نمدی یے پہ وتی همبل ناکو باهڑ ءَ
نبشتہ کار: یاگی بلوچ
دی بلوچستان پوسٹ
باز براں انسان جیڑ اِیت کہ زندگی همے پیم ءَ وش اِنت کہ جنزگ ءَ اِنت، کندگ ءَ اِنت، سنگت اِنت ءُ دیوان اِنت همے پیم ءَ زند ءِ دراھیں ساھت جنزان بکن اَنت ءُ زندگی ھمے وڑ ءَ وتی تہ ءَ سرجم بہ بیت۔ انسان ءِ مستریں مکسد انسانی زندگی ءِ توک ءَ وتارا مانا دیگ اِنت ءُ اگاں یک انسانے وتی زندگی ءَ را ھمے وڑ ءُ دروشم ءَ مانا بدنت کہ ما جھد ءِ توک ءَ گندیں گڑا الم انسان ءِ زند سرجم بیت اِنت۔
زندگی ءِ تہ ءَ پد ءَ سنگتی هما شے اِنت کہ وتی تہ ءَ وت یک زندگی یے الگ مانا ءَ گیشین اِیت۔ من ءَ یاد اِنت کہ 2021 اَت جنوری ماه اَت ، سردی اَت ءُ پد ءَ شال اَت کساس شپ ءِ هشت ساهت اَت، همے نیام ءَ منی گوانکو ءَ توار پرجت، من چار اِت تا استاد پدائی ریاست اِنت کہ ھال کنگ ءَ اِنت، کمیں ساھت ءِ ھاتر ءَ من ابکہ بوتان ءُ پد ءَ مئے ھال بندات بوت، گوں یک دومی ءَ ھال ءُ اھوال بوت، تران بوت انچو گپ دیم ءَ روان بوت ءُ استاد ءَ سنگتی ءِ سر ءَ تران کُرت، همے سوج ئِے دات کہ دگنیا ءِ تہ ءَ چہ درستا مُھکم تریں سیادی سنگتی اِنت پہ وت انچیں همبل در بہ چن کہ ساہ بھر کنگ ءَ تیار بہ بنت استاد ریاست ءَ تران کنان ءَ گوشت کہ وتی ھمبراھیں سنگتاں مدام مھر بدے ءُ گوں آیاں وتی سنگتی ءَ دائم بدار ءُ زندگ بکن۔
وهد انچو گْوزان بوت سال ءُ ماه مٹ بوت اَنت، وهدے کہ 2022 اتک ءُ اے وھداں من تربت مزن شاهدربرجاه ءَ پہ گیشیں وانگ ءَ رپتاں دانکہ وتی اِلم ءُ زانت ءِ توک ءَ چیزے گیش بکناں۔
من هم انچو گوں وتی وانگ ءَ گلائیش بوتان ءُ دیم ءَ جُنزان بوتاں۔ انچو من یک روچے هاسٹل ءِ دیمی نیمگ ءَ گوں دگہ یک سنگتے ءَ ڈیک وارت ءُ آئی ءَ ناکو باهڑ هم همراھی ءَ گون اَت ءُ کمیں کساس گپ ءُ تران بوت ءُ پد ءَ ما جنز اِتیں۔ ناکو باهڑ ءَ همد ءَ چہ دکان ءَ اسٹینگے زُرت ءُ انچو سلاہ ئِے جت کہ یاگی تو هم ور ئے گوں؟ منی دپ ءَ در اتک کہ ھو وراں گوں سنگت، ناکو باهڑ ءَ پسو دات گوں بچکندے ءَ گُشت مرگ بات ترا۔ کمیں ساھت نہ گوستگ اَت کہ ما انچو یکجاہ ءُ ھوار بیتیں گوش ئے چہ کرناں یکجاہ ایں۔ من چہ ناکو ءَ گیش نزیک بوان بوتاں۔ گوش ئے پہ من ھرچ شے ءِ بدل جوڑ بوتگ اَت۔ چہ ناکو باهڑ ءِ همراھی ءُ کربانیانی بدولت اِنت کہ من سنگتی گیش پھم اِت گیش پھمگ ءَ اِتاں کہ سنگتی کُربانی ءِ نام اِنت، ھمبراہ داری ءِ نام اِنت، یکجاہ ءُ ھواری ءُ گوں یک دومی ءَ زندگی کنگ ءِ نام اِنت۔ انچو وهد جُنزان اَت ما یک دومی ءِ گیشتر نزیک بوتیں۔
ناکو باهڑ من ھر وهد ءَ دیستگ کہ پہ کوم ءِ واستاجُھد ءَ اَت، ترگ ءَ اَت ،برے روانکے ءِ دیم ءَ اَت بلوچ ءِ گار ءُ بیگواھیں ورنایاں پہ اوگام جنگ ءَ اَت۔ برے دگانی سر ءَ هل اِیت ءُ پوسٹرے شِنگ ءُ شانگ کنگ ءَ اَت۔ برے یک بے وسیں بلوچیں مات ءِ زهگ ءِ اکس ئِے ماں دست ءَ اَت پرائی ءَ آجوئی ءِ توار ءَ بُرز کنگ ءَ اَت۔ ناکو باهڑ انچو گُمان بوت کہ پہ بلوچ راج ءَ دیوانگ ءُ شیدا اَت انچو کہ مرید پہ هانُل ءَ.
بازیں وهد ءِ جنزگ پد منی ءُ ناکو باهڑ ءِ اھوال نیست اَت ءُ آئی ءِ اے پیسریگیں نمبر هم نہ لگ اِت ، سوشل میڈیا ءَ هم گار اَت۔ پد ءَ وهد گْوزان بوت ،همد ءَ لھتیں روچ ءَ پیسر من سوشل میڈیا ءَ دیست کہ بلوچ جنگولاں دَگ بَستگ ءُ گوں کوم ءَ تران کنگ ءَ اَنت۔
همے سنگت کہ تران کنگ ءَ اَنت، گُد ئِے درتگ اَنت ،بی ال اے ءِ بیرک کوپگ ءِ سر ءَ بستگ ءُ M4 توپک بڈ ءَ اِنت، ماسک ئِے دیم ءَ مُول اِنت، اے بلے من شر چار اِت گوش داشت کہ سما بوت اے آواز ناکو ئیگ اِنت۔ من ناکو مزن شاهدربرجاه ءَ دیستگ اَت کہ جهُد ءَ اَت ءُ اے تامُر ءِ تہ ءَ دیست گیش مُهکم تر اِنت ،ناکو باهڑ جان ھر کُنڈ ءَ بلوچستان ءِ زمین ءُ سُرومگیں کوھانی میار اِنت۔
“دوا اِنت گوں ھُداوند ءَ ”
“مہ بات پرواه منی چمانی روک ءَ”
“چراگے بات چراگاں بَلیناں بات ”
“نمیرانیں آ کردارانی هدابُند بات ”
“داں زند ھست اِنت آ زندگ بات”
“آ زندگ بات سلامت بات”
“آ زندگ بات سلامت بات”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-