انساپ ءِ کوش
ٹی بی پی شونگال
پاکستان ءِ سپریم کورٹ ءِ جسٹس اطھر امن اللہ ءَ درکانودی کوش ءِ آئین ءُ بنکی انسانی ھکانی سنگینیں لگتمالی گوشان ءَ تربت ءَ پِت ءُ مات ءِ دیم ءَ ھیات بلوچ ءِ کشوک بلوچستان فرنٹیئرکور ءِ کارندہ شادی اللہ ءِ سزائے مرگ ءِ ھلاپ ءَ دزبندی درگوز کتگ – بلے سپریم کورٹ ءِ سَے رکنی بینچ ءِ دو یکے ءِ درچ ءَ وتی پیسلہ کنان ءَ مجرم ءِ سزائے مرگ مٹ کتگ ءُ اُمر ءِ کید ءَ کتگ-
کراچی یونیورسٹی ءِ نودربر ھیات بلوچ 13 اگست 2020 ءَ تربت ءِ ھند آبسر ءَ آئی ءِ پت ءُ مات ءِ دیم ءَ ایف سی ءِ کارندہ شادی اللہ ءَ ھشت تیر جتگ ءُ کشتگ- ھیات بلوچ ءِ ناھکیں کوش ءِ ھلاپ ءَ بلوچستان ءَ ترندیں زھر ءِ درشان ودی کتگ ءُ آئی ءَ ریاستی زوراکی ءِ ھلاپ ءَ یک گھگیری زرمبشتے ودی کتگ کہ مروچی ھم جتا جتائیں دروشماں برجاہ انت-بلے مھلوک ءِ گھگیری ءُ آمیدگسی پیسلھاں ابید ھم بلوچستان ءَ سیاسی باسک ءُ زورانسری بیگواھیانی درکانودی کوش ءِ درچ ھلاس نہ بیتگ-
ھیات بلوچ ءِ کوش ءَ پنچ سال سرجم بیتگ بلے اے سالانی توک ءَ دروگیں پولیس مکابلہ ءِ نام ءَ سدانی کچ ءَ بلوچ ورناہ درکانودی کشگ بیتگ انت – بلوچستان ءَ مزنیں دردناکے ءَ پد بلوچ ورنایاں کُش انت ءُ آیانی لاشاں جنگل ءُ ویرانگاں چگل دیگ ءِ درچ یکشل ءَ برجاہ اَنت- ریاستی زوراکیانی ھنچیں ویلانی ھلاپ ءَ چِست بیتگیں تواراں پروش دیگ ءَ اَنت، ھمے وڑ دومی نیمگ ءَ ھمے دمگاں ایمنی ءُ دیمروی ءِ ٹاہ دیگ بوگ ءَ اَنت-
بلوچستان ءَ آمیدگسانی پیسلہ ھچ بر وتی جاہ ءَ اوشتارینگ نہ بیتگ انت – مزن تاکتیں واکداراں تاکت ءِ زور ءَ انساپ ءِ کوش کتگ ءُ وتی پیسلہ بلوچ راج ءِ سر ءَ مشتگ اَنت- آیوکیں وھدانی نزیک ءَ بلوچستان ءِ جاورانی مٹ بوگ ءِ ھچ وڑیں سان گندگ نہ بیگ ءَ انت – بلے آمیدگسی انساپ ءِ نہ بوگ ءَ ابید ھم ھیات بلوچ ءُ دومی بلوچ ورنایانی واستا توار بلوچستان ءَ چِست بیان اَنت-