ڈاکٹر ماہ رنگ بلوچ ءَ ایمان مزاری ءُ ھادی علی چٹھہ ءِ گون ءَ ھمکوپگی ءِ درشان، بے بنیں بھتامانی ھلاس کنگ ءِ لوٹ

بلوچ یکجھتی کمیٹی ءِ بندیگیں سروک ڈاکٹر ماہ رنگ بلوچ ءَ گوشتگ من ایمان مزاری ءُ ھادی علی چٹھہ ءِ گون ءَ انساپ، انسانی ھک ءُ ھمک انسان ءِ شرپ ءِ جد ءُ جھد ءَ یکجاھی ءِ ھواری ءَ ھمکوپگ آں – آئی ءِ ھمت ءُ جد ءُ جھد ءِ سر ءَ بے توار بوگی نہ انت-

ڈاکٹر ماہ رنگ بلوچ ءَ گوشتگ آجوئی ءِ وڑیں لیکھانی درشان کنگ بنکی ھک چہ آیاں پچگرگ بیتگ، ھمے وڑ ریاستی ادارھانی نیمگ ءَ بیوکیں زوراکیانی پُرکنگ ءَ ابید نوآبادیاتی وھد ءِ رھبندانی باسکاں بے توار کنگ ءِ واستا کارمرد بوگ ءَ انت-

ڈاکٹر ماہ رنگ بلوچ ءَ گوشتگ چہ بازیں سالاں ایمان ءُ ھادی انسانی ھکانی وکالت ءَ چہ درستاں دیم ءَ انت – چیرتراتکگیں تواراں دیم ءَ آرگ ءَ انت ءُ ھر وڑیں دروشمانی نا انساپی ءُ زُلمانی ھلاپ ءَ توار چِست کنگ ءَ انت – آیانی ھلاپ ءَ وتگڑیں ارزی، ریاست ءِ زوراکیاں پاشک کنت – ءُ اے گپ ءَ راستی ءَ پدر کنت کہ انساپ ءِ نزام کجام کساس ءَ سُبکی ءَ ھما مردمانی ھلاپ ءَ کارمرد کنگ بیت چُشکہ انسانی بنکی ھکانی پھریزی ءَ کنگ ءَ انت-

ڈاکٹر ماہ رنگ بلوچ ءَ گوشتگ من میان اُستمانی برادری ءَ کڈن کن آں کہ آ ایمان ءُ ھادی ءِ پھریزگ ءَ ستکی کنگ ءَ آیانی سر ءَ جتگیں دراھیں بے بنیں بھتاماں سرجمی ءَ واتر بہ کنائین ایت ساپ ءُ پلگاریں رنگے ءَ کانودی دروشم ءِ لوٹ ءَ بہ کنت- کانود ءِ کارمرد زوراکی ءِ زور ءِ رنگ ءَ ھلاس کنگ بہ بیت باج انساپ ءِ بہ بیت-