بیا بلوچاں رکین اِیں
نبشتہ کار: شَکل بلوچ
دی بلوچستان پوسٹ
انوں کس ناآشنا نہ اِنت کہ بلوچستان ءَ چُشیں روچے نیست کہ پاکستانی لشکر بلوچستان ءَ روچے بلوچ ءِ جون ءَ ماں جنگل ءُ گیابان دَور دیگ نہ بوگ ءَ اِنت۔ بلوچ روچے نوک نوکیں جیڑھاں گِر ءُ چیل اِنت۔ اے جیڑہ ماں واجہ ھدائی نیمگ ءَ نہ بوگ ءَ انت بلکیں اے چہ زالمیں پوکستانی وتگڑیں لشکر ءِ نیمگ ءَ بلوچ ءِ زند کیامت ءَ چہ گنتر ما تھاریاں دَور ئِے داتگ۔ بلوچ ءِ زند ءِ کجام ھم پِڑ بہ بیت آئی ءِ زند انچو تنگ کُتگ کہ آ چہ وتی زند ءَ بیزار انت بلے ھچبر دژمنیں پوکستانی لشکر ءِ دیم ءَ وتی سر ئِے جھل نہ جَتگ اگاں لھتے وتگڑیں بلوچ کہ ھست اَنت آ وت ءَ سیاسی ءُ سماجی شخصیت پھمگ ءَ انت بلے چہ آیاں بلوچانی نیمگ چُشیں ھچ وڑیں کمک نیست اِنت۔ اے ساھت ءَ مارا تُرس ءِ آماچ بوگی نہ اِنت بلکیں چُشیں ساھتاں مارا بلوچاں یکمُشت ءُ یکجاہ بوگ لوٹ اِیت کہ داں دژمن تُرس ءِ آماچ بہ بیت۔ بلوچ ءَ وتی تاکت، وتی بستار مرچی دگنیا ءَ را پیشدارگ لوٹ اِیت بلوچ یک زندگیں راجے ءُ ھچبر بلوچ وتی سراں کُربان کُت کنت بلے دژمن ءِ دیم ءَ سراں ھجبر جھل نہ جنت۔ انوگیں بلوچ ءِ جیڑہ بلوچ پجّار ئیگ اِنت ءُ بلوچ وت ءَ بہ پھم اِیت ءُ وتی رکینگ ءِ ھاتر ءَ یکمُشت ءُ یکجاہ بوگ ءِ الم زلورت اِنت۔
انوں دژمن گوں وتی رپک ءُ ھُنراں گیشاں چہ گیش بلوچ چُکچینی ءِ ھلاپ ءَ کنگ ءَ اِنت بلے مرچی بلوچ دژمن ءِ اے رپکاں ناآشنا نہ اِنت ھر بلوچے دژمن ءِ ھر یک چـالے ءَ سرپد ءُ پوہ اِنت ءُ آ وتی لاچاری ءِ سبب ءَ ھچ نہ گُشگ ءَ اِنت چی ءَ کہ دژمن ءَ بلوچ ءِ پروشگ ءِ ھاتر ءَ وڑ وڑیں پندل سازگ ءَ اِنت داں کہ بلوچ مالی، مجگی داب ءَ پروش بوارت۔
بلوچ راج مرچی یک انچیں چکاسے ءَ گوزگ ءَ اِنت کہ آ وت ءَ مھکم کنگ ءَ بے آشنا نہ اِنت بلے وھد ءِ ھمراھی ءَ دژمن ءِ ھر رپک ءَ را پھم اِتگ ئِے، چمیشکا بلوچ ءَ وت ءَ یکجاہ بوگی اِنت ءُ دژمن ءَ را وتی زلمانی جواب ھوری ءَ دیگ لوٹ اِیت، ءُ دژمن چٹ ءَ پروش دیگی اِنت اگاں چُش نہ بوت گڑا بلوچ پد ءَ ھپتاد ءُ ھپت سال ءَ گلامی ءِ سانکلاں سُچان بیت اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-