جھمننداں زورانسری درکنگ ءَ لاچار کنگ ءَ اِنت، بازیں کھول دمگ ءَ یل کنگ ءَ لاچار اَنت- انسانی ھکانی گلاں ایر جتگ-
بلوچستان ءِ دمگ ھُزدار ءِ ھند زھری ءَ برجاہ لشکر کشی ءَ پد پاکستانی پوج ءِ نیمگ ءَ چہ دمگی آبادی ءِ زمینانی سر ءَ دستیگ کنگ ءُ اود ءَ نوکیں بُنجل ءِ جوڑ کنگ ءِ ھال سر بیتگ-
اِھوالکار ءِ رِد ءَ زھری ءِ دمگ تراسانی ءِ نزیک ءَ پاکستانی پوج دمگی جھمننداں چہ زورانسری در کنگ ءُ بُنجل جوڑ کنگ پرمائیگ ءَ اِنت-
بازیں چمّگداں گوشتگ کہ پوج ءِ کارندہ ھمکروچ سھب سر ءَ ورنایاں لوگاں چہ لوٹائین اِیت ءُ آیاں کار پرمائیت ءُ بیگاہ ءَ داں دیراں آیاں لوگ ءِ روگ موکل دنت-
دمگی اِھوالکار ءِ گوشگ اِنت کہ پوجی زور ءُ یکشل ءَ تُرسینگ ءِ سوب ءَ بازیں کھوکے زھری ءِ یل کتگ ھُزدار، ھب چوکی ءُ دگہ شھرانی نیمگ ءَ لڑ ءُ بار کنگ ءَ اِنت-
دمگ ءِ جھمننداں گوشتگ کہ زھری ءَ پُترگی ءُ دراھگ ءِ راھانی سر ءَ پاکستانی پوج ءَ بازیں چوکی جوڑ کتگ – اود ءَ چہ گوزوکیں سرجمیں مردماں چہ پجّار ءُ زاتی سرپدی ءِ لوٹ ءَ کنگ ءَ اِنت-
زانگ بہ بیت کہ گوستگیں ماہ ستمبر ءَ پاکستانی پوج ءَ زھری ءُ کش گوراں مزنیں کچے ءَ لشکر کشی بندات کتگ، اے میان ءَ پوج ءِ نیمگ ءَ چہ بُرزی بمبگواری ءُ ڈرون اُرش ھم کتگ آیانی تہ ءَ زالبول ءُ چُکاں ھوار درزنانی مردم بیران بیتگ اَنت-
پاکستانی پوج ءَ اے لشکر کشی ءِ راست کنان ءَ ٹاہ داتگ کہ کاروائی بلوچ آجوئی لوٹوکیں سلاہ بندیں گلانی ساڑی بیگ ھلاپ ءَ کتگ ءُ میڑاں بازیں بلوچ آجوئی لوٹوک جنگ بیتگ-
اِھوالکار ءِ رِد ءَ سال اگست ءَ بلوچ سلاہ بندیں گلاں یک ماھے ءَ چہ گیش زھری شھر دستیگ کتگ چیک پوسٹ جوڑ کتگ شھری ءِ انتزام دستیگ کتگ، پد ءَ پاکستانی پوج ءَ لشکر کشی ءِ میان ءَ بازیں مردمے زورانسری بیگواہ کتگ آیانی تہ ءَ زالبول ھم ھوار اَنت-
دمگی مردمانی گوشگ اِنت کہ لشکر کشی ءِ میان ءَ پاکستانی پوج ءَ زھری ءِ یکیں سول ھسپتال سر ءَ ھم سر ءَ دستیگ کتگ آ پوجی بُنجلے ءَ مٹّینتگ، چریشی ءِ سوب ءَ یک لاپ پُریں زالبولے وھد سر ءَ الاج ءِ نہ رسگ ءِ سوب ءَ چلگی ءِ وھد ءَ بیران بیتگ-
ایمنسٹی انٹرنیشنل ءُ ھیومین رائٹس کمیشن آف پاکستان ءَ زھری ءَ برجاہ لشکر کشی ءِ میان ءَ انسانی جانانی زوالی ءِ ایر جتگ زوت کرفیو ءِ ھلاس کنگ ءُ زورانسری بیگواھیں مردمانی یل کنائینگ لوٹ کتگ-