اسلام آباد ءِ مزن آمیدگس ءَ پٹ پولی کمیٹی ھکم داتگ کہ آ سی روچ ءِ تہ ءَ ڈاکٹر ماھرنگ ءِ نام ءَ چہ ایگزٹ کنٹرول (ای سی ایل ) ءَ درکنگ ءِ پیسلہ ءَ بہ کنت ۔ آمیدگس ءَ کانود جوڑ کنوکیں ادارہ ھم گوشتگ انت کہ آمیدگسی ھکمانی پابند بہ بیت ۔
اسلام مزن آمیدگس ءِ چیف جسٹس سرفراز ڈوگر ءَ مھرنگ بلوچ ءِ نام ایل سی ایل ءَ درکنگ ءِ داتگیں درھواست ءِ پیشی جتگ ، درھواست کنوک نیمگ ءَ عطاء اللہ کنڈی پیش بوتگ وھدیکہ اشی ءَ پیسر ایڈوکیٹ ایمان مزاری وکیل بوتگ ۔
سال 2024 ءَ ماھرنگ بلوچ آمریکہ ءَ بوتگیں ٹائم 100 گالا ءَ ھوار بوگ ءِ ھاتر ءَ رؤگ ءَ بوتگ گڑا بالی پٹ ءَ آئی ءَ گوشگ بوتگ کہ آئی ءِ نام ای ایل سی ءَ مان انت آئی ءَ پد آ مدامی وتی وکیلانی ھمراھی ءَ آمیدگس ءَ شتگ ءُ پیش بوتگ ۔
ایڈوکیٹ عطاءاللہ کنڈی ءَ آمیدگس ءَ گوشتگ کہ 7 اکتوبر 2024 ءَ ماھرنگ امریکہ ءِ روگ ءَ دارگ بوتگ ۔ اولسر ءَ آئی ءِ نام پی سی ایل ءُ پد ءَ ای سی ایل ءَ مان کنگ بوتگ ۔ آئی ءَ لوٹ کتگ پٹ پولی کمیٹی وتی داتگیں وھد ءَ پیسلہ کنگ ءِ پابند کنگ بہ بیت ، کہ آمیدگس ءَ من اتگ ءُ کمیٹی ھکم داتگ کہ سی روچ ءِ تہ ءَ پیسلہ بہ کنت ۔
ماھرنگ بلوچ کہ آئی ءِ امر 32 سال انت، 22 مارچ 2025 ءَ چہ آمیدگسی ریمانڈ ءَ انت ۔ آ ھمے الزام ءَ دزگیر کنگ بوتگ کہ آئی ءَ شال سول نادراھجاہ ءَ بوتگیں اُرش ءَ بھر زرتگ ءُ زورانسری آوارجنیانی بگیری ءَ زھرشانیانی میان ءَ پولیس ءِ کریک ڈاؤن ءَ پد مھلوک جزباتی کتگ انت۔
ماھرنگ بلوچ مینٹیننس آف پبلک آرڈر ( ایم پی او) ءِ 3 رد ءَ دزگیر کنگ بوتگ ۔ اے کانود ھنچیں مردماں دزگیر کنگ ءُ بند کنگ ءِ موکل ءَ دنت کہ آ مردمانی نظم و نسق پہ ھترہ زانگ بیت ۔ بندات ءَ آ سی روچ ءَ نزربند کنگ بوتگ پدا گیش کنگ ءُ سے ماہ ءَ ایم پی او ءِ رد ءَ بندیگ کنگ بوتگ ۔
آئی ءَ وتی کار سال 2009 ءَ ھما وھد ءَ بندات کتگ انت کہ آئی ءِ پت عبدالغفار لانگو چہ کراچی ءَ پاکستانی پوج ءَ زورانسری آوار جتگ ءُ بیگواہ کتگ کہ پد ءَ سال 2011 ءَ گڈانی ءَ آئی ءِ ژانگولیں جون دست کپتگ ۔ آئی ءَ پد ماھرنگ بلوچ ءَ زورانسری آواجنی ءُ درکانودی کشت ءُ کوشانی بگیری ءَ بازیں زھرشانی ءُ زرمبشت مھکم کتگ انت کہ آیانی تہ ءَ بلوچ لانگ مارچ 2023 ءُ گوادر 2024 ءَ گوادر ءِ راجی مچی ھوار انت ۔
ماھرنگ بلوچ ھدہ ڈسٹرکٹ جیل ءَ نگیگیں جاواراں بندیگ کنگ بوتگ ۔ آئی ءِ گھار ءِ رد ءَ آ نزور ءُ مجگی زوراکی ءِ آماچ گندگ ءَ اتکگ ءُ آ کانودی وکیلاں گوں ھم دچار کپگ ءَ نہ اشتگ ۔ رپورٹ ءِ رد ءَ ماھرنگ بلوچ ریاست ءِ نیمگ ءَ گوشگ بوتگ کہ ھچ مہ گش ایت ءُ وتی سیاسی سر پراں ھلاس بہ کنت گڑا یل کنگ بیت انت گڑا اے ماھرنگ ءَ نہ من اتگ انت ۔
2025 ءَ آ نوبیل داد ءِ ھاتر ءَ نامینگ ھم بوتگ ۔ آئیب ءَ کساس 241 روچ انت کہ بندیگ انت ءُ اے آئی ءِ دراجتریں بندیگی انت ۔