گال ءُ لبز چوں مانا دیگ بنت؟
نبشتہ کار: شاھد اھمد
دی بلوچستان پوسٹ
انچیں گال ءُ لبز ھست انت کہ تنیگتا جْوانی ءَ کارمرز بوگ ءَ نہ اَنت گڑا ما چے بکنیں؟
چوناھا گال ءُ لبز ھما وھد ءَ بے مانا بنت وھدے تو گال ءُ لبزاں کارمرز مہ کن ئے، ءُ دگر ئے گُشتگیں گپ ءُ نبشتانکانی سر ءَ جوک ءَ ءُ وت ءَ یکشل ءَ ھمے وڑ بہ گوازین ئے گڑا ناں تو بلکیں کسے بہ بیت آ وت ءَ جْوانی ءَ زندے دات کُت نہ کنت۔ چمیشکا مرچی من اے گپانی پد ءَ وت ءَ یکبرے جُست اوں گپتگ پد ءَ جیڑ اِت کہ گڑا اے گپاں الم ترا اوں بگوش آن گوں۔
ما کُل اے گپ ءَ ناآشنا نہ اِیں کہ انسان گوں زبان ءَ ودی بوتگ ءُ زندگی کنگ ءَ اِنت بلے انسان ءَ اے تنیگتا نہ پھم اِتگ کہ منی ھر ردی یے زمہ وار وت بوتگاں ءُ کسے ءَ وت ءَ جوانی ءَ پول اِتگ ءُ جُنزان انت ءُ اگاں کسے ءَ نہ پول اِتگ گڑا وت ءَ بچار اِیت۔ من اد ءَ یک مردمے ءِ گپ ءَ نہ کنگ ءَ آں ما دراھیں انسان اِیں۔ ءُ انسان بیدے زبان ءَ ناں تھنا وت ءَ بلکیں ھچ چیز ءَ مانا دات کُت نہ کنت۔ چہ زبان ءِ کارمرز کنگ ءَ بنیادم دیمروی ءِ نیمگ ءَ جُنزان بیت، انسان گوں زباناں زندگی کنگ ءَ اِنت ءُ جُنزان اِنت۔
یک راجے ءِ زبان چوں ھلاس بیت اِنت؟ ھر رنگیں انسانے ءَ وت ءَ زبانے گون اِنت ءُ ھر ھما زبان ءَ کہ مردم گپ کنت آ الم زانگ بیت کہ آ چونیں زبانے ءِ بندوکیں انسانے۔
ھر راجے ءِ زگریں رنگ گوں آئی ءِ زبان ءَ بندوک اِنت، زبان ءَ زندگیں مردم گپ کنت، ءُ زندگیں راجے ءِ مستریں پجّار آئی ءِ ھمے زبان اِنت وت ءَ رکینت کُت کنت، زبان ءِ مانا کنگ لبز ءُ گالانی کارمرز کنگ اِنت۔ ھما لبز گیشتر کارمرز بیت آ زندگ بیت۔ ءُ اگاں آ وتی گُشتگیں زمانگ ءِ گالاں بہ شموش اِیت، ءُ آئی ءِ سر ءَ درآمدیں گال ءُ لبز سان دَور بدنت ءُ کامرز کنگ مہ بنت گڑا آ زگریں گال میزان میزان ءَ وتی شکل ءُ دروشماں بیگواہ کنت۔ گار بوتگیں گالاں امنچو کارمرز بکن ئے گڑا وتی آیُکیں راجے ءِ پدریچ ءَ رکینت کُت کن ئے۔ ھما جاگہ ءِ نندوکیں مھلوکانی چپ ءُ چاگردیں ھر چیزانی سر ءَ وت ءَ سانمند اگاں مہ کن ئے ءُ دری چیز ءُ مردمانی گال ءُ گپتارانی سر ءَ وت ءَ بندیگ بکن ئے گڑا الم مُرتگ ئے۔ مِرگ تھنا انسان ءِ ساہ ءِ بوگ نہ اِنت بلکیں ساہ ءِ بوگ ھم جْوانی ءَ زندگ بوگ ءِ ھاتر ءَ ساہ کشّ اِت مہ کن ئے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-