بلوچ زالبول سر ءَ لَٹ ءُ کُٹ زوراکی ءِ وئیل: پاکستانی پوج ءَ آپریشن پدری، لَٹ ءُ کُٹ ءِ انکاری اِنت

پنجگور ءَ سر بیتگیں ھالانی رِد ءَ گوستگیں روچ ءَ ٹپی ئیں جاوراں نادُراھجاہ ءَ آرگ بیتگیں زالبول نازیہ شفیع ءَ ٹپّانی درد نہ سگ اِتگ ءُ بیران بیتگ-

دمگی اِھوالکار ءِ رِد ءَ نازیہ شفیع آئی ءِ مات سے شمبے ءِ روچ ءَ پاکستانی پوج ءَ پنجگور ءِ دمگ عیسیٰ ءَ یک لوگے ءِ سر ءَ بیڑبرتگ ءُ ناشناسیں جاھے ءَ برتگ-

پشمبے ءِ شپ ءَ نازیہ شفیع ءُ آئی ءِ مات گوں ناگیگیں جاوراں پنجگور نادُراھجاہ ءَ برگ بیتگ، ھالانی رِد ءَ زالبول لَٹ ءُ کُٹانی کنگ ءَ پد بدکاری ءِ نشانگ کنگ ھم بیتگ-

نادُراھجاہ ءَ زوت الاج نہ بیگ ءِ سوب ءَ نازیہ شفیع ءِ شپ ءِ وھد ءَ ٹپّانی درد نہ سگ اِتگ ءُ بیران بیتگ- بلوچ یکجھتی کمیٹی پنجگور ءَ آئی ءِ بیرانی ءِ گپ راست کتگ-

پاکستانی پوج ءِ واکدار ءَ پنجگور ءَ نازیہ شفیع ءِ لوگ سر ءَ آپریشن راست کتگ ٹاہ داتگ کہ نازیہ شفیع ءُ آئی ءِ کھول تھریک تالبان پاکستان ءَ چہ سیادی داشتگ-

بلے واکدار ءَ زالبول سر ءَ لَٹ ءُ کُٹانی ءُ زوراکی ءِ بھتام درگت ءَ ھچ وڑیں سرپدی نداتگ-

پنجگور ءِ دمگی رسانکدر ءِ رِد ءَ، ایف سی پنجگور ءِ نیمگ ءَ چہ شنگ بیتگیں یک درشانے ءِ تہ ءَ گوشگ بیتگ کہ عیسیٰ ءِ دمگ ءَ یک مردمے قاسم ءِ دزگیری ءِ ھاتر ءَ بیڑبرتگ –

جار ءِ تہ ٹاہ دیگ بیتگ کہ اے میان ءَ قاسم نامیں مردمے ءَ وتی گھارزتک نازیہ شفیع انسانی اسپر ءِ دروشم ءَ کارمرد کنگ ءِ جُھد ءَ بیتگ، بلے اش انکاری کتگ، چریشی ءَ پد آ ناشرکارانی نیمگ ءَ چہ تاوان دیگ بیتگ اَنت-

پنجگور ءِ سیاسی ءُ چاگردی گلاں پوج ءِ اے گپ رد کنان ءَ گوشتگ کہ نازیہ شفیع ءُ آئی ءِ مات تچکی ءَ آوار جتگ اَنت ءَ آیانی گوم ءَ در انسانی رویشگ کنگ بیتگ-

آیاں گوشتگ کہ پاکستانی پوج آپریشن ءِ نام سر ءَ لوگانی دودمان ءَ لگمتال کنت مردماں بیگواہ کن اَنت پیسر ءَ مردین آوار جتگ اَنت نی زالبولاں آوار جن اَنت آیانی گوم ءَ در انسانی رویشگ کن اَنت-