کیچ : بلیدہ ءَ یک لاشے دزکپتگ، لاش ءِ پجار پرائیوٹ اسکول ءِ استاد ءِ نام ءَ زانگ بیتگ

کیچ ءِ دمگ بلیدہ ءَ سلوئی کور ءَ یک ھُشکیں لاشے دزکپتگ۔ دمگی مردمانی ھال دیگ ءِ سر ءَ پولیس لاش جاہ ءَ سر بیتگ ءُ لاش اش چِست کتگ ءُ پہ شناسائی ءُ اژددی چار ءُ تپاس ءِ ھاتر ءَ بلیدہ پولیس ءِ کارگس ءَ برگ بیتگ-

پولیس ءِ رد ءَ چہ لاش ءَ زانگ بیتگ کہ اے لاش سکا کوھنیں لاشے ءُ آئی ءِ ھُشکیں ھڈ اَنت کہ ایشی ءِ سبب ءَ زوتیں پجار کنگ ناسرجمی انت۔ پولیس ءَ گیشیں پٹ ءُ پول بندات کتگ وھدے کہ لاش ءِ پجار کنگ ءَ سرجمیں پجار شناسی بوگ ءَ انت-

دومی نیمگ ءَ بی این ایم ءِ انسانی ھکانی ادارہ پانک ءِ رد ءَ اے لاش ءِ پجار ایاز بلوچ ء مھمد اکبر جھمنند میناز بلیدہ ءِ نام ءَ بیتگ –

پانک ءَ کھول ءِ درور دیان ءَ گوشتگ ایاز بلوچ 12 نومبر 2025 ءَ اسکول ءَ واتر لوگ ءَ آیگ ءَ بیتگ کہ راہ ءَ گمانی رنگ ءَ ڈیتھ اسکواڈ ءِ سلاہ بندیں مردماں آوار جتگ ءُ برتگ-

زانگ بہ بیت بلوچستان ءَ مردمانی لاشانی دزکپگ ءِ درچ یکشل ءَ برجاہ انت ءُ اود ءَ گیشتریں بھتام پاکستانی پوج ءُ چیریں ادارہ ءُ آیانی جوڑ کرتگیں ٹولی کہ لس نام ءَ ڈیتھ اسکواڈ ءِ نام ءَ زانگ بیت انت-