فورتھ شیڈول
ٹی بی پی شونگال
بلوچستان ءَ سیاسی گھگیری زرمبشت ءِ دارگ ءِ ھاتر ءَ پاکستان ءِ مزن واکدار جتا جتائیں پالیسیانی دَرچ ءَ راہ ءَ روان انت- سیاسی پرکاریاں تاکت ءِ زور ءَ دارگ ءِ جھدبرجاہ انت، مانگش اتگیں آمیدگسی پیسلھانی سبب ءَ بلوچ سیاسی سروک بندیگ کنگ بوگ ءَ انت، ءُ نی فورتھ شیڈول ءِ کانون ءِ درچ ءَ بلوچ سیاسی باسکانی بنکی سیاسی ھک لگتمال کنگ بوگ ءَ انت-
کانونی رھبندانی سرجم کنگ ءَ ابید یک ھپتگے ءِ توک ءَ شست ءَ چہ گیش زورانسری بیگواھیانی واستا پرکاریں مردم ءُ جتا جتائیں سیاسی پاٹیانی باسکانی نام فورتھ شیڈول ءَ ھوار کنگ بیتگ انت- سرکار ءِ اے دابیں گامگیجاں بلوچستان ءِ پیسر ءَ لگتمالیں سیاسی جاورھالاں گیشتر ترند کنگ ءِ سبب بیت انت- بلوچ سیاسی باسکاں فورتھ شیڈول ءِ نامینگ ءُ ناشرکاری ءِ گر ءُ دار ءِ تَک ءَ گھگیری سیاست ءِ ھلاپ ءَ کارمرد کنان ءَ ریاستی ادارہ گیر آئینی گامگیج ءِ زورگ ءَ گیشتر جنزینگ ءَ انت-
سیاسی باسکانی زورانسری بیگواھی،ریاستی زوراکی، ای سی ایل ءُ فورتھ شیڈول ءِ نام ءَ ھوار کنگ ءِ وڑیں گامگیجاں بلوچستان ءِ گھگیری سیاست ھلاس کنگ نہ بیت انت- بلوچ زرمبشت ءَ مھلوک ءِ پلامرزی گون انت ءُ سیاسی گھگیری ءِ اُنڈالاں مھلوک مھکم انت- مھلوک ءِ زرمبشت تاکتانی گون ءَ لپاشگ ءَ سرجمیں دنیا ءَ ھچبر سوبمند نہ بیتگ انت، ءُ بلوچستان ءَ ریاستی واکدارانی اے آسر داریں پالیسی ھم سرجم نہ بیت انت-
بلوچستان ءَ پاکستان پیپلز پاٹی ءِ آورتگیں سرکاری ازاروکی، مانگش اتگیں ءُ گیر زمہ واریں پیسلہ ءَ بلوچ سیاسی باسکانی برزشاریں سکین ءِ پروشگ ءَ بے سوب بیت انت- بلے پیپلز پاٹی ءِ سرکار ءِ اے دابیں گامگیج ءَ سیاست ءِ سر ءَ ناسرجمیں سان کپ انت ءُ بلوچستان ءَ مھلوک ءِ دلپروشی گیشتر ودی بیت کنت-