بلوچ اسٹوڈنٹس آرگنائزیشن آزاد ءِ گوستگیں سرکماش ابرم بلوچ ءَ وتی شنگ کتگیں درشان ءَ گوشتگ کہ بلوچ نودربرانی نیزور کنگ ءَ ریاست ءَ ٹوھیں پندل ساز اتگ انت بلے اے جیڑہ ءُ جنجالاں ابید ھم بلوچ ورنایانی سیاست دیم پہ منزل ءَ جنزان انت-
آئی ءَ گوشتگ بلوچ نودربر سیاست بلوچ راجی جنز ءِ یک پُرارزشتداریں بہرے۔ بلوچ راجی جنز ءِ گیشتریں کیڈر چہ نودربر سیاست ءَ پیداک بوتگ اَنت ءُ انگت ءَ داں بوگ ءَ اَنت۔ اِشی ءِ پُرارزشت بوگ ءِ سوْب ” بلوچ راجی آجوئی ” ءِ مکسد اِنت۔ بلوچ نودربر سیاست ءَ بلوچ اِستان ءِ جوڑشت سازی(اسٹیٹ فارمیشن پروسز)ءِ کرد پیلو کنگ ءَ بازیں بودناکی ھست، بلے ھمے بودشت ءُ بودناکی وڑے نہ وڑے دارگ بوتگ اَنت، ھمے سبب ءَ بلوچ نودربرانی تہ ءَ کجام وڑیں کردے پیلو کنگ ءِ بودشت ھست بلے آ بودناکیں کردے پیلو کت کنگ ءَ نہ اَنت۔ اشی ءِ مزنیں سبب نوآبادیاتی نفسیات ءُ رواج اَنت کہ زیکیں روچ ءَ دانستہ یا غیر دانستہ بی ایس او ءِ تہ ءَ جاہ دیگ بوتگ اَنت ءُ روچء مروچی ھمے چیزانی کسان ءُ مزنیں سان ھست اَنت۔
ابرم بلوچ ءَ گوشتگ کہ بلوچ نودربر وھدے گوں نودربر سیاست ءَ ھوار کپتگ گڑا آئی ءَ پشت ءَ وتی لوگ، مات ءُ پت، ذاتی زند ءُ واہشتاں ہوار کل چیز یلہ کُتگ اَنت ءُ وتی ھرچ چیز ھمے جہد ءِ نام ءَ کُتگ۔ بلے باز وھد ءَ ھمے نودربر ءِ بودشت مُدام گوں اگدہ ءِ کلچر، ذاتی مفاد، گروہی کلچر ءَ گیشتر برباد کنگ بوتگ اَنت۔ ھمے نودربر پہ راجی آجوئی ءِ عظیمیں مکسد ءَ وتی ساہ ءِ سر گوزگ ءَ جاڈی بوتگ اَنت، وتی ھرچ چیز ءِ کربان کنگ ءَ ساجو بوتگ انت بلے نوآبادیاتی نفسیات ءُ رواجانی پیداک کتگیں چاگرد ءَ ھمے نودربر ءَ ھما جاہ ءَ سر کتگ کہ آ نودربر ھمے دابیں رد آشوبی کلچر ءِ آماچ بوتگ انت ءُ وتی سرجمیں بودشت ئِے ھمے کلچر ءِ تہ ءَ زوال کتگ اَنت۔ بزاں وھدے ھما نودربر راجی آجوئی ءِ مکسد ءَ وتی ساہ ءُ سر ءِ کربان کنگ ءَ جاڈی بوتگ انت بلے ھمے نودربر پہ اگدہ، گروہی مفادات یا ذاتی زد ءُ انا ءَ وت ءَ جہد ءَ چہ یک کش کن انت، یا وتی سرجمیں بودناکی ءَ یک “اگدہے” ءِ پشت ءَ ببا دیے اَنت بلے آ نہ زانت کہ آ وت وتی بودشتاں زوال کنگ ءَ اِنت۔ پرچا کہ آ پہ ہما مکسد ءَ جہد ءَ ھوار بوتگ بلے آ مکسد پشکپگ ءَ اِنت۔
آئی ءَ گوشتگ نوآبادیاتی نفسیات ءُ رواجاں مئے سیاسی چاگرد انچوش زدگ کُتگ کہ ھمے نودربر کسان کسانیں جیڑہانی بنیاد ءَ وتی بودشتاں تنظیم ءِ تہ ءَ وتی جندءِ سنگت ءِ ھلاپ ءَ ببا داتگ انت۔ ھمے ردآشوبی چاگرد ءِ آماچیں نودربراں ھمے داب ءَ وتی سرجمیں زور وتی جند ءِ سنگت ءِ ھلاپ ءَ ھرچ کتگ کہ آہاں اے نیام ءَ دژمن بیھال کتگ، بزانکہ کجام بودشت دژمن ءِ ھلاپ ءَ ھرچ کنگی بوتگ اَنت بلے آیاں اے بودشت وتی جند ءِ سنگت ءِ ھلاپ ءَ ھرچ کتگ انت۔ ھمے ردیں چاگرد ءِ سان ھمے داب ءَ مھکم بوتگ اَنت کہ نودربرانی گیشتر وھد ءُ بودناکی وت ماں وتی اڑ ءُ جنجالاں گوستگ اَنت۔اگاں ھمے ردیں چاگرد مہ بوتیں گڑا بہ گندئے نودربرانی سرجمیں بودناکی ” بلوچ اسٹیٹ فارمیشن پروسز ” ءِ تہ ءَ ھرچ بوتگ ات۔ راجی آجوئی ءِ جہد ءِ لوٹ ھم ھمیش اِنت کہ نودربر وتی سد در سد بود ءُ بادشتاں راجی آجوئی ءِ سیاست ءُ جنگ ءِ پلہ مرزی ءُ سما ءُ سنچ ءِ ودی کنگ ءَ کارمرز بہ کن اَنت بلے نوآبادیاتی چاگرد ءَ نودربرانی ھمے سکگ ءُ دربرگ ءِ وھد کسان کسانیں جیڑہاں گوں زوال بوتگ انت۔ وھدے نودربر ھمے چاگرد ءَ وتی جہد ءِ شرتریں وھد(بزاں ھمے وھد ءَ آئی ءِ بازیں چیز سکگ ءُ دربرگی اَنت ءُ دیم ءَ ھمے صلاحیت جنز ءَ را دیگی انت) ءَ زوال کنت گڑا باندا نودربر سیاست ءِ ھلاسی ءَ رند زانگ بیت کہ ما وتی وھد چنچو زوال کتگ۔ نوں ھما وڑ راجی جنز ءَ کرد پہلو کنگ ءِ زلورت بیت گڑا آ مزنیں کردے پیلو کت نہ کن انت۔ بزاں ھما بود ءُ لائکی ءِ راجی جُنز لوٹ ءَ کنت آ لوٹاں سرجم کت نہ کن اَنت۔
آئی ءَ گوشتگ بی ایس او بلوچ آجوئی ءِ جنز ءِ نرسری اِنت، بی ایس او ءِ زمہ واری پہ بلوچ آجوئی ءَ بودناکیں ءُ لائکیں ورنا پیداک کنگ اِنت دانکہ ھمے ورنا بلوچ راجی آجوئی ءِ جنز ءُ اسٹیٹ فارمیشن پروسز ءِ تہ ءَ وتی مزنیں کردے پیلو بہ کن اَنت۔ بلے اگاں ھمے ورنا کالونیل نفسیات ءُ روایتانی آماچ بنت ءُ وتی سوچ ءُ پگر ءَ یک کالبے ءَ بند کن اَنت گڑا بزاں آہانی سرجمیں جیڑگ، سرجمیں صلاحیت بس اُگدہ کلچر، ذاتی مفاد، گروہی کلچر ءِ پشت ءَ زوال انت گڑا ھمے ورنا سرجمیں جہد ءُ سرجمیں مکسد ءَ تہنا ھمے سرپد بنت بزاں آہانی ھاترءَ اے جیڑہ زند ءُ مرگ ءِ جیڑہ بنت، آ اے گپ ءِ جند ءَ سرپد نہ بنت کہ بی ایس او بلوچ آجوئی ءِ جنز ءِ نرسری اِنت، بی ایس او ءِ بلوچ آجوئی ءِ جنز ءِ ھیلکاری ءِ پتر اِنت۔ بی ایس او آجوئی ءِ جنز ءَ باسما ءُ باصلاحیتیں جھدکار پیداک کنت۔ بی ایس او ءِ پیداک کتگیں ورنا بلوچ آجوئی ءِ جنز ءُ بلوچ اسٹیٹ فارمیشن پروسز ءَ وتی مزنیں کردے پیلو کن اَنت۔ بلے کجام ھم نودربر بی ایس او ءِ ھمے کرد ءَ سرپد نہ بوتگ گڑا آ ھمے دابیں کسان کسانیں جیڑہانی آماچ بوتگ انت، آ ھمے سرپد بوتگ انت کہ سرجمیں جہد ءُ مکسد “اگدہ گرگ” اِنت یا سرجمیں زند ھمے گروہی کلچر ءِ تہ ءَ گوازینگی اِنت، اے سوچ ءُ پگر ءِ واہندیں ورنا نہ تہنا وت ءَ زوال کن اَنت بہ گندئے وتی پند ءُ مھنت، مخلصی ءُ صلاحیتاں گوں ھم زُلم کن اَنت۔ پمیشکہ بی ایس او ءِ ھرچ سنگت ءَ بندات ءَ چہ بی ایس او ءِ گواچن ءُ راستیں کرد ءِ جند سرپد بوگی اِنت کہ بی ایس او ءِ کرد چی اِنت ءُ من پرچا بی ایس او ءِ بہر بوتگاں؟ اگاں ھمے بُنکی چیزاں سرپد بیت گڑا آ سنگت ھچ وڑیں جیڑہ ءُ جنجالانی آماچ نہ بیت۔
آئی ءَ گوشتگ من سرپد باں ھمے نوآبادیاتی نفسیات ءُ روایاتانی سان ءِ ھلاس کنگ ءَ بی ایس او ءِ سنگتاں اے جُستانی سرءَ تران ءُ باوستے بندات کنگ لوٹیت۔ ھستیں وھد ءَ بلوچ آجوئی ءِ جنگ ءُ اسٹیٹ فارمیشن پروسز ءِ ھاتر ءَ بلوچ نودربرانی کجام صلاحیت درکار اَنت؟ بلوچ نودربر ءُ ورناہاں بلوچ اِستان جوڑ کنگ ءِ عمل ءِ تہ ءَ کجام زمہ واری وتی کوپگاں زورگی اَنت؟ آکجام جیڑہ ءُ رواج اَنت کہ بلوچ نودربراں آجوئی ءِ گہگیری ءِ تہ ءَ وتی سرجمیں کردے پیلو کنگ ءَ چہ دارگ ءَ اِنت ءُ آ کجام رواج اَنت کہ آیاں بلوچ نودربر کسان کسانیں جیڑہاں گوں دست گٹ کتگ اَنت؟ اگاں بی ایس او وتی اندر ءَ ھمے باوست ءَ ودی کنت گڑا بہ گندئے بلوچ ورنا راجی آجوئی ءِ جنز ءَ چہ مروچی ءَ باندا گیشتر توانا تریں کردے پیلو کن اَنت ءُ زلورت ھم ھمے چیز ءِ ھست انت کہ بلوچ ورنا گیش ءَ چہ گیش وتی توانا تریں کردے پیلو بہ کن اَنت۔ اگاں اے جیڑہ ءِ سر ءَ انوں گپ ءُ تران مہ بیت گڑا روچ گوزان بنت ءُ اِشی ءِ تاوان ھم گیش بوان بنت۔
ابرم بلوچ ءَ گوشتگ بی ایس او ءِ سنگتاں نوآبادیاتی نفسیات ءُ گوست ءِ ردیں رواجانی سرجم ءَ ھلاس کنگ ءَ “نوکیں دورءِ زلورت ءُ بلوچ اسٹیٹ فارمیشن پروسز ءَ نودربر ءِ زمہ واری” ءِ ھیال ءِ بنیاد ءَ نوکیں شوربندی (حکمت علمی) ٹہینگ ءِ زلورت انت۔ اے شوربندی ءِ تہ ءَ ھرچ ورنا بی ایس او ءِ بہر بیت آئی ءَ ھما بنداتی روچ ءَ چہ آئی ءِ زمہ واری گُشگ بہ بیت کہ تو بلوچ راجی آجوئی جنز ءُ بلوچ اسٹیٹ فارمیشن پروسز ءَ اے داب ءَ وتی کرد ءَ پیلو بہ کن۔ اگاں بنداتی روچ ءَ چہ نودربراں آہانی زمہ واری گشگ بنت گڑا آ عمل ءِ بھر کنگ بنت ءُ آ وت ردیں روایاتی آماچ نہ بنت، آ وتی بودشتاں پہ یک اگدہے ءِ پشت ءَ ھرچ نہ کن اَنت، آ وتی وھد ءَ پہ کسان کسانیں جیڑہاں گوں زوال نہ کن اَنت، آ وتی بودشتاں وتی جند ءِ سنگت ءِ ھلاپ ءَ ھرچ نہ کن انت، آ ذاتی مفاد ءُ گروہی کلچر ءِ آماچ نہ بنت ءُ آہانی سرءَ نوآبادیاتی نفسیات وتی سان ءَ دور دات نہ کنت۔ پرچا کہ کجام نودربر بنداتی روچ ءَ اے گپ ءِ بابت ءَ تچک بیت کہ من ءَ آجوئی ءِ جنگ ءَ چے پیمیں کردے پیلو کنگی اِنت گڑا آ وتی سرجمیں زور ءُ وس ءُ واک ءَ تنظیم ءِ نیمگ ءَ رستگیں پروگرام ءِ سرءَ دنت ءُ ھما پروگرام ءِ تہ ءَ وتی صلاحیتءَے ھرچ کنت۔ مروچی بی ایس او بہ گندئے گوست ءِ سان ءَ چہ مزنیں کچےءَ آزات اِنت بلے وڑے نہ وڑے ءَ اے سان ساڈی اَنت ءُ اِشانی سرجم ءَ ولگوج کنگ ءُ نودربر ءِ کرد ءَ گوں انساپ کنگ ءَ بی ایس او ءَ نودربراں ھمے دابیں نوکیں پروگرام دیگ ءِ زلورت انت۔
آئی ءَ گوشتگ مئے امیت ءُ یقین گوں ھمے گپ ءَ بندوک اِنت کہ بی ایس او ءِ سنگت بلوچ نودربرانی نیام ءَ سرجم ءَ ھمے دابیں چاگردے جوڈ کنگ ءَ سوبمند بنت کہ ھرچ یک بلوچ نودربرے بلوچ آجوئی ءِ جنگ ءُ بلوچ ریاست ءِ جوڑشت سازی ” ءِعمل ءِ تہ ءَ نوکیں دور ءِ زلورتانی ھساب ءَ وتی بودشتاں گیش ھرچ کنت۔