بلوچستان ءَ پاکستانی پوج ءِ سر ءَ بیتگیں اُرشاں چار کارندہ بیران، زمہ واری بلوچ سلاہ بنداں من اتگ انت

بلوچستان ءِ جتاجتائیں دمگاں پاکستانی پوج ءَ بلوچ سلاہ بندانی اُرشانی دیمپانی کنگ کپتگ – اے اُرشاں پوج ءِ چار کارندہ کُشگ بیتگ ءُ دگہ بنجلانی سر ءَ ھم اُرشانی اھوال دیم ءَ اتکگ انت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں شال ءِ دمگ ڈغاری کراس سر ءَ زورگریں پاکستانی پوج ءِ گاڑی ھما وھد ءَ سنگر گپتگ ءُ اُرش ءِ نشانگ کتگ اَنت وھدے آ وتی پوسٹ نیمگ ءَ روگ ءَ بیتگ اَنت-

جارکش ءَ گوشتگ کہ سرمچاراں زورگریں پوج سر ءَ راکٹ ءُ دگہ وتکاریں سلاھاں چہ اُرش کتگ، اُرش ءِ نشانگ آیگ ءَ زورگریں پوج ءِ دو گاڑی اتکگ اَنت کہ آیانی تہ ءَ یک گاڑی ءَ راکٹ لگگ ءَ چہ سک تاوان بیتگ، اُرش ءَ زورگریں پوج ءِ چار کارندہ مرتگ ءُ بازین ئِے سک ٹپی بیتگ اَنت-

ھمے وڑ بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ مئے سرمچاراں بولان ءَ بی بی نانی ھند سر ءَ پوج ءِ بُنجل ءُ چاگی ءَ پولیس چوکی دستی بمباں چہ نشانگ کتگ اَنت-

جارکش ءَ گوشتگ بلوچستان لبریشن فرنٹ ءِ سرمچاراں دہ دسمبر ءِ شپ ھشت ءَ بولان ءَ بی بی نانی ھند سر ءَ ایف سی بُنجل سر ءَ دوئیں نیمگاں چہ نوکیں ءُ مزنیں سلاھاں چہ اُرش کتگ، اُرش ءَ آر پی جی گولہ بُنجل ءِ تہ ءَ نشانگ ءَ کپتگ چریشی ءِ آسر ءَ بُنجل ءَ آس چست بیتگ، اے اُرش ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گوشتگ کہ دومی کاروائی ءَ سرمچاراں ھپت دسمبر ءِ شپ نُھ نیم ءِ نزیک ءَ چاگی بازار ءَ برجاہ پولیس چیک پوسٹ سر ءَ دستی بمب چہ اُرش کتگ کہ چوکی ءِ تہ ءَ کپتگ چریشی ءِ آسر پولیس گاڑی ءُ چیک پوسٹ ءَ تاوان رس اِتگ-

گُڈی ءَ دوئیں گلاں اُرشانی زمہ واری منّ اِتگ ءُ گوشتگ دانکہ مئے اُرش بلوچستان ءِ وتواجھی ءَ تاں برجاہ بنت-