بلوچستان ءِ جتاجتائیں دمگاں پاکستانی پوج ءُ پولیس ءِ سر ءَ اُرشانی دْرچ یکشل ءَ برجاہ اَنت

بلوچستان ءِ جتاجتائیں دمگ کلات ءُ ڈیرہ مراد جمالی ءَ پاکستانی پوج ءُ پولیس ءِ سر ءَ اُرش جانی تاوان ھال، سلاہ دستیگ کنگ بیتگ اَنت-

بلوچستان ءِ دمگ کلات ءَ پاکستانی پوج سلاہ بندیں مردماں اُرش ءِ نشانگ کتگ، چریشی ءِ آسر ءَ پوج ءَ جانی تاوان چست کنگ کپتگ وھدے کہ اُرشکاراں بیران بیتگیں کارمندانی سلاہ ھم دستیگ کتگ اَنت-

وئیل کلات ،شیکڑی مورگند ءِ دمگ ءَ بیتگ اود ءَ سنگر گپتگیں سلاہ بندیں مردماں پوج ءِ دو گاڑی ھما وھد ءَ اُرش ءِ نشانگ کتگ اَنت وھدے آ وتی پوسٹ ءِ واستا راشن سر کنگ ءَ بیتگ اَنت-

اِھوالکار ءَ ٹی بی پی ءَ گوشتگ کہ اُرش ءَ پوج ءَ مزنیں کچے ءَ جانی تاوان چست کنگ کپتگ وھدے کہ اُرشکاراں کارندھانی سلاہ ھم وتی دستیگ کتگ اَنت-

دگہ یک دمگی اِھوالکارے ءَ ٹی بی پی ءَ گوشتگ کہ مروچی سُھب ءَ بُنجاھی شھدگ ءَ چہ پرائیوٹ مزدا گاڑی وتی دستیگ کتگ اَنت کہ گمانی ءَ آ وتی چوکیانی واستا راشن سر کنگ ءِ ھاتر ءَ کارمرز کنگ ءَ اِنت-

گوستگیں روچ ءَ ھم مورگند ءِ دمگ ءَ پوج ءِ چوکی ءُ راشن آپ سر کنوکیں گاڑی سلاہ بندیں مردماں اُرش ءِ نشانگ کتگ اَنت-

کلات ءِ دمگ مکئی ءَ ھم پاکستانی پوج ءِ پیادگ کارندہ گوستگیں روچ ءَ سلاہ بندیں مردماں اُرش ءِ نشانگ کتگ اَنت- اے کارندہ ھم پوج ءِ چوکی ءَ راشن سر کنگ ءِ جُھد ءَ بیتگ اَنت کہ اُرش ءِ نشانگ ءَ اَتکگ اَنت-

کلات ءِ دمگ جوھان ءِ نزیک ءَ خیصار ءِ ھند سر ءَ پاکستانی پوج ءِ سے گاڑیانی سر ءَ سلاہ بنداں سنگر گپتگ اُرش کتگ میڑ برجاہ ءَ اِنت-

ھمے وڑ مورگند ءَ تنی وھدے سے کلاکاں گیش اِنت کہ پاکستانی پوج ءُ سلاہ بندانی میان ءَ میڑ برجاہ ءَ اِنت ھمے میان ءَ سلاہ بنداں ھیلی کاپٹر پُشت کنزی ءَ لاچار کتگ اَنت وھدے کہ بازیں پوجی کارندھے مرتگ ءُ بازین ئِے انگت سلاہ بندانی انگیر ءَ اَنت-

نوکیں ھالانی رِد ءَ کلات ءِ چار جتاجتائیں ھنداں میڑ برجاہ ءَ اِنت چار تیرگواریں ھیلی کاپٹر شیلنگ کنگ ءَ اَنت وھدے کہ شش ایمبولینس ھم دمگ ءَ سر بیتگ اَنت-

گمان کنگ بیگ ءَ اِنت پاکستانی پوج ءِ کارندھاں مزنیں کچے ءَ جانی تاوان چست کنگ کپتگ-

پاکستانی واکدار ءَ اے اُرشاں ءُ تاوانانی درگت ءَ ھچ وڑیں درشان شنگ نہ کتگ –

ھمے وڑ بلوچستان ءِ دمگ ڈیرہ مراد جمالی ءَ مروچی سُھب ھشت ءُ نیم ءَ ایس ایس پی ھائی وے پولیس ءِ گیٹ نزیک ءَ پجّار نہ بیتگیں مردماں دستی بمب اُرشے کتگ ءُ اُرش ءِ آسر ءَ انگت جانی تاوان ءِ ھال سر نہ بیتگ-

اے اُرشانی زمہ واری انگت ھچ گلاں نہ زرتگ اَنت-