باندا من کہ مہ باں
شائر: ڈیوڈ رومانو
رجانک: آزين بلوچ
دی بلوچستان پوسٹ
باندا من کہ مہ باں
روچے بنداتی ءُ آسر ءَ گوں مہ باں
رولھی ساھتاں
تو کہ جیڑے منا
چم تئی ارس بنت
اے منی واھگ اِنت تو مہ گریوے پہ من
چو کہ زی گریتگ ئے
سرپداں یار ء من
گوں من ءَ امبری
مھر ءِ پُر زیمریں سیمسراں رستگ ۓ
گوں منا بوتگ ئے
اَنچو دوستاں ترا
اَنچو دوست ءِ منا
وھدے یاتاں کپ ئے
گیر کارے منا
باند وھدے بنا بیت منا چہ ابید
تہ بزاں کہ پری زادھے ءَ تئ
نام گپتہ مدام
یات کُرتہ ترا
سُھب ءُ بیگاہ ءُ شام
آئی ءَ گُشتگ اَت
باز دیر ءَ رواں
زندگیں جنتے ، پہ وت راجدپترے
انچیں جاھے ٹھیناں مدامی رواں
درستاں رُکست کناں
ھو ھمایاں کہ دوستاں منا دیدگاں
ساھتے ءَ چہ پد
چکّ ترینت وتی
چم نمبین اِتاں
ماں پتات اَندوہاں مسکیں ارواہ منی
زندگی کترھے پہ من ڈُکھے مہ بات
پہ تو رنجے مہ بات
ھو منی زندگی مرگ ءِ تھلیں سپر
اینچو نزیک میا چُش اِشتاپی ءَ
اینکدر جیڑیتہ گوست یات اِیں منا
اَست یات اِیں
درد ءُ گم ، ایمنی
وشدل ءُ شادھی
روچ ھما کہ ھواری ءَ گوازینتگ اَنت
مھر ءُ محبت ءِ راگاں گوں سایزنتگ اَنت
درست یاتاں منا
زندگی ءَ منا موہ بداتیں اگاں
چو ھُدا ءِ وڑا
چُش پیغمبر ءَ
کبلھیں دیم تئ کندگ ءَ چاریت اوں
دانکے دیراں ترا یار گیراریت اوں
الوداع الوداع پہ کُلوھے ترا
گُشتگ اَت یار ء من
باندا من کہ مباں
زند بندات بیت پہ مدامی منی
من نمیرانی ءِ راھاں سر باں ابد
اے ھمے ساھت اِنت
زندگی ءَ منا زندگی بکش اِتہ
ھردیں یاتاں کپ ۓ ، گیر کارۓ منا
بس ھمنچو بزاں من تئ ساھگاں
اوست ءُ اُمیت ءُ ارمان ءُ تئ واھگاں
یکے دومی ءِ میان ءَ نئیت ایوکی
سر نہ جنت اِیں جتائی ءِ رنجانی زِر
یار دست ءَ بگر
یار دست ءَ بگر