سگَار مئے ھمّت ھوسلہ ءُ رُژنائی ءِ مانزمان
نبشتہ کار: شیھک بلوچ
دی بلوچستان پوسٹ
انچُش گُش اَنت کہ ماں دُگنیا ءَ لھتیں مردُم وھد ءِ چمدار نہ بنت بلکیں آ وت وھد ءُ جاوراں بزانت دے اَنت ءُ مَٹّ کن اَنت سگار جان ھما مردُماں چے یکّے اَت۔
یک انچیں مُساپرے اَت کہ وتی ٹھک ءُ بچکندگ ئِے سِلاہ جوڑ کُرتگ اِت اَنت ءُ زِند ءِ تھاریانی تہ ءَ رُژنائی شِنگ کنان اَت۔
آئی ءِ کندگانی تہ ءَ اجب رنگیں کششے مان اَت انچُش کہ سُھب ءِ لٹّ ءَ چہ کوھ ءِ شم ءَ روچ ءِ رُژنائی تالان بوان بیت۔
آئی ءَ وتی ھمدلیں سنگت مُدام ھوسلہ دات ءُ مُھکم کُرت اَنت دمبُرتگیں بیلی بگل گیر کُرت اَنت ھمّت دات اَنت ءُ وتی کردار ءَ چے پیشدارگ ءِ جُھد ءَ اَت کہ ھرچیز بوت کنت زالِم ءُ زوراک ھرچند توانگر ءُ مُھکم بہ بیت ما آئی ءَ سرین پروش کُت کن ایں۔
آ یک شوکیں اِلم دوستیں مردُمے اَت جنگی ھُنر سیاسی چالاکی ءُ میان استمانی جدید جنگی ٹکنیکاں پوہ اَت ءُ راہ ءُ رھبندانی پابندیں سرمچارے اَت۔
اے راستے کہ مردم وتی مھراں وت گیش کنت ھمے مھرانی گیشی اِنت، مردم پہ مدامی گپ ءُ دیوان، ٹھک ءُ ھیالانی تہ ءَ گیر کیت. سگار جان ءِ مھروانی اِنت مئے نیام ءَ ساہ زورگ ءَ اِنت. آئی ءَ ھمُک دیوان ءِ تہ ءَ وتی اھلاک مِھر ءُ دوستی وشروھی انچیں رنگے ءَ درشان کُرت کہ ھمُک سنگت ءِ دل ءَ جاہ ئِے کُرتگ اَت سگار سنگتانی تب ءِ دارَگ ءَ زَبر اَت۔
آئی ءِ شھادت ءَ مارا گمیگ وَ الّم کُرت بلے مئے دلانی تہ ءَ رُژنائی یے بکشات. آئی ءِ کردار ءُ سوج داتگیں پنتاں بازیں سنگتے مُھکم ءُ شیوار جوڑ کُرتگ۔
وھدے ڈرون سنگتانی سر ءَ ارُش کنت گُڑا سگار جان سنگتانی پہ ھپازت در کنَگ ءَ سوبمند بیت ءُ سنگتان ءَ گُش ایت کہ شُما وت ءَ را کش اِت من گوں زمینی پوج ءَ جنگ دیَاں. سگار جان جنگ دیَان ءَ گوں برمش جان ءَ ھوار دُشمن ءِ دیم ءَ چو کوہ ءَ مِک بیت ءُ داں وتی گُڈّی شھیدی ءِ واھِشت ءَ پیلو کنت-
وتی مرگ ءِ گچین کنگ یک سرمچارے ءَ را آزات کنت. سرمچارے ءِ ھمے مرگ ءِ درچنگ دوستی ءِ پدّراھی ءَ کنت کہ اے مرگ پہ دژمن ءَ ناں بلکیں باندات ءِ وشھال کنگ ءُ راج ءِ زندگ دارگ ءِ واست ءَ اِنت. سرمچارے ءِ مرگ ءِ گچین کنگ شاھدی دنت کہ گلامیں راج ءِ گلامیں زندے گوازینگ ءَ شرپداریں مرگ گھتر اِنت. ھمے سرمچارانی شھادت آجوئی جھد ءَ زندگ دار اَنت ءُ آھاں مِنزل ءَ سر کن اَنت۔
بلوچ راج چہ اے گپ ءَ پراموش مہ بیت، شھید ھما اَنت کہ وت ءَ را پہ راج ءُ گلزمین ءَ ندر کرتگ. انوں ھستیں وھد آیانی واھگ ءُ جھد ءَ مِنزل ءَ سر کنگ ءَ اِنت. آیاں تھنا یات کنگ ءَ چے شھیدانی ارواہ آسودگ نہ بنت. آیانی پلسپہ ءِ سر ءَ روگ، جھد ءِ دیم ءَ برگ، آیانی پگر ءُ آزادی ءِ واباں پراہ ءُ شاھیگان کنگی اِنت آیانی کرد ءِ گون ءَ انساپ بیت۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-