پنجگور ءُ ھب چوکی ءَ دو مردم آوار جنگ ءُ بیگواہ کنگ بوتگ اَنت

بلوچستان ءِ دمگ ھب چوکی ءُ پنجگور ءَ پاکستانی پوج ءُ ڈیتھ اسکواڈ کارندھانی دست ءَ دو مردم آوار جنگ ءُ بیگواہ کنگ بیتگ اَنت-

گیشیں ھالانی رِد ءَ پاکستانی پوج ءُ چیریں ادارھانی پروفیسر شفیق زھری آوار جنگ ءَ پد زورانسری بیگواہ کتگ-

اِھوالکار ءِ رِد ءَ شفیق زھری، دوھزار ھژدہ ءَ چہ زورانسری بیگواہ بلوچ کارکن راشد حسین بلوچ ءِ مستریں برات ءُ بلوچ یکجھتی کمیٹی ءِ رھشون ماہ زیب بلوچ ءِ پت اِنت، کہ مروچی نیمروچ ءَ چہ ھب چوکی ءَ سیوک سینٹر ءَ ھما وھد ءَ آوار جتگ وھدے آ وتی کار ءَ ساڑی بیتگ-

شفیق زھری کالج ءَ پولیٹیکل سائنس ءِ پروفیسرے، ءُ آ 2013 ءَ ھم زورانسری آوار جنی ءِ نشانگ کنگ بیتگ-

شفیق زھری ءِ برات راشد حسین 2017 ءَ چہ متھدہ ارب امارات باھوٹی زند گوازینگ ءَ بیتگ- آئی ءِ کھول رِد ءَ بیست شش دسمبر 2018 ءَ آ شارجہ ءِ نزیک ءَ یو اے ای ءِ چیریں ادارھاں بندیگ کتگ- پد ءَ جون 2019 ءَ گمانی ھساب ءَ شکی ئیں دروشم ءَ آ پاکستان ءِ دست ءَ داتگ- کھول گوشگ اِنت کہ اشی ءَ پد آئی ءِ درگت ءَ ھچ وڑیں ھال سر نہ بیتگ-

ماھزیب بلوچ کراچی، اسلام آباد ءُ ھب ءَ بی وائی سی ءِ نیمگ ءَ برجم دارگ بیتگیں زھرشانیاں پُرکار بیتگ، اود ءَ آ بلوچستان ءَ زورانسری بیگواھیں مردم، ءُ وتی ناکو ءِ یل کنائینگ ءِ لوٹ کتگ، انسانی ھکانی ٹولی ءِ رِد ءَ آ وتی پُرکاریانی سوب ءَ باز رند ءَ آوار جنگ ھم بیتگ اَنت-

سوشل میڈیا پلیٹ فارم ایکس سر ءَ درشانے ءَ بلوچ کارکن ءُ بی وائی سی ءِ رھشون ڈاکٹر صبیحہ بلوچ ءَ شفیق زھری ءِ زورانسری آوار جنی ءِ یک دلپدردی گوشتگ کہ آ بید کانودی کاروائی ءَ چست کتگ-

آئی ءَ گوشتگ کہ شفیق یک یک انچیں ورنائیں کارکنے ءِ پتے کہ آ وتی ناکو ءِ واستا انساپ لوٹ اِتگ، ءُ دیمتر ءَ گوشتگ کہ اے وئیل مچی سزا ءَ پدر کنت، اود ءَ پسھی ءِ لوٹ کنوکاں بے توار کنگ ھاتر ءَ آیانی کھولاں نشانگ کن اَنت-

ڈاکٹر صبیحہ بلوچ ءَ گوشتگ کہ ریاستی ادارھاں بے لگام کنگ انچیں گامگیج ءَ بید گر ءُ دار ءَ برجاہ دارگ ءِ موہ دنت- آیاں کڈن کتگ کہ زورانسری آوار جنی بُنکی انسانی ھکانی ھلاپ ورزی ءُ کانود ءِ ھمکرانی ءَ نزور کنت-

آیاں واکدار ءَ چہ لوٹ کتگ کہ شفیق زھری ءِ درگت ءَ زوت سرپدی دیگ بہ بیت، آئی ءِ سلامتی دلجمی دیگ ءُ مُچی سزا ءُ زورانسری آوار جنی دْرچ ھلاس کنگ بہ بیت-

اے گپ چارگی اِنت کہ ڈاکٹر صبیحہ بلوچ ءِ وتی پت، میر بشیر احمد، ھمے سال اپریل ءَ پاکستانی چیریں ادارھاں زورانسری بیگواہ کتگ، باز ماہ ءُ بندیگجاہ ءَ کنگ ءَ پد یل کتگ- اے وئیل بلوچ کارکنانی کھول ءِ ھلاپ آسری کاروائی ءِ دروشم ءَ پیشدارگ ءَ اِنت-

ھمے وڑ پنجگور ءِ دمگ چہ چتکان بازار ءَ ناشناسیں گاڑی سواراں یک مردمے آوار جتگ ءُ بیگواہ کتگ-

آوار جنگ بیتگیں ورنا ءِ پجّار یاسر ء محمد حسن نام ءَ چہ بیتگ، چمّگدانی رِد ءَ وئیل روچ رھماں چتکان بازار ءَ بیتگ، اود ءَ یک گاڑی ءَ سواریں مردم یاسر محمد حسین وتی ھمراھی ءَ برتگ –

دمگی مردمانی رِد ءَ آوار جنوکیں مردمانی سیاد چہ ڈیتھ اسکواڈ ءَ اِنت اشی ءَ ساری ھم چُشیں وئیل دیم ءَ اتکگ کہ ورنایانی آوار جنگ ءَ پد آیانی لاش دور بیتگ اَنت ءُ ڈیتھ اسکواڈ پاکستانی پوج ءُ چیریں ادارھانی چیردستی ءَ کار ءَ اَنت-