زَرّین بلوچ بنجاھی کماش ءُ مھردار بلوچ بنجاھی مزن کارگشاد گچین کنگ بوتگ اَنت۔ “بلوچ راجمان ءِ ہمک پِڑ ءِ مردماں بی ایس او ءِ فلسفہ زورگی اِنت ءُ پہ راجی آجوئی جہد ءَ وتی زمہ واری ایمانداری ءَ گوں پیلو کنگی اَنت دانکہ ما بلوچ راجی اِستان ءِ جوڈشت ءَ سوبین بہ بیں۔”
کماش زَرّین بلوچ
بلوچ اسٹوڈنٹس آرگنائزیشن آزادءِ بیست ءُ چارمی راجی بنجاھی لس مجلس گوستگیں کماش درپشان بلوچ ءِ سروکی ءَ برجم دارگ بوتگ۔ بنجاہی لس مجلس بیات نمیرانیں کمبر چاکربلوچ ءُ پنام “بلوچ جُنز ءَ یکشل ءَاوشتوکیں گُمنامیں کارستاں” دسمبر ءِ ماہ ءَ سئے روچی دلجمیں مجلس ءَ پد سوبمندی ءَ گوں آسر کنگ بوتگ، زَرّین بلوچ بنجاہی کماش ءُ مھردار بلوچ مزن کارگشاد گچین کنگ بوتگ اَنت۔
سئے روچی بنجاہی لس مجلس چہ نمیرانیں سرانی یات ءَ دو ساہت ءِ بے تواری ءَ گوں بندات کنگ بوت، مجلس ءِ اولی بھر ءِ بنگپانی تہ ءَکماش ءِ بنگیجی تران، دستور سازی، دو سالی بنجاہی اہوال نامگ،شرگِداری، گَل کاری، ھندی ءُ میاں استمانی سیاسی جاورہال ءُ آوکیں گامگیجءَ پد گچینکاریءُ دومی بھرءَ گوستگیں کماش ءِ گُڈی تران ءُ نوک گچین بوتگیں کماش ءِ تران ءِ بنگپ ہوار بوتگ اَنت کہ سوبمندی ءَ گوں آسر بوت اَنت۔ بنجاہی لس مجلس ءِ اولی روچءَ بنجاہی کماش ءَ گوں کانسلراں تران کت، دستور سازی ءَ پد، کارگشاد ءِ دوسالی اہوال دلجمی ءَمجلس ءِ دیم ءَ پیش کنگ بوتگ اَنت۔ دومی روچ چہ شرگداری بھر ءَ بندات بوت۔
نگدی بھر ءَ سنگتاں باوست کت کہ آشوبی ادارہانی تہ ءَ نگد ہما عمل اِنت کہ چرائی ءَ ما وتی گوست ءُ ہست ءَ ہمدپ کنیں ءُ تاوان دیوکیں نزوریاں کشیں، بلے نگد مدام مچانکی نپانی ہاتر ءَ کنگ بہ بیت بہ زاں پہ مچانکی ءُ راجی جنز ءِ نپانی پہریزگ ءَ نگد گوں ایمانداریءُابید ریاہ ءُ روہ ءَ کنگی ایں چیاکہ اے نگد اِنت کہ مارا وتی مکسد ءَ چہ چپ روگ ءَ دار ایتءُ یکشل ءَ گوں آشوبی رھبنداں ہمگام کنت۔مارا نہ تہنا وتی ادارہ ءِ تہ ءَ نگدی رواج آرگی اِیں بلکیں راجی جنز ء ِ تہ ءَ اے رواج منظم کنگی ایں دانکہ ما ہمک پِڑ ءَ وتی ردیاں نگدی نگاہے داشت بہ کنیں ءُ آہانی درجنگ ءُ نزوریانی کشگ ءَ پہ عملی گامگیج زورگ ءَ دل مہ جنیں بلکیں گوں نیک نیتی ءَ آہاں توجیل بہ کنیں۔ اے بی ایس او ءِ رواج بوتگ کہ آ چہ نگد ءَ بیھ نہ تتکگ بلکیں پہ وشی آیانی دیمپانی کتگ ءُ گوں سنگینی ءَ وتی نزوری ءُ کوتاہی کش اِتگ اَنت پرچاکہ ما سرپد بیں ابید نگد ءَ مئے ہمک آشوبی عمل گوں بے رھبند ی ءَ جنز ایت، چِزے کہ بے رھبند ءَ جنز ایت ءُ چِک ءُ تان نہ بوت گڑا آوتی منزل ءُ مکسد ءَ گِپت نہ کنت۔ گل کاری بن گپ کہ آئی ءِتہ ءَ بلوچ جنز ءِ ہستیں لوٹ ءُگزرانی رد ءَ نوکیں پالیسی ءُ شوربندیانی سر ءَ باوست اِت اَنت، جتائیں سرہال ءُ پالیسیانی سر ءَ تران کنگ ءَپد اے بنگپ ءِآسری ءَ پد دیوان ءِدومی روچ آسر کنگ بوت۔ سیمی روچ ءَ ھندی ءُ میاں استمانی سیاسی جاورہال ءُ آوکیں گامگیج ءِ بنگپ جنزینگ بوت اَنت۔ آؤکیں گامگیج ءِ بنگپ ءِ تہ ءَ اولی بھر ءَ پہ دو سالی کاراں پالیسی ٹہینگ بوت ءُ نوکیں فیصلہ زورگ ءَ پد دومی بھر ءِ تہ ءَہستیں جوڈشت ہلاس کنگ بوت درپشان بلوچ ءِسروکی ءَ سے رکنی گچین کاری مجلس ٹہینگ بوت کہ اشی ءَ پد گچینکاری عمل جنزینگ بوت۔ گچینکاری ءِ تہ ءَ امیتواراں جتائیں زمہ واریانی سر ءَ وتی کاگد جم کت اَنت ، گچینکاری عمل ءِ سوبمندی ءَ گوں برجم دارگ ءَ پد گچینکاری مجلس ءِ آسری ءِ جار پرینگ بوت ءُ دیوان ءِ دیم ءَ نوک گچین بوتگیں بنجاہی کابینہ ءُ بنجاہی کمیٹی ءِ سنگتانی نام ایر کنگ بوت اَنت۔ نوک گچین بوتگیں زمہ وارانی تہ ءَ زرّین بلوچ کماش، مھردار بلوچ مزن کارگشاد ءُ شولان بلوچ بنجاہی ترجمان گچین کنگ بوت اَنت۔
مجلس ءِ اولی بھر ءِ بنگپانی آسری ءَ پد سوگندی بھر ءَنوک گچین بوتگیں بنجاہی زمہ وار گوستگیں کماش درپشان بلوچ ءَ سوگند داَت اَنت ءُ دیوانءِ دومی بھر بندات کنگ بوت کہ آئی ءِ تہ ءَ بنجاہی گوستگیں کماش ءُ نوک گچین بوتگیں کماش ءَ مجلس ءِ دیم ءَ تران کت۔
گوستگیں کماش درپشان بلوچ ءَ دیوان ءَ تران کنان ءَ گوشت کہ من نوک گچین بوتگیں بنجاہی زمہ واراں مراد باتی دیاں ءُ ہمے امیت داراں کہ نوک گچین بوتگیں سنگت اے راجی ادارہ ءَ گوست ءَ چہ گیش مہکم، لائک ءُ منظم کنگ ءَ وتی ہرچی ببا دیگ ءَ چک ءُ پد نہ بنت ءُ بلوچستان ءِ دوبر آجوئی ءَ وتی ھون ءُ ھیدانی پرواہ نہ دار اَنت۔ مرچی بی ایس او ءَ منی سپر ہلاس بوگ ءَ اِنت، اے پہ من یک گم ءُ ازیتے ءَ چہ کمترنہ اِنت،اے پہ من سکیں گرانیں وہدے پرچاکہ من سر چِست کتگ گڑا بی ایس او اِنت کہ مارا انسانی ءُ سیاسی ہوالہ ءَ رودینتگ ءُمزن ئِے کتگ،مئے درسگاہ،مئے کھول ءُ مئے زِند درست بی ایس او بوتگ۔ بی ایس او مئے ہیال ءُ گمان ءَ چہ ہم گیش کرز ایت پرچاکہ اے ھمے ادارہ ءِ برورد اِنت کہ بلوچ راجی جُنز ءِ سیاسی روانی نہ پرشتگ ءُ ناکہ نزور بوتگ بلکیں ہمک جاور ءُ وھداں پہ آجوئی جنز ءَ اوشتوک بوتگ ءُ مہلوک ءُ ورنایانی نہ تہنا سیاسی تربیت کتگے بلکیں آہانی رہشونی کنان ءَ پہ جنز ءَ سائنسی رد ءَ جہد ئِے کتگ۔ اے دراجیں سپر چہ وڈوڈیں اڈانداں پُر بوتگ، بی ایس او ءِ جوڈبوگ ءَ بہ بِگر داں روچء مروچی بی ایس او اِستانی کریک ڈاون، بدواہانی بدیں عمل ءُ نپ پرستیں مردمانی اڈاند اں ہوار ہمک وڈیں جیڑہ ءُ درآشوبی روشت سگ اِتگ بلے اے بی ایس او ءِ رہشون ءُ کیڈرانی لیکہی منظمی اِنت کہ آہاں ہمک نہ گیگیں جاوراں بی ایس او ءِ آشوبی ءُ راجی بستار رکینتگ ءُگوں آجوئی مکسد ءَ ہمدپ کتگ۔
کماش درپشان ءَ دیمتر ءَ گوشت کہ اے دراجیں سپر ءَ یکے ہما بلوچ نمیرانیں سرانی کربانیاں کہ مارا ھمت داتگ ءُ لیکہ ءَ گوں نہ تہنا بندوک کتگ بلکیں آجوئی مکسد ءِ ہاتر ءَ گیش کار کنگ ءَ دلبڈی داتگ ءُ دومی ہما گمنامیں کارِستانی جہد ءُ ھمت ءَ کہ ابید نام، پجار، اگدہءُ وتگڈیں ستا ءَ وتی راجی زمہ واریاں گوں ہنچو بندوک اَنت کہ وتی ہمک چِز ببا دیگ ءَ پد ہم آہانی زبان ءَ دم برگ ءِ لبزے ہم در نئیت۔ بلوچ راجی جُنز ءَ ہمے ڈولیں جہدکار ءُ کیڈر لوٹ ایت کہ آ ہزار سکی ءُ گرانی ءَ پد ہم وتی زِند ءِ زاہری تیوگیں ہستانک ءِ ببا دیگ ءَ چک ءُ پد مہ بنتءُ شپ داں روچ گُمنانی ءَپہ آجوئی جہد ءِ وتی زمہ واریاں پیلو بہ کن اَنت۔ مئے گور ءَ ساہانی کربان کنگ ءِ ہچ چک ءُ پدی نیست، ہرکس وتی ساہاں پہ بلوچ گُلزمین ءِ ہاتر ءَ ندر کنگ ءَ جاڈیگ اِنت بلےاشاں چہ ابید اژدری گپ اِش اِنت کہ ہما وہد ءَ داں ما زِندگیں، پہ راجی آجوئی جہد ءَ چی کنیں ءُ چنچو نوکیں ءُ گیشیں کار کنیں کہ آ پہ مئے آجوئی جہد ءَ نپ ءُ پائدگ بنت۔ ہمے ہیال ءُ سِنچ ءَ گوں مارا وتی آشوبی عمل گیش منظم ءُ ترند کنگی اَنت دانکہ ماچہ بے عملی ءِ نادراہی ءَ دور ایوک ءَ علم ءُ عمل ءَ گوں اے راجی جنز ءَوتی بھر ءَ بہ دیے ایں۔
کماش درپشان بلوچ ءَ دیمتر ءَ گوشت کہ مئے ورنا ءُ مردم باز ھنرمند ءُ لائک اَنت بلے باز وھد ءَ ما وتی لائکیاں گوں در آشوبیاں روشتاں تاوانبار کنیں ، ما را کہ گوں وتی ھُنراں پہ راجی جنز ءَ جہد کنگی ایں ءُ پائد دیگی ایں، مئے ورنا برے وہدے وتگڈیں عمل ءُ گڈمنجیانی آماچ بنتءُ چہ راجی زمہ واریاں دور ءُ گِستہ بنت۔ بلوچ ورنایے کہ بلوچ سرڈگار ءِ سر ءَ ودی بیت آئی ءَ چہ دنیا ءِ ایدگہ ہمک ورنایاں وت ءَ جتا لیکگی اِنت، آیانی ہمک عمل ءُ کِردار ءِ یک بستارے ہست پمیشکا آیاں وت ءَ بلوچ راج ءِ مچانکی نپاں گوں بندوک کنگی اِنت ءُ ہمک پِڑءَ کہ آئی ءِ لائکی ہست اَنت ہمود ءَ جہد بہ کنت ءُ راجی جہد ءَ گوں وت ءَ ہمگرنچ بہ کنت۔ بی ایس او ءِ لیکہ ءَ گوں بندوکیں ورنا وت ءَ پِگری، تکنیکیءُ علمی بنیاد ءَ منظم بہ کن اَنت ءُ شیواری ءُ دورچاری ءَ گوں آشوبی عمل ءَ دیم بہ جنزین اَنت۔ بی ایس او ءَ گوں ایمانداری ہمِش اِنت کہ آئی ءِ داتگیں فلسفہ ءُ لیکہ ءِ سر ءَ کسے چنچو سنگینی ءَ گوں عمل کنت، بی ایس اوءَ گوں ایماندار بوگ بلوچ راجی جُنز ءَ گیش منظم ءُ بلوچ راجمان ءَ چہ دژمن ءِ ساناں کشگ ءِ راہ بوت کنت پمیشکا بلوچ ورنایاں وت ءَ ہمک پِڑ ءَلائک کنگی اِنت ءُ بلوچ راج ءِ ہستانک ءِ رکینگ ءَ پہ وتی زمہ واری پیلو کنگی اَنت۔ گوستگیں کماش ءِ تران ءَ پد نوک گچین بوتگیں کماش زرّین بلوچ ءَ مجلس ءِ دیم ءَ تران کت۔ کماش زَرّین بلوچ ءَ تران کنان ءَ گوشت کہ نوک گچین بوتگیں زمہ واراں مراد باتی دیگ ءَ ہوار آہاں گوں ہمے پنت اِنت کہ آزمہ واریاں تہنا اگدہ مہ زور اَنت بلکیں اشاں راجی ڈُبہ بہ پہم اَنت ءُ بلوچ راجی آجوئی ءِ جہد ءَ وتی گران کدریں کردارے ادا بہ کن اَنت، آ اے آوکیں سالاں چہ وتی تیوگیں ھمت ءُ مھنت ءَ بی ایس او ءَ پگری، جوڈشتی ءُ سائنسی تک ءَ گیش منظم کنگ ءَ جہد بہ کن اَنت۔بی ایس او ءَ وتی سیاسی سپر ءِ تہ ءَ ہمک وڈیں سکی ءُ جنجال دِستگ ءُ گوں دلیری ءَ آہانی دیمپانی کتگ، اے راجدپتر ءِ تاکاں نکش اِنت کہ ہمک وڈیں ڈنی ءُ تہی گپچلانی دیمپانی ءَ پد ہم بی ایس او وتی راجی آجوئی جہد ءَ آشوبی پِگر ءُ عمل ءَ دمانے ہم پشت کنز نہ بوتگ۔ نپراں بی ایس او منظم کتگ بلے جاہے جاہے ہمے نپراں بی ایس اوءَ تاوان دیگ ءِ ہم بے سوبیں کوشست کتگ بلے ادارہ ءِ آشوبی لیکہ ءِ منظمی ءَ اے تیوگیں جنجال نہ تہنا داشتگ اَنت بلکیں دیمروئی ہم کتگ، بہ زاں بی ایس او ءَ وتی سیاسی سپر ءَ اے منارینتگ کہ نپر چہ ادارہ ءُ راجی جنز ءَ مستر ءُ بالاتر نہ اَنت۔
آئی ءَ گوشتگ آشوبی ادارہانی ہاتر ءَ سیاسی مکسد درستاں چہ مستریں چیدگ بیت، پمیشکا بی ایس او ءِ جہدکاراں اے سیاسی مکسد نہ تہنا پھازاِتگ بلکیں آئی ءَ دیم ءَ برگ ءُلیکہی تک ءَ منظم کنگءَ ہم کار کتگ۔ اے ادارہ مئے راجی امانتے، اشی ءِ رکینگ ءُ منظم کنگ نہ تہنا آئی ءِ باسکانی زمہ واری بیت بلکیں بلوچ مہلوک ءُ لس ورنایانی مزنیں زمہ واری یے بیت کہ آ ادارہ ءِ داتگیں لیکہ ءُ پنتاں بہ زور اَنت ءُ آئی ءِ رندگیری ءَ بہ کن اَنت۔ کسے اگاں باسک نہ اِنت بلے آئی ءَ بی ایس او ءِ داتگیں فلسفہ ءُ لیکہ ءِ سر ءَ عمل کنگ راجی زمہ واری یے سرپد بوگی اِنت دانکہ آ دُژمن ءِ آورتگیں ہمک وڑیں پندل ءُ شوربندیاں وتءَ رکینت بہ کنت۔بلوچ ورنایے زمین ءِ کجام ہم کُنڈے ءَ بوت، آئیءِ بی ایس او ءِ لیکہ ءُ مکسد ءِ سر ءَ عمل کنگ ءَ آ بلوچ راجی جہد ءَ وتی گران کدریں بھر ءَ دات کنت ءُ اشی ءِ نپ مچانکی دروشم ءَ بلوچ راج ءَ رس اَنت۔بلوچ راج ءِ کجام ہم پِڑ بہ بیت، ورنایاں بی ایس او ءِ لیکہ زورگ ءُ ہما پِڑاں پہ راجی جُنز ءَ جہد کنگی اِنت۔
کماش ءَ تران کنان ءَ دیمتر ءَ گوشت کہ مرچیگیں بلوچ راجی جنز چہ ورنا ءُ مہلوک ءَ باز لوٹ کنت ءُ اے لوٹانی سرجم کنگ وھد ءِ درستاں چہ مستریں زرورت اِنت،ہمک دور ءُ باریگ ءَ بی ایس او لیکہی بنیاد ءَ گیش منظم بوان اِنت پمیشکا آئی ءِ جہدکار ءُ لس ورنایاں وت ءَ راجی آجوئی جہد ءِ ہاتر ءَ ایوک ءَ جاڑی کنگی نہ اِنت بلکیں گوں نوکیں پالیسی ءُ ھُنراں راجی آجوئی جہد ءَ وتی زمہ واری پیلو کنگی اَنت۔ ما کہ راجی اِستانے ءِ جوڈشت ءِ ہاتر ءَ جہد کنگ ءَ ایں گڑا مارا ہما تب ءَ گوں دورچاری ءَ جہد کنگی ایں ،مارا پہ اِستانی جوڈشت ءِ تب ءِ آرگ ءَ گوست ءِ ہمک نزوری ءُ کوتاہی بوتگ اَنت آہاں چہ پنت زورگی ایں ءُ دیم ءَ جنزگی ایں۔ بلوچ ورنا کُربانی دیگ ءَ ہچ چک ءُ پد نہ بنت ءُ مرچی نمیرانیں سرانی ہمے کربانیانی برورد اِنت کہ مئے سر پہ پھر بُرز اِنت ءُ مارا جنزگ ءِ ھمت رستگ، بلے اے کربانی تہنا مئے ہاتر ءَ لہتے کِردار مہ بنت بلکیں آہانی داتگیں فلسفہ ءِ سر ءَ وتی زند ءِ تہ ءَ انچیں گرانیں کار کنگی ایں چہ اشی ءَ ما نمیرانیں سرانی کرتگیں کارا ں دیم ءَ بُرت بہ کنیں، پریشی ءَ بلوچ ورنا یاں ہوار ہمک تبک ءِ مردماں وتی ایمانداری گوں راجی جنز ءَ بندوک کنگی اَنتءُ کجام ہم زمہ واری ءِ سر ءَ اَنت آہاں گوں ایمانداری ءُ سنگینی ءَ پیلو بہ کن اَنت دانکہ ہمے کسان کسانیں کارءُ زمہ واریاں چہ ما وتی مچانکی مکسد ءِ گِرگ ءَسوبین بہ بیں۔ءُ بی ایس او ءِ ہمک جہدکارےءَ نپری بنیاد ءَ پہ راجی جنز ءُ ادارہ ءَ یک جتا ءُدورچاریں پالیسی یے گون بہ بیت دانکہ آ راجی جنز ءِ ہما پشت کپتگیں ءُ ہورکیں جاہاں پُر کنگ ءَ وتی بھر ءَ نوکیں آسر دیوکیں رنگےءَ دات بہ کن اَنت۔
مروچی بلوچ راج ءِ سر ءَ ہمک ڈولیں زلم ءُ زوراکی کنگ بوگ ءَ اِنت، اے پہ راجی جہد ءَ بلوچ مہلوک ءِ اوشتگ ءِ منانک اَنت کہ اینچو زوراکی سگگ ءُ کُربانی دیگءَ پد ہم مئے مہلوک دلیری ءَ گوں دُژمن ءِ دیم ءَ اوشتاتگ ءُ جہد کنگ ءَ اِنت، ہمک کس وتی راجی زمہ واریاں پیلو کنگ ءَ اِنت۔ اے دنیا ءِ دپتر ءِ تاکاں نکش اِنت کہ ہمک سیاہ ءُ تھاریں شپے ءَ زرد ءُ سُھرچکیں بامے الم ہست ءُ اے امیت نہ تہنا مئے راج ءِ دلاں پیوست اِنت بلکیں اے پِگری ہوالہ ءَ ہمنچو تونگر اِنت کہ آ وتی ساہانی ببا دیگ ءَ ہم چک ءُ پد نہ بوگ ءَ اِنت۔ بلے ہستیں دور ءُ راجی جنز مرچی گیش لوٹ کنت، بلوچ راج ءِ ورنایاں ہوار ہمک پِڑ ءِ مردماں وتی راجی جُنز ءَ گام تیز ءُ شیواری ءَ گوں ایر کنگی اَنت، پرچاکہ گوست ءَ ما ہمنچو کتگ آ پہ راجی جُنز ءَ انگت کم اَنت پمیشکا نوں مارا گیش کار، گیش زمہ واری وتی کوپگاں زورگی ایں ءُ راجی جنز ءَ سوبین کنگی ایں دانکہ ما زوت آجوئیں بلوچستان ءِ مکسد ءَ سر بہ بیں ءُ بلوچ ءِ راجی اِستان ءِ جوڈشت ءِ سپر ءَ سوبین بہ بیں۔
بنجاہی لس مجلس ءِ تیوگیں بنگپانی سر ءَ تران کنگ ءَ پد نوک گچین بوتگیں مزن کارگشاد مھردار بلوچ ءَ چہ کماش ءِ رزا ءَ بی ایس او آزاد ءِ بیست ءُ چارمی راجی بنجاہی لس مجلس بیات ” نمیرانیں کمبر چاکر بلوچ” ءُ پنام” بلوچ جُنز ءَ یکشل ءَاوشتوکیں گُمنامیں کارستاں ” آسر کت۔