13 نومبر ”نمیرانیں سرانی روچ” ءِ درگت ءَ آنلائن مھم چلائینگ بیت ۔ بی ایس او آزاد

آجوئی لوٹوکیں نودربر گل بلوچ نودربرگل آزاد ( BSO-Azad ) ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ سیزدہ نومبر ”نمیرانیں بلوچانی روچ ” بلوچ راج ءُ بلوچستان ءَ ھوار سرجمیں جھان ءَ درگ بیت ءُ راج ءِ نمیرانیں سر دورت ندر کنگ بنت ۔ اے ھما روچ انت کہ ما وتی منگھیں پرزنداں یات کن ایں ءُ آیاں دروت ندر کن ایں کہ آیاں بلوچستان ءِ آجوئی ءِ ھاتر ءَ وتی ھون ریتکگ انت مدامی ءِ ھاتر ءَ وت ءَ نمیران کتگ ۔

جارکش ءَ گوشتگ کہ سیزدہ نومبر ھما روچ انت کہ میر مھراب ھان ءَ انگریز سامراج ءِ دیم ءَ سر جھل نہ کتگ ءُ گھگیری ءِ راہ گپتگ ءُ بلوچ سرڈگار ءِ پھازگ ءَ جنگ کنان ءَ نمیران بوتگ۔ اے ھما پلسپہ انت کہ بلوچ راج ءِ پرزنداں ادارکی ءُ ایردستی زند ءِ گوازینگ ءِ بدل ءَ گھگیری ءُ آزاتی ءِ لیکہ گچین کتگ نمیران بوگ ءِ شئور جتگ ۔ ھما روچ ءَ بگر تاں روچ ء مروچی بلوچ راج ءِ پرزنداں ایردستی ءُ دری ارشکارانی بگیری ءَ دلبند مک کتگ ءُ جھد کتگ ۔ اے راج ءِ ھر یک مردمے ءِ رگانی تہ ءَ گھگیری ءُ راجی آجوئی ءِ جزبگ تچگ انت کہ ھچ وڑیں تاکت ایشی ءَ نزور کت نہ کنت پرچاکہ اے ھما پرمنگھیں پلسپہ انت کہ آجوئی ھوناں گوں کمایگ بوتگ کہ آئی ءِ مول بس بلوچستان ءِ آجوئی ءَ گوں بندوک انت ۔

آزاد ءِ بنجاھی جارکش ءَ گوشتگ کہ بی ایس او آزاد ءِ نیمگ ءَ سیزدہ نومبر ءَ نمیرانیں سرانی روچ ءِ دارگ ءُ اے روچ ءَ راجی تکاں منگ ءُ وتی منگھیں نمیرانیں سراں یات کنگ بلوچ راجی تاکت ءُ یکمشتی ءَ پدر کنت ۔ اے روچ دیمھونی ءُ داستاناں سر ریچیں موہ انت کہ بلوچ راج ءِ ھر یک مردمے یکجاہ بیت دیمھونی پلسپہ ءَ ایوک ءَ گوں جزبگ ءَ نہ دار ایت بلکیں زانشتی اے پلسپہ ءَ پھم ایت ءُ ایشی ءِ سر ءَ امل کنت ۔ بلوچ پرزند بلوچستان ءِ آجوئی ءُ یک استانے ءِ جوڑ کنگ ءَ جھد کنان انت ۔ بلوچ راج ءِ نیمگ ءَ سیزدہ نومبر ھر سال بلوچستان ءَ ھوار سرجمیں جھان ءَ پہ شرپ درگ بیت۔ ھمے وڑ گل ھم چاگردی ترامجاھاں آنلائن مھم ءَ ھوار سرجمیں بلوچستان ءَ ھمے روچ ءِ درگت ءَ کار کنت ۔ اے سال ءَ سیزدہ نومبر ءَ نمیرانیں سرانی روچ ءِ درگت ءَ چاگردی ترامجاھاں شریں وڑے ءَ آنلائن مھمے بندات کنگ بیت ۔ ما بلوچ راج، درسیں ادارہ ءُ چہ راج ءَ دزبندی کن ایں کہ اے مھم ءَ بھر بہ زور انت ءُ وتی راجی نمیرانیں سر ءَ دروت ندر بہ کن انت ۔ شما ھرکجا ات وتی راجی نمیرانیں سرانی سر ءَ نبشتانک بہ لک ایت آیانی کسہ ءُ پلسپہ ءَ بلوچ راج ءُ سرجمیں جھان ءَ پیش بہ دار ات ۔ آیانی تامر جوڑ بہ کن ات ءُ شنگ بہ کن ات ۔ ھر کجا بہ ئے نمیرانیں سرانی درگت ءَ مراگش ءُ دیوان اڈ بہ دے ات ۔