آواران : پاکستانی پوج ءِ آبادی سر ءَ مارٹر آس، زالبول ءُ چُکاں ھوار ھپت شھری ٹپی

آواران ءَ پاکستانی پوج ءِ نیمگ ءَ چہ آس دیگ بیتگیں مارٹر گولہ دمگی آبادی سر ءَ کپتگ-

گیشیں ھالانی رِد ءَ بلوچستان ءِ دمگ آواران ءَ گوستگیں روچ ءَ چہ پاکستانی پوج نیمگ ءَ آس دیگ بیتگیں مارٹر گولہ شھریانی لوگانی سر ءَ کپگ ءِ آسر ءَ زالبول ءُ چُکاں ھوار ھپت مردم ٹپی بیتگ اَنت-

چمّگندانی رِد ءَ پوج ءَ بازیں مارٹر گولے آس داتگ کہ جتاجتائیں لوگانی سر ءَ کپتگ اَنت – ٹپی دمگی مردماں وتی کُمک ءَ چہ نادُراھجاہ ءُ برتگ اَنت، وھدے کہ لھتے ٹپّیانی جاور ناگیگ گوشگ بیگ ءَ اِنت-

زانگ بہ بیت کہ اشی ءَ ساری ھم آواران ، ھُزدار ءُ کیچ ءِ جتاجتائیں دمگی آبادی پاکستانی پوج نیمگ ءَ چہ آس دیگ بیتگیں مارٹر گولھانی نشانگ ءَ اَتکگ بیتگ اَنت-

گوستگیں ماہ ءِ گُڈی ءَ کیچ ءِ دمگ ھوشاپ ءَ پوج نیمگ ءَ چہ دمگی آبادی سر ءَ کپگ ءَ مارٹر گولہ ءَ پنچ جنکو ٹپی بیتگ اَنت آیانی تہ ءَ یک جنکوے ٹپّانی درد نہ سگ اِتگ ءُ بیران بیتگ-

ھمے وڑ ھمے سال ستمبر ءَ بلوچستان ءِ دمگ ھُزدار ءَ برجاہ لشکر کشی ءِ میان ءَ تھسیل زھری ءُ مولہ ءَ سے جتاجتائیں ڈرون اُرشاں زالبول ءُ چُکاں ھوار یازدہ مردم بیران بیتگ اَنت وھدے کہ نُھ ٹپی بیتگ اَنت-

زھری، ھُزدار ءَ پاکستانی پوج ءَ ڈرون اُرشانی پدری کنان ءَ ٹاہ داتگ کہ اے اُرشاں بلوچ آجوئی لوٹوکیں سلاہ بندیں ٹولی ءِ باسک نشانگ کتگ اَنت ،بلے ھیومن رائٹس کمیشن آف پاکستان، ایمنسٹی انٹرنیشنل ءُ بازیں سیاسی ءُ انسانی ھکانی ادارھاں اے ٹاہ رد کتگ اَنت-