بلوچستان ءِ دمگ پنجگور ءِ ھند پنچی ءَ یک بلوچ جنکے جاندراھی ءِ ھاتر ءَ نادراہ جاہ ءَ بیران بوتگ کہ آئی ءِ بابت ءَ دمگی مردمانی گوشگ اِنت کہ پاکستانی لشکر ءَ آوار جنگ ءَ پد لٹ ءُ کٹ کتگ ءُ پد ءَ آئی ءِ گون ءَ جنسی زیادتی کتگ-
گشگ بیگ ءَ انت دوئیں جنین آدم چہ ٹارچر کنگ ءَ پد نادراھجاہ ءَ برگ بوتگ اَنت کہ اود ءَ جنک وتی ٹپانی سبب ءَ بیران بوتگ۔
دمگی اھوالکار ءُ چاگردی باسکانی رد ءَ اے جنک ءِ پجار نازیہ ءُ آئی ءِ مات پری ءِ نام ءَ زانگ بیتگ انت ءُ آ ماشکیل ءِ نندوک اَنت ءُ گوں وتی ھاندان ءَ مزدوتء پنجگور ءَ اتکگ اَنت۔
اے وئیل ءِ بابت ءَ انگت ءَ سرکاری بیان شنگ نہ بوتگ انت۔ بلوچستان پوسٹ ءَ اے درگت ءَ بنجاھی انتزامیہ ءُ ھسپتال ءِ انتزامیہ ءَ گوں رھوے کنگ ءِ کوشست کتگ بلے انگت ءَ سرکاری پسو نہ رس اتگ انت۔
زانگ بہ بیت کہ بلوچستان ءَ پاکستانی لشکر ءِ آپریشن سک دیر اِنت کہ برجاہ اَنت۔ ادارہ انسانی ھکانی گلاں باز رند ءَ اے بابت ءَ زھر درشان کتگ۔
بلوچ یکجھتی کمیٹی ءَ پنجگور ءِ وئیل ءَ را بلوچ راجی پجار ءُ گیرت ءِ سر ءَ اُرشانی درچ ءِ برجاھیں منانک لیک اتگ-
بی وائی سی پنجگور ءِ نیمگ ءَ شنگ بوتگیں بیانے ءِ تہ ءَ گْوشگ بیتگ کہ نازیہ شفیع ءِ شھادت اے گپ ءَ سابت کنت کہ ریاست ءُ آئی ءِ کرائے ءِ کشندہ چادر ءُ چار دیواریاں لگتمال کنگ ءَ بلوچ زالبولانی زند ءِ سر ءَ اُرش کنگ ءَ اَنت۔ بلوچ راج ءِ ھاموشی راجی گیرت ءِ دیدانکی وت کُشی ءِ برابر بیت۔
آئی ءَ گوشت کہ 28 اکتوبر 2025 ءِ شپ ءَ سرکاری لشکر ءُ آئی ءِ کرائے ءِ کشندہ پنجگور ءِ دمگ پنچی ءَ شفیع محمد ءِ لوگ ءَ مانرتکگ انت ءُ آئی ءِ کھول ءَ را ٹارچر کتگ ءُ شفیع محمد ءِ جن ءُ جنک ءَ را توپک ءِ زور ءَ گوں وت برتگ انے۔ دومی روچ ءِ سُھب ءَ نازیہ شفیع سول ھسپتال پنجگور ءَ نیم مرگیں جاوراں آرگ بیتگ، چہ ٹارچر ءُ بدیں سلوک ءَ پد۔ لگتیں دمان ءَ پد نازیہ شفیع وتی ٹپانی سبب ءَ بیران بوتگ۔