گوستگیں شپ ءَ روکپتی بلوچستان ءَ یک دگہ باھوٹی ءِ ناشناسیں پرپٹ سواراں تیر باران کتگ ءُ کشتگ کہ آ آئی ءِ پجار سمید اللہ ء نیاز مھمد جھمنند پنجگور پروم ءِ نام ءَ چہ بوتگ ۔ اے وئیل مگربی بلوچستان ءِ دمگ شمسر ءَ بوتگ کہ گوستگیں بازیں وھدے بیت سمید اللہ ھمدا باھوٹی نندوک بوتگ ۔
ھالانی رد ءَ ناشناسیں سلاہ بندیں مردماں شپ ءِ وھد ءَ سمید اللہ تیرباران کتگ ءُ تتکگ انت کہ ھما دمان ءَ آئی ءَ تیرانی ٹپ نہ سگ اتگ ءُ بیران بوتگ ۔
سمید اللہ بلوچستان ءِ دمگ پنجگور پروم ءِ جھمنند بوتگ ، دمگی مردمانی رد ءَ آ چہ بازیں پوجی آپریشناں دلسیاہ بوتگ ءُ در پہ دری زند گوازینگ ءَ لاچار بوتگ ، ھمے لاچاری ءِ سوب ءَ آ روکپتی بلوچستان ءَ شتگ کہ آودا آئی ءَ نگن پچی ترین ءِ بوتگ ءُ وتی روزگار ءَ بوتگ ۔
سمید اللہ ءِ کوش اولی نہ انت گوست ءَ ھم روکپتی بلوچستان ءُ اوگانستان ءِ بازیں ھند ءُ دمگاں چشیں وئیلانی ھال اتکگ کہ ھما بلوچ نشانگ کنگ ءُ کشگ بوتگ انت کہ چہ وتی بنکی ھنکین ءَ در آتکگ ءُ باھوٹی زند گوزینگ ءَ بوتگ انت ۔
راجدوستانی رد ءَ اے وھدی ھزارانی کچ ءَ بلوچ چہ بلوچستان ءِ جتا جتائیں ھند ءُ دمگاں در اتکگ ءُ روکپتی بلوچستان ، اوگانستان ، بلوچستان ءِ ایندگہ دمگاں ھوار سندھ ءَ شتگ ءُ نشتگ انت ، آیانی گوشگ انت در آیگ ءُ رؤگ ءَ ابید ھم اے مردم گشاں ما پھریز نہ ایں پرچا کہ اے ھمودا ھم لٹ ءُ کٹ ءُ ٹارگٹ کلنگ دیمپان انت ۔
راجدوستیں گل ءُ چاگردی باسک اے الزام ءَ پاکستان ءِ ریاستی ادارہ یا ھمایانی جوڈ کتگیں سلاہ بندیں ٹولیانی سرا لڈ انت ۔ آیانی گوشگ انت باز رند ءَ سر زاھری ءُ باز رند ءَ ناشناسیں ٹولی بلوچ باھوٹیاں نشانگ کن انت ۔
سمید اللہءِ کوش ءِ درگت ءَ ھم چاگردی ءُ سیاسی تکاں ھمے گوشگ بوگ ءَ انت کہ اے کار کشندہ ٹولی ءِ نیمگ ءَ کنگ بوتگ ۔