زورانسری بیگواھیں بلوچ زالبول
ٹی بی پی شونگال
بلوچستان ءَ ریاستی زوراکیانی ویل روچ پہ روچ گیشتر سنگین بیان انت-بلوچ رھشون ڈاکٹر ماھرنگ بلوچ گوں ھمراھاں بازیں ماھاں بندیگ انت ءُ بلوچ نودربر ماہ جبین بلوچ ءِ زورانسری بیگواھی ءَ شش ماہ گوستگ – ھمے وڑ چہ جب چوکی ءِ شھر ءَ آواران ءِ جھمنندیں کسان سالیں جنک نسرینہ بلوچ چہ وتی لوگ ءَ یک ھپتگے ءَ پیش زورانسری بیگواہ کنگ بیتگ، ءُ ھائبرڈ سرکار گھگیری سیاست ءَ پرکاریں بلوچ زالبولانی ناماں فورتھ شیڈول ءَ ھوار کنگ آیانی پرکاریاں بندش جنگ ءَ اِنت-
بلوچستان ءَ ریاستی زوراکیانی ھلاپ ءَ درستاں گیش پرکار تِریں زور بلوچ زالبول انت – ورنائیں سیاسی باسکانی دزگیری کوش ءُ ھزارانی کچ ءَ زورانسری بیگواھی، چُشکہ ریاستی بندشاں ابید بلوچستان ءَ اُلس ءِ گھگیری سیاست کنگ ءَ بلوچ زالبولانی جوانیں کِردے ھست انت- پاکستان ءِ مزنیں واکدار تھنا بلوچ زالبولانی ھمے راجی ءُ سیاسی کردار ءِ پروشگ ءَ نا ایوک ءَ آیاں بندیگ کنگ ءَ انت بلکیں آیانی زورانسری بیگواہ کنگ ءَ ھم وتی دستاں دارگ ءَ نہ انت-
بلوچ زالبولانی جد ءُ جھد ءَ بلوچ راج ءَ سیاسی دروشم ءَ مھکم کنگ ءَ انت ءُ ریاستی زوراکیاں دنیا ءِ دیم ءَ ھم شنگ ءُ تالان کنگ ءَ انت- یورپی یونین ءِ سفیر ریونڈاس کاروبلس ءَ پاکستان ءِ واستا جی ایس پی پلس اسکیم ءَ زورانسری بیگواھیانی دیم ءَ برگ ءَ ھوار کنگ ءِ جار جتگ، ءُ اے درگت ءَ یورپی یونین ءَ چہ پاکستان ءَ یکشل ءَ زھر ءِ درشان کتگ، اے گپ پدر کنت کہ دنیا پاکستان ءَ زورانسری بیگواھی ءِ سنگینیں جیڑہ ءَ سرپد انت، ءُ اے سرپدی بلوچ زالبولانی دراجین ءُ یکشلیں جد ءُ جھد ءَ سرجم بیتگ-
پاکستان ءَ کانون ءِ رھبند ءِ گرگ ءَ ابید ریاستی مزن واکداری ءَ اوشتاتگ انت کہ تاکت ءِ زور ءَ زیردستیں مھلوک ءُ راج ءِ سر ءَ وتی پیسلہ ءَ مُشگ ءَ انت- پاکستان ءَ ھائبرڈ نزامیں سرکار بلوچ زالبولانی جد ءُ جھد ءَ ترس آماچ انت ءُ بلوچ گھگیری سیاست ءِ راہ ءِ دارگ ءِ واستا زالبولاں زورانسری بیگواھیاں یک سیاسی سِلاھے ءِ رنگ ءَ کارمرد کنگ ءَ انت-