بلوچستان ءِ جتاجتائیں دمگاں پنچ مردم بیگواہ ءُ یکے یل کنگ بیتگ

بلوچستان ءِ جتاجتائیں دمگاں پنچ مردم بیگواہ کنگ بیتگ انت ءُ یکے یل کنگ بیتگ-

گیشیں ھالانی رِد ءَ شانزدہ نومبر ءَ کیچ ءِ تھسیل بلیدہ ءِ دمگ میناز ءَ شپ ءِ وھد ءَ پاکستانی پوج ءَ ھاجی اکبر ءِ لوگ ءِ سر ءَ بیڑبرتگ ءُ لوگ ءِ سرجمیں مردم یک کوٹی ءِ تہ ءَ بند کتگ اَنت مھران بلوچ لَٹ ءُ کُٹ کتگ گوں وت برتگ-

ھمے وڑ بلیدہ میناز ءَ سیزدہ نومبر ءَ پاکستانی پوج ءَ عادل ء رفیق نامیں ورنایے آوار جتگ ءُ بیگواہ کتگ-

ھمے وڑ دشت ءَ پاکستانی لشکر ءَ یک لوگے ءِ سر ءَ بیڑبرتگ یک ورنایے آوار جتگ ءُ بیگواہ کتگ-

اِھوالکار ءِ رِد ءَ گوستگیں شپ ءَ ساھت دو ءَ دشت ءِ دمگ کنچتی ءَ پاکستانی پوج یک لوگے ءِ سر ءَ بیڑبرتگ ءُ یک ورنایے آوار جتگ ءُ بیگواہ کتگ-

آوار جنگ بیتگیں ورنا ءِ پجّار عجاز ء دین مھمد جھمنند دشت کنچتی ءِ نام ءَ چہ بیتگ-

ھمے وڑ یازدہ نومبر ءَ بلوچستان ءِ بُنجاھی شھر شال ءِ ھند ھزار گنجی موسی کالونی ءَ ایم آئی ءُ سی ٹی ڈی کارندھاں بیڑبرتگ جھانزیب ء دین محمد شاھوانی جھمنند کچھی بیگ، سوراب دگ شال آوار جتگ-

انچش دوازدہ نومبر ءَ شال ءَ جناح دگ ءَ ایم آئی ءُ سی ٹی ڈی کارندھاں بیڑبرتگ ھاجی وھید شاھوانی ء عبدالمجید شاھوانی جھمنند چکی شاھوانی ، سریاب دگ شال آوار جتگ ءُ گوں وت برتگ-

دومی نیمگ ءَ پاکستانی پوج ءِ دست ءَ زورانسری بیگواہ کنگ بیتگیں جھانزیب بلوچ بیست ءُ پنچ روچ ءَ پد دیم ءَ آرگ بیتگ – آ کاؤنٹر ٹیررازم ڈیپارنمنٹ ( سی ٹی ڈی) انسداد ناشرکاری آمیدگس ءَ پیش کنگ بیتگ-

آمیدگس ءِ پیش بیگ ءَ پد دہ روچ ریمانڈ ءَ سی ٹی ڈی ءِ دست دیگ ءِ پرمان داتگ-

بلوچستان ءَ بلوچ ورنایانی آوار جنگ ءُ بیگواہ کنگ ءِ درچ بازیں وھداں برجاہ انت کہ اود ءَ گیشتریں ورنا گوست ءَ لاشانی دروشم ءَ یل کنگ بیتگ انت-