بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں سنی ، شال ، کیچ ، پنجگور ءُ بلیدہ ءَ بازیں اُرشاں زورگریں پاکستانی پوج نشانگ کتگ ۔ اے کارانی تہ ءَ شھرانی کنٹرول ، پوج ءِ مڈیانی دستیگ کنگ ھم ھوار انت ۔ اے اَرشاں زورگریں پوج ءِ دوازدہ کارمند مرتگ انت وھدیکہ اے اُرشاں بلوچ لبریشن آرمی ءِ سے سرمچار نمیران بوتگ انت ۔
جارکش ءَ سرجمیں ھال داتگ ءُ گوشتگ کہ گوستگیں روچ ءَ سرمچاراں پنجگور ءَ سرجمیں سرکاری جاھانی سر ءَ کنٹرول کتگ ءُ شھر ءِ بازیں جاھاں ءَ سنگر گپتگ ءُ نشتگ انت ۔ زورگریں پوج ءَ دیم ءَ آیگ ءِ جھد ھم کتگ بلے سرمچارانی اَرش ءَ پدکنزگ ءَ لاچار بوتگ انت ۔ میڑانی میان ءَ وتگڑیں سی ٹی ڈی ءِ یک کارمندے مرتگ ءُ دو زدگ بوتگ انت ۔ سرمچاراں دو ادار ءَ تاں وتی کنٹرول برجاہ داشتگ ءُ پد ءَ رند ءَ شوربندی ءِ رند ءَ واتر شتگ انت ۔
آئی ءَ گوشتگ کہ سرمچاراں کلات مڈ وے ءَ ریکوڈک ءِ لٹ ءُ پل ءَ ھواریں گاڑیانی کاروان نشانگ کتگ انت ۔ اے کار ءَ اے گاڑی مانداشتگ انت وھدیکہ کاروان ءِ پھازوکیں زورگریں پوج ءَ ھم تاوان رس اتگ.
آئی ءَ گوشتگ کہ 14 دسمبر ءَ دشت سیچی ءَ بلوچ لبریشن آرمی ءِ سرمچاراں زورگریں پاکستانی پوج ھما وھد ءَ نشانگ کتگ وھدیکی آ دمگ ءِ نیمگ ءَ آیگ ءَ بوتگ ۔ زورگریں پوج ءُ سرمچارانی میان ءَ ٹوھیں میڑے بندات بوتگ کہ چریشی ءَ زورگریں پوج ءَ تاوان بار بوتگ ءُ ھمے میڑے میان ءَ زورگریں پوج ءِ یک کواڈ کاپٹرے ھم سرمچاراں جتگ ءُ دور داتگ ۔
جارکش ءَ گوشتگ کہ 13 دسمبر ءَ بی ایل اے ءِ سرمچاراں بلیدہ ءِ دمگ میناز ءَ پوج ءِ ھاتر ءَ راشن بروکیں گاڑی ءِ دستیگ کتگ ۔ سرمچاراں ڈرائیور دیمتر ءَ چشیں کار کنگ ءَ مکن کتگ ءُ یل داتگ ۔ جارکش ءَ گوشتگ کہ ما پیش ءَ اے گپ جتگ کہ زورگریں پوج ءِ ھاتر ءَ راشن یا دگہ مڈی بروک کمک کاری ءِ درچ ءَ کاینت ھمے ھاتر ءَ اے کارکنوک دیمتر ءَ مئے نشانگ ءَ بنت ۔
جارکش ءَ گوشتگ 9 دسمبر ءَ کچھی ءِ دمگ سنی ءَ سرمچار ءُ زورگریں پوج ءِ میان ءَ میڑے بوتگ کہ اے میڑ ءَ زورگریں پوج ءِ چار کارمند مرتگ ءُ بازینے زدگ بوتگ انت ۔ دو ادار ءَ تاں برجاہ بوتگیں اے میڑ ءَ بلوچ لبریشن آرمی ءِ سرمچار صوفی اسماعیل نمیران بوتگ ۔
جارکش جیئند بلوچ ءَ گوشتگ 14 دسمبر ءَ شال ءِ دمگ ڈگاری ءَ بلوچ سرمچار ءُ زورگریں پوج ءِ میان ءَ ھما وھد ءَ میڑے بندات بوتگ وھدیکہ سرمچار پہ گل ءِ کارے ءَ سپر ءَ بوتگ انت ۔ زورگریں پوج ءَ لس گاڑیانی سر ءَ سرمچارانی انگیر کنگ ءِ جھد کتگ ۔ اے میڑ ءَ زورگریں پوج ءِ ھپت کارمند مرتگ انت ءُ بازینے زدگ بوتگ انت وھدیکہ بی ایل اے ءِ دو سرمچار نمیران بوتگ انت ۔
بی ایل اے ءِ جارکش جیئند بلوچ ءَ نمیران بوتگیں سرمچارانی درگت ءَ وتی درشان ءِ تہ ءَ گوشتگ کہ نمیرانیں سنگت اسماعیل پنام ء صوفی ء دین محمد جتوئی کچھی ءِ دمگ جتوئی ءِ جھمنند بوتگ آئی ءَ دو سال بوتگ کہ بی ایل اے ءَ گوں ھمگرنچ بوتگ ءُ مستونگ ءُ کچھی ءِ کوھاں وتی کرد ءَ پیلو کنگ ءَ بوتگ ۔ آ رھبندانی ءُ تمردی ءِ چیدگے بوتگ ءُ نگیگیں جاوراں سنگت ءِ ھوسلہ داتگ انت ۔ سنگت ءِ یک براتے فاروق جتوئی ءَ 2016 ءَ نمیران بوتگ کہ اے کھول ءِ یکشلیں دیمھونیانی رژناھیں درورے ۔
نمیرانیں سنگت عصمت اللہ ساتکزئی پنام ءِ سراج ء ٹکری ایواز شال ءِ دمگ ڈگاری ءِ جھمنند بوتگ ۔ آسال 2024 ءَ گوں بی ایل اے ءَ ھمگرنچ بوتگ ءُ شال ، بولان ءُ مستونگ ءِ کوھاں آئی ءَ پہ بلوچستان ءِ آجوئی ءَ وتی کرد پیلو کتگ ۔ سادگی ءَ زند گوازینوکیں سنگت عصمت دھکان کارے بوتگ ءُ ھاموش ءُ وش تب تمردیں سنگتے بوتگ ۔
نمیرانیں سنگت سجاد زہری پنام ءِ سارنگ ء محمد اسلم زہری ھزدار ءِ جھمنند بوتگ۔ بیست سالیگیں سنگت سجاد گوستگیں سال ءَ بلوچ لبریشن آرمی ءَ ھوار بوتگ ۔ آئی ءَ شال ، بولان ءُ مستونگ ءِ کوھاں وتی کرد پیلو کتگ ۔ کسان امری ءَ ابید زمہ داری ءِ مارشت ، دربرگ ءِ ھب ءُ کنگ ءُ پیش دارگ ءِ توکل ءَ سنگتانی تہ ءَ یکتا جاھے بوتگ ۔
جارکش ءَ گوشتگ کہ بلوچ لبریشن آرمی اے گپ ءَ تچک کنت کہ زورگریں پوج ءِ پوجی سر ءُ پر ، لٹ ءُ پلی ءُ کمکاری دراہ یک مھکمے وڑے ءَ نشانگ کنگ بنت ۔ مئے کار گوں آجوئی ءِ مول ءَ بندوک انت ءُ نمیرانیں سرانی دیمھونی اے جھدے بنھشت انت ۔ آیانی مشن ھرھال ءَ برجاہ بیت ءُ گھگیری ءِ اے سپر وتی بَنجاہ ءَ سربیت ءُ اوشت ایت ۔