مند ءَ بیگواھیں مردمانی یل کنائینگ ءِ ھاتر کھول ءِ نندانک برجاہ، پنجگور ءَ یک ورنایے بیگواہ کنگ بیتگ

کیچ ءِ دمگ مند ءَ بیگواھیں مردمانی یل کنائینگ ءِ ھاتر ءَ کھولانی زھرشانی نندانک برجاہ دومی نیمگ ءَ پنجگور ءَ یک ورنایے آوار جتگ ءُ بیگواہ کتگ-

گیشیں ھالانی رِد ءَ مند ءَ زورانسری بیگواھیں مردمانی کھول نندانک مروچی دومی روچ ءَ ھم برجاہ، کھول نندانک مروچی دومی روچ برجاہ، کھول گوشگ اِنت کہ واکدار اشانی لوٹانی منّگ جاہ ءَ آیاں بیھار دیگ ءَ اِنت-

بلوچستان ءِ دمگ کیچ ءِ ھند مند بلوچ آباد ءَ بیست سے اکتوبر ءَ پاکستانی پوج ءِ دست ءَ آوار جنگ ءَ پد بیگواہ کنگ بیتگیں فھد ء عثمان، حمود ء محمد جان ءُ ھاروان ء محمد ءِ یل کنائینگ ءِ ھاتر ءَ نندانک برجاہ-

زھرشانی سوب ءَ بُنجاھی شھدگ یکشل ءَ بند وھدے کہ بیگواھیں مردمانی کھول دگ پہ گاڑیانی واستا بند کتگ-

گوستگیں روچ ءَ بیگواھیں ورنایانی کھول یک زھرشانی روانکے کش اِتگ، چریشی ءَ پد کھول ءُ دمگ مردم بُنجاھی شھدگ سر ءَ نندانک داتگ ءُ گاڑیانی واستا بند کتگ، نندانک تنی وھدے برجاہ ءَ اِنت-

شھدگ ءِ بند سوب ءَ ایران ءَ رؤکیں دگ سرجمی ءَ بند بیتگ، ءُ گاڑیانی دراجیں لین لگ اِتگ-

کھول ءِ گوشگ اِنت کہ آیانی دوستناک درکانودی دروشم ءَ آوار جتگ ءُ بیگواہ کتگ اَنت، وھدے کہ انتزامیہ پریات ءِ گوشدارگ جاہ ءَ آیاں تُرسینگ اِنت-

نندانک ءَ نشتگیں مردمانی رِد ءَ پاکستانی پوج ءِ کارمند نندانک ءَ بھر زیروکاں دارگ ءَ اِنت ءُ کھول ءَ یکشل ءَ ترسینگ اِنت نندانک ھلاس کنگ زور دیگ ءَ اِنت-

کھول ءَ لوٹ کتگ کہ اگاں واکدار آیانی نندانک مسلہ اِنت گُڑا آیانی دوستناکاں زوت دیم ءَ بیار اِیت یل بکنت اگاں ناں نندانک گیش تُرند کنگ بیت-

دومی نیمگ ءَ پنجگور ءَ ھپدہ سالی ئیں ورنا سجاد بلوچ ء قادربخش گوستگیں ھپتگ ءَ ناشناسیں سلاہ بندانی دست ءَ بیگواہ کنگ بیتگ اَنت-

چمّگدانی رِد ءَ اے وئیل بیست یک اکتوبر 2025 ءَ نیمروچ کساس دو ءَ پنجگور ءِ شھر ءَ نادرا کارگس نزیک ءَ، جانم ٹیلرز ءِ دیم ءَ بیتگ-

مردمانی گوشگ ءِ رِد ءَ سجاد بلوچ سلاہ بندیں مردم کہ گمانی “ڈیتھ اسکواڈ ” ءِ باسک بیتگ اَنت، گاڑی ءَ زورانسری نندارینتگ ءُ ناشناسیں نیمگے ءَ شتگ اَنت-

اِھوالکار ءِ رِد ءَ سجاد یک دکاندارے آ درستانی دیم چست کتگ اِت، بلے شش روچ ءِ گوزگ پد ھم آئی ءِ ھچ وڑیں ھال نیست کہ کجا اِنت چی ھال ءِ تہ ءَ اِنت-

بلوچستان ءَ زورانسری آوار جنی ءِ وئیل ھمکروچ دیم ءَ آیگ ءَ اَنت –

بلوچستان ءَ انسانی ھکانی گل دراجیں مدتے ءَ چہ لوٹ کنگ ءَ اَنت کہ زورانسری آوار جنی ءِ وئیل دارگ بہ بنت-