نوکاپ لبزانکی مجلس ءِ اِمبری داد دیوان 23 نومبر 2025 ءَ بلوچی زبان ءِ کواس ءُ شائر اسحاق خاموش ءِ شرف ءَ ماں بلوچ ویلفیئر سوسائٹی فقیر کالونی کراچی ءَ برجم دارگ بوتگ ۔ اے دیوان ءِ گچینی مھمان اسحاق خاموش ءُ سرمستر مسکان مجید بوتگ انت ۔ اے دیوان ءِ دو بھر بوتگ کہ آئی ءِ اولی بھر گُشتانکی ءُ دومی بھر شئر ءُ شائری بوتگ ۔ دیوان ءِ اولی بھر ءِ جارچین بختاور امیر ءُ دومی بھر ءِ شعیب رحیم بوتگ ۔
دیوان ءِ اولی بھر ءَ میر ساغر رحمان ءُ غلام رسول کلمتی ءَ اسحاق خاموش ءِ شائری ءُ لبزانکی کارانی سرا ءَ تْران کُتگ۔ میر ساغر رحمان ءَ اسحاق خاموش ءِ شائری ءِ سرا تْران کنان ءَ گُشتگ کہ اسحاق شائری ءِ کبیلہ ءِ ھما مردمان اِنت که مارشتانی زبان ءَ سرپد اِنت، پدا شائری ءِ بُنگپ ھم اَنچیں اَزیت ناکیں لبزاں گوں گْرنچ دَیگ بیتگ که آئی ءِ اَندر ءَ بید ء اَندوه ءُ مارشتاں دگه ھچ چیز جاگه کُت نه کنت۔
آئی ءَ گوشتگ کہ بُن اَسل ءَ اسحاق ءِ شئیری درشان گیشتر دستونک اِنت، البت درمیان ءَ چندیں لچّهے ھم پِربستگ، بلئے چوش که غزل آئی ءِ شُناس ءِ بھرے جوڑ بوتگ، لچّه آ رنگ ءَ آئی ءِ ٹَپّانی درمان نه بیتگ ۔
ھمے رنگ ءَ غلام رسول کلمتی ءَ وتی ھیال درشان کنان گوشتگ کہ اسحاق خاموش ماں بلوچ راجمان ءَ گیشتر په شائری ءَ نامدار اِنت۔ شائری راجانی مزنیں مَڈّیاں ھساب کَنگ بیت، په زبان ءِ پْراه پَھناتی ءَ شائری چه زِند ءِ مستِریں لوٹاں یکے۔ شائری لبزاں سَمبھینیت ءُ زبان ءِ تک ءُ پَھناتاں پْراه تِر کنت۔ زبان ءِ گلستان ءَ شائری پُلانی پیم ءَ اِنت۔ ھَمُک شائر ءِ شائری ءِ وتی یک رنگے، چه ھمے رنگ ءَ اسحاق ءِ شائری ءِ جتائیں رنگے۔
اولی بَھر ءِ گُڈسر ءَ دیوان ءِ سرمستر مسکان مجید ءَ دیوان ءَ ساڑی ئیں مردمانی مِنّت گپتگ ءُدیوان ءِ اولی بھر ءِ ھلاسی ءَ رند یک کسانیں ساز ءُ زیملی بَھرے ٹَھینگ بوتگ کہ اِشی ءِ تہ ءَ بشیر حیات، ناصر ءُ شئے نضرت ءَ وتی اِزم ءَ گوں دیوان وش کُتگ ۔
دیوان ءِ دومی بھر ءِ ھاسیں مھمان اسحاق خاموش ءُ حسن علی حسن بوتگ انت ءُ سرمستر ظفر کریم بوتگ ۔
شئیر ءُ شائری ءِ بھر ءَ مُحب بسمل، جام پکیر، امتیاز کمال، سمین غلام، کامران حیدر، جاسب جهان، سیدمحمد فقیر، یاسر کریم، ملناز منیر، سهیل میرانی، رحمان آزگ، بشیر بشارت، سرور آدم، عیسیٰ بلوچ، میر ساغر رحمان، حسن علی حسن، اسحاق خاموش ءُ ظفر کریم ءَ وتی شئیر ونتگ انت ءُ دیوان وشنود کتگ ۔