گوستگیں روچ ءَ چہ ھب چوکی ءَ پاکستان ءِ چیریں ادارھانی دست ءَ زورانسری آوار جنگ بوتگیں شفیق زھری ءِ چک ماھزیب بلوچ ءَ پریس کلب ءَ اھوالکاراں گوں تران کنان ءَ گوشتگ کہ مناں مروچی یکبرے پدا وتی کھول ءِ سرا بوتگیں ریاستی زلم ءُ زوراکیانی داستان گون انت ءُ اتکگاں ۔
ماھزیب بلوچ ءَ گوشتگ کہ ھپت سال ساری مئے کھول سرا ھما وھد ءَ کیامت آرگ بوتگ وھدیکہ منی پت ءِ کستریں برات ءُ منی ناکو راشد ھسین بروہی 26 دسمبر 2018 ءَ چہ متھدہ ارب امارات ءَ پاکستانی واکداراں بیک ڈور چینل ڈپلومیسی ءِ سرا آوار جتگ ءُ پاکستان ءَ آورتگ ۔
آئی ءَ گوشتگ کہ اے ھپتیں سال ما ھمے ریاست ءِ جند ءِ جوڈ کتگیں کانودانی رد ءَ آمیدگس ءُ سرکار ءِ اڈ داتگیں کمیشن آنی گور ءَ وتی ارز برتگ ۔ اے ھپتیں سالاں من ءُ منی پیرزالیں بی بی شال ءَ بگر تاں کراچی ءُ چہ کراچی بگر اسلام آباد ءَ ھر در ءِ دپ ءَ وتی پریات برتگ بلے مارا انساپ دیگ وتی جاہ ءَ مئے گپ گوشدارگ نہ بوتگ ۔
آئی ءَ گوشتگ کہ من چدوپیسر باز رند ءَ شال ، کراچی ءُ اسلام آباد ءَ نندانک ءُ ایمنیں زھرشانی کنان ءَ وتی ناکو ءِ یل کنگ ءِ لوٹ کتگ ۔ نوں منی ناکو ءَ ھپت سال سرجم بوگی انت بلے ھنگت یل کنگ نہ بوتگ ءُ نوں منی پت شفیق الرحمان زھری ھم زورانسری آوار جنگ بوتگ ۔
ماھزیب ءِ رد ءَ آئی پت یک پروفیسر ئے ءُ زھری شھدربرجاہ ءَ وتی پرز ءَ پیلو کنگ ءَ بوتگ ءُ گوستگیں بازیں سالے بیت کہ ھب ، ھزدار ءُ کراچی ءَ نشہ آماچیں مردمانی ھاتر ءَ جوڈ کنگ بوتگیں پرورش ریکوری سینٹرز آنی تہ ءَ ھم وتی کرد ءَ پیلو کنگ ءَ بوتگ ءُ گوستگیں روچ ءَ بزاں چار شمبے ءَ آ ھمے سینٹر ءِ تہ ءَ ریاستی ادارھانی کارمنداں زورانسری آوار جتگ ءُ بیگواہ کتگ ۔
آئی گوشتگ کہ منی پت ءِ آوار جنوک کہ سلاہ بند بوتگ انت آیاں سنٹر ءِ سی سی ٹی وی کیمرہ پروشتگ انت ءُ آ لٹ ءُ کٹ کتگ ءُ زورانسری وتی ھمراھی ءَ برتگ گوں ۔ ما ھما دمان ءَ ھب تانہ ءَ وتی ارزی داتگ بلے بازیں ادارانی گوزگ ءَ پد ھم منی پت زاھر کنگ نہ بوتگ ۔
آئی ءَ گوشتگ کہ گوست ءَ منی پت نودربر سیاست ءَ گوں بندوک بوتگ ءُ سال 2013 ءَ ھم چہ ھب چوکی ءَ زورانسری آوار جنگ بوتگ ءُ پدا داں پانزدہ روچ ءَ لٹ شاپ کنگ ءَ پد نیمرگیں جاوراں یل داتگ پدا رند ءَ آئی بس وتی وانگجاہ ھمے کاراں گوں وت ءَ داشتگ ءُ اے وھدی آئی ءِ گوں ھچ وڈیں سیاسی چست ءُ ایراں سیادی نہ بوتگ ۔
ماھزیب بلوچ ءَ اھوالکاراں گوں تران کنان ءَ گوشتگ کہ مروچی شمے دیم ءَ یک زھگے اشتوک انت ءُ وتی ناکو راشد ھسین ءُ وتی پت شفیق الرحمان ء عبدالرسول زھری ءِ وش ءُ سلامتی ءِ یل کنگ ءِ لوٹ ءَ کنگ ءَ انت ۔
آئی ءَ گوشتگ کہ مئے کھول ءَ پانزدہ سال ایں کہ ریاستی زلم ءُ زوراکیانی دیمپانی ءَ کنگ ءَ انت اشی ءَ ابید ھم من ایمنیں ریاستی کانودانی رد ءَ انساپ ءِ لوٹ ءَ کناں ۔ منی سرا ھم ایپ آئی آر بوتگ ۔ ھمدا نزیک ءَ مسلم وانگجاہ ءَ ریاستی ادارھاں مناں ایمنیں زھرشانی کنگ ءِ سوب ءَ دزگیر کنگ ءِ جھد کتگ ۔
آئی ءَ گوشتگ کہ ریاست تاکت ءِ زور ءِ پالیسی ءِ رد ءَ مئے کانودی لوٹ ءُ ایمنیں توار ءَ ایرموش کنگ لوٹ ایت ءُ ھچ وڈیں جمہوری ریاست وتی شھریانی گوم ءَ اے وڈیں رویشت نہ دار ایت بلکیں ڈکٹیٹر ھم بس ھمایاں سزا دنت کہ آیانی بگیری ءَ گپ جنت بلے ادا ریاست مارا یکجاھی زوراکی ءِ نشانگ کنگ ءَ انت ۔
ماھزیب بلوچ ءِ گوشگ ات کہ من وتی پریس کانپرنس ءِ گڈسر ءَ ریاست ءَ جست کناں کہ منی پت کجا ایں ؟ ءُ چہ سرکار ءَ منی لوٹ ایں کہ مناں انساپ بہ دنت ءُ منی پت ءَ دیما بیار ایت ۔