سلاہ بند ءُ پولیس ءِ میان ءَ جنگ ءُ چوپ ءَ ایس ایچ او بھاگ ناڑی بیران، جنگ ءُ چوپانی درچ برجاہ – دومی نیمگ ءَ یو بی اے ءَ اُرش ءِ زمہ واری من اتگ-
بلوچستان ءِ دمگ کچھی ءَ چہ رس اتگیں ھالانی رد ءَ مرچی بیگاہ ءَ بازیں کچے سلاہ بندیں مردم بنجاھی کارگس بھاگ ناڑی شھر ءَ اتکگ ءُ لیویز ءُ دگہ سرکاری کارگسانی سر ءَ قبضہ کتگ ءُ سرکاری گاڑی ءُ سلاہ گون وت برتگ انت۔
چہ کچھی ءَ رس اتگیں ویڈیو ءُ چمدیستگیں مردمانی رد ءَ سلاہ بندیں مردم کہ بلوچ آجوئی ءِ گلاں گوں سیادی داروکیں بیرک چِست کتگ بیتگ انت، پولیس ءُ لیویز اسٹیشن، سرکاری بینک ءُ تھسیل ءِ کارگس ءِ کنٹرول ءَ چہ پد ماڑی مانداشتگ انت۔
ھمے وھد ءَ شھر ءِ تہ ءَ گشت کنوکیں سلاہ بندیں مردماں پولیس ءُ دگہ سرکاری کارندہ چہ پجار کنگ ءَ پد آوار جتگ اَنت ءُ دزگیری ءِ وھد ءَ پولیس ءِ SHO لطف علی کھوسہ سلاہ بندیں مردمانی تیرگواری ءَ بیران بوتگ۔
کچھی پولیس ءِ رد ءَ اے درگت ءَ ایس ایچ او ءِ دو گارڈ ٹپی بوتگ اَنت، یک کانسٹیبل ھم بیران بوتگ ءُ پولیس ءَ ھم گشتگ کہ آئی ءَ دو اُرش کنوک کُشتگ اَنت۔
نوکیں ھالانی رد ءَ اے شھر انگت ءَ بلوچ آجوئی لوٹوکیں دستیگی ءَ اِنت ءُ سلاہ بندیں مردم شھر ءِ جتا جتائیں دمگاں گاڑی ءُ موٹر سائیکل ءِ سر ءَ گشت کنگ ءَ اَنت۔
سلاہ بندیں مردمانی کنٹرول ءِ گرگ ءَ پد پاکستانی لشکر ءَ شھر ءِ تہ ءَ ھوار بوھگ ءِ جھد کتگ بلے اے وھد ءَ لشکر ءُ سلاہ بندیں مردمانی نیام ءَ ترندیں جنگ بوتگ اگاں چہ لشکر ءَ انگت ءَ اے وئیل ءِ سرکاری رنگ ءَ پدر نہ کتگ۔
دومی نیمگ ءَ بلوچ یونائیٹٹد آرمی ءِ جارکش مزار بلوچ ءَ اُرش ءِ زمہ واری من اتگ ءُ گوشتگ کھچی بھاگ ناڑی سرمچاراں گپتگ ءُ سرجمیں درشان زوت شنگ کنگ بیت انت-