بلوچستان ءِ بنجاھی شھر شال ءَ دو مردم پاکستانی پوج ءَ دزگیر کنگ ءَ پد بیگواہ کتگ انت-
گیشیں ھالانی رد ءَ بلوچستان ءِ بنجاھی شھر شال ءَ پنجگور ءِ جھمنندیں یک مردمے بیگواہ
بیگواھیں مردم ءِ پجار فراز ء حاجی پازل ءِ نام ءَ بوتگ ۔
اھوالانی رد ءَ فراز ءِ سیادی پنجگور ءِ ھند پروم پیر محمد بازار ءَ اِنت وھدے کہ آ انوگیں وھد ءَ پنجگور تار آفس ءَ نندوک بوتگ۔
آ پنچ نومبر ءِ سھب ءَ شال ءَ سیٹلائٹ ٹاؤن ءَ پاکستانی لشکر ءَ دزگیر کتگ ءُ ایشی ءَ پد آئی ءِ بارو ءَ ھچ اھوال دیم ءَ نیتکگ انت-
کھول ءِ گشگ انت کہ فراز ءِ بندیگ کنگ ءَ پد آئی ءِ بابت ءَ ھچ وڑیں ھال ءُ اھوال دیگ نہ بوتگ۔
ھمے وڑ ءَ بولان پلازہ شال ءَ سلمان بلوچ چہ جند ءِ کوٹی ءَ آوار کنگ ءُ بیگواہ کنگ بیتگ-
دو نیمگ ءَ نیشنل ڈیموکریٹک پاٹی ءَ گوشتگ پاٹی ءِ ڈپٹی آرگنائزر سلمان بلوچ گوستگیں شپ ءَ بولان پلازہ شال ءَ جند ءِ کوٹی ءَ شپ ءِ ساھت سَے ءَ زورانسری بیگواہ کنگ بیتگ-
آئی ءَ گوشتگ سلمان ءِ ھمراھی ءَ آئی ءِ دو ھمراہ دلیپ داس ءُ ساھر بلوچ ھم زورانسری بیگواہ کنگ بیتگ انت ءُ آیانی کوٹی ءِ سامان شنگ ءُ شانگ کنگ بیتگ انت ءُ آیانی کتاب ءُ دگہ زاتی ساز ءُ سامان ھم شنگینگ بیتگ انت-
آئی ءَ گوشتگ سلمان بلوچ ءِ زورانسری بیگواھی اولی ویل نہ انت ایشی ءَ پیش پاٹی ءِ دو بنجاھی پتر ءِ باسک غنی بلوچ ءُ ثناء کھیتران ھم بیگواہ کنگ بیتگ انت کہ انگت ءَ بیگواہ انت-
آئی ءَ گوشتگ ھمے وڑ پاٹی ءِ کراچی زون ءِ زاھد بلوچ ءُ بارکھان زون ءِ سلال بلوچ ءُ میر بلوچ ھم بیگواہ کنگ بیتگ انت کہ انگت ءَ بیگواہ انت-
آئی ءَ گوشتگ پاٹی ءِ بنجاھی سروک شاہ زیب بلوچ ایڈوکیٹ ءِ نام فورتھ شیڈول ءَ مان کنگ ءُ بنجاھی باسکانی بیگواہ کنگ اے تچکیں کلوھے دیگ بوگ ءَ انت کہ این ڈی پی ءِ یکشلیں جد ءُ جھد ءَ بے توار کنگ ءِ جھد انت-