَے ءَ ایف سی، سی ٹی ڈی ءُ آئی ایس آئی ءِ کارندھاں لوگ ءَ بیڑ برتگ ءُ اود ءَ ھیرنسا ءُ ھانی آوار جتگ ءُ برتگ انت کہ چریشی ءَ پد آیانی بارو ءَ ھچ اھوال نیست انت-

زانگ بہ بیت حب ءَ اے سیمی ویل انت کہ اود ءَ زالبول آوار جنگ ءُ بیگواہ کنگ بوگ ءَ انت چِد ءُ پیش گوستگیں پشمبے ءَ ھاجر ءُ ھمے سال ءِ بیست ءُ دو نومبر ءَ پانزدہ سالی ئیں نسرین بلوچ آوار جنگ ءُ بیگواہ کنگ بیتگ انت-

مروچی آوار جنگ بیتگیں زالبولانی توک ءَ ھانی ءِ اُمر بیست ءُ ھپت سال ءُ ھیرنسا ءِ اُمر ھبدہ سال گوشگ بوگ ءَ انت –

ھمے وڑ ھمے ماہ ءِ یک تاریخ ءَ چہ ھزدار ءَ فرزانہ ءُ چہ دالبندین ءَ رحیمہ گوں برات ءَ آوار جنگ ءُ بیگواہ کنگ بیتگ انت-

ھمے وڑ ھمے سال ءِ مئی ءِ ماہ ءَ پوج ءِ دست ءَ آوار جنگ بیتگیں بلوچ زالبول ماہ جبین ھم انگت ءَ دیم ءَ آرگ نہ بیتگ-

بلوچستان ءَ بلوچ زالبولانی آوار جنگ ءِ سر ءَ پدردی درشان کنگ بوگ ءَ انت کہ سیاسی مھلوک ءِ گوشگ انت ریاست ءَ بلوچ زالبولانی آوار جنگ ءُ بیگواہ کنگ ءَ وتی دست ترند کتگ انت-