تربت ءُ مستونگ ءَ پاکستانی پوج ءِ سر ءَ بیتگیں اُرشانی زمہ واری بی ایل اے ءَ منّ اِتگ اَنت

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں تربت ءُ مستونگ ءَ دو جتاجتائیں کاروائیاں زورگریں پاکستانی پوج ءُ مڈی بروکیں گاڑی اُرشانی نشانگ کتگ اَنت-

جارکش ءَ گْوشتگ کہ بلوچ لبریشن آرمی ءِ سرمچاراں گوستگیں روچ ءَ تربت ءِ دمگ میری بگ ءَ زورگریں پاکستانی پوج ءِ بُنجل یک اُرشے ءَ نشانگ کتگ، سرمچاراں زورگریں لشکر ءِ بُنجل سر ءَ بازیں راکٹ گولھے آس داتگ کہ گوں سوبمندی ءَ چہ وتی نشانگ ءَ لگ اِتگ اَنت-

جارکش ءَ گوشتگ کہ راکٹ ءِ لگگ ءَ چہ زورگریں پوج ءِ بُنجل ءَ اوشتوکیں گاڑی ءَ آس چست بیتگ وھدے کہ اُرش ءِ آسر ءَ زورگریں پوج ءِ دو کارندہ مرتگ ءُ کم چہ کم چار ٹپی بیتگ اَنت-

جارکش ءَ دیمتر ءَ گوشتگ اے میان ءَ سرمچارانی دگہ یک ٹولی ءَ شھدگ بستگ پٹ ءُ پول برجاہ داشتگ-

جارکش ءَ گوشتگ کہ بلوچ لبریشن آرمی ءِ سرمچاراں سے شمبے ءِ روچ ءَ ژلی ءِ ھند سر ءَ مڈی بروکیں یک بوزر گاڑی یے نشانگ کتگ، سرمچاراں تیرگواری ءَ کتگ تاوان داتگ-

جارکش ءَ گُڈی ءَ گوشتگ کہ بلوچ لبریشن آرمی ءَ اے اُرشانی زمہ واری منّ اِتگ اَنت-