ھیات ءِ کوش ءُ جلّادیں آمیدگس- سارُم دشتی

ھیات ءِ کوش ءُ جلّادیں آمیدگس

نبشتہ کار: سارُم دشتی

دی بلوچستان پوسٹ

پاکستان ءِ کانون تھنا وتی مردماں ساپ ءُ پلگار اِنت پہ بلوچاں مدام کوشے ءِ رنگ ءَ گندگ ءَ کیت، ھمود ءَ مارا کانون ءِ نام ءَ شون دے اَنت ھمود ءَ سینگ ءَ تیراں ڈاگ دے اَنت، ھمود ءَ مارا گوش اَنت انساپ اِنت ھمود ءَ مئے کوشکار آرامی ءُ آسودگی ءَ یل کنگ بنت –

انچش پیش ءِ کوشکار یل بیتگ اَنت ھمے وڑ ءَ ھیات ءِ کشندہ ھم یک ناں یک روچے یل کنگ ءُ ڈن ءَ کنگ بیت، پرچا مئے واستا کانون تھنا گُنگ ءُ لنگے ءِ رنگے ءَ اِنت بلے پنجاپستان ءِ واستا اے کانون رھبندانی توک ءَ اِنت آ وتی زھگاں ساٹ اِیت ءُ مئے گردن ءَ ھرّگ ءَ ایر کار اِیت مارا گوش اِیت اے کانون ءَ برز مہ رو کہ ڈیھ ءِ واستا شر نہ اِنت یا ڈیھ ءِ ھلاپ ءَ کارمرد بیت اِنت-

اگاں بلوچ زھرشانی کن اَنت گڑا گوش اَنت راہ ءَ شر شر ءَ بہ رو اِت کہ پاکستان ءِ دیم دنزین بیت، دستاں مہ سُرین اِت کہ پوج ءِ چم اَرس بنت، پاداں ترند ترند ءَ مہ ترپین اِت کہ پوج ءِ کرنلانی بانک اَچ واب ءَ گُڑ اَنت ، اے تھنا مئے مھلوک ءُ بلوچ سرڈگار ءِ بچانی واستا ءَ اَنت ، پاکستان ءِ کانون تھنا پہ وت ءَ اَنت مئے واستا یک تیزداریں کارچے جوڑ کنگ بیتگ-

کانون مئے واستا بس ایش اِنت مئے زالبول وھدیکہ وتی گاریں بچ، برات، پتانی گپ ءَ جن اَنت گڑا آیاں گِر اَنت ءُ زنداناں بندیگ کن اَنت پرچا گوش اَنت آیاں کانون ءِ در نہ ٹک اِتگ بلے چوشیں بازیں زالبول ءُ جنک ھست اَنت آ وتی مردمانی بیگواھی ءِ وھد ءَ کسان بوتگ اَنت ءُ آیاں آمیدگسانی رو ءُ آیاں داں یک اُمرے گوازینتگ –

مئے ورنایاں بے کانون ءَ گر اَنت ءُ آیاں بے آمیدگس ءِ پیش کنگ ءُ سزا دیگ ءَ آیانی لاشاں ڈریل کن اَنت ءُ آیانی چماں کش اَنت ءُ بدن ءِ ھڈ ءُ بنداں پروش اَنت ءُ دست ءُ پاداں گپچل کن اَنت ءُ پد ءَ دروگیں کانون ءِ یک نامے نامین اَنت ءُ گوش اَنت کہ اے دستے پشت ءَ بستگ ءُ چم سیاھیں پٹی ءَ اَنت ءُ ھمے مردماں مئے جلّادیں سپاھیانی سر ءَ اُرش کتگ ءُ دو نیمگی تیرگواری ءَ کشگ بیتگ –

اے کانون بس مئے واستا یک کوشجاھے جوڑ بیتگ ءُ مارا تھنا کوش ءِ پیسلہ ءَ دنت آ ھم چیرکائی اگاں سرزاھری ءَ مئے ورنا ءُ کماش ئِے پاھو بداتین اَنت گڑا انگت ءَ دل ءَ تاھیرے گپتگ اَت کہ بوت کنت مئے مردماں جرمے کتگ ءُ پاھو ئِے داتگ اَنت بلے چیرکائی نامردانی ڈول ءَ آیانی دست ءُ چماں بند اِیت ءُ کش اِیت اِش دانکہ دگہ ورنا اَچ مرگ ءَ بہ ترس اَنت-

ھیات ھما مردماں اَچ یکے سیزدہ اگست ءِ نیمروچ ءَ دمانے پیسر مات ءِ دیم ءَ جلّادیں پوج ءَ ھشت دانگ تیر جت ءُ شھید کتگ – آئی ءِ مات ءَ پریات کتگ کہ ھشتمی تیر ءَ مہ جن اِت بیت کنت منی بچ بہ رک اِیت بلے آ آجزیں مات ءَ نزانتگ کہ اے زالم ءَ اولی تیر ءَ ھیات ءِ ھجل جاہ ءَ جتگ ءُ چریشی ءَ آئی ءَ ھما وھد ءَ وتی ساہ زمین ءِ باھوٹ کتگ-

بلوچ ورنایاں وتی زندگی ءُ مرگ ءَ پاکستان ءِ جلّادیں رسترانی دست ءَ مہ دے اِت، وتی رکینگ ءَ جھد بہ کن اِت دانکہ شما اے بد ءُ سِلیں کانون ءَ وتی ساہ ءَ رکینت کت بہ کن اِت-

شمارا یک بستارے الم ءَ زانگ ءَ اتکگ کہ تئی باریگ ءَ پاکستان ءِ جج ءُ جلّادیں وکیلانی کانون پوج ءِ دست ءَ اِنت بلے وھدیکہ آئی ءِ وتی باریگ کیت اِنت گڑا آ تھنا کانون ءَ وتی اسپر جوڑ کنت ءُ گوش اِیت الکاپیں سبوت نیست ھمے واستا اے مجرم ءَ پاھو ءِ سزا ءَ مٹ کنگ ءُ اُمر ءِ کید ءِ سزا ءَ نامین اِیت ایشی ءَ شما درست دلجم بہ بہ اِت کہ یک روچے ءَ ھمے اُمر ءِ کید مٹ کنگ ءُ سال کمتر کنگ بنت، پد ءَ ھمے کمے سال مٹ کنگ ءُ کمے ماہ کنگ بنت ، پد ءَ ھمے کمے ماہ مٹ کنگ ءُ ھپتگ بنت، ھپتگ مٹ کنگ ءُ روچ بنت ءُ روچ ساھت ھمے میان ءَ جلّادیں رستر یل کنگ ءُ وتی گِس ءَ دیم دیگ بیت ءُ پد ءَ ھمے گپ ءَ گوش اَنت کہ ایشی ءِ سر ءَ کیس سابت نہ بیتگ ءُ آ وتی کیس ءَ بَری بیتگ ءُ یل بیتگ-

بلوچ گوش اَنت جلّاد ھما اَنت ءُ کانون ھما اَنت ھردوک ھما اَنت گڑا کانون ءُ جلّاد ءَ ھچ پرک ءُ پیر نیست گڑا ایشاں پہ زانت اے کار انجام داتگ دانکہ بلوچانی نوک رُستگیں ورنا اَچ بلوچ ءِ زندمان ءَ ھلاس بہ بنت-

اگاں تو مروچی جھد نہ کت گڑا وتی باریگ ءِ ودار ءَ بہ کن کہ اے باریگ ترا ھچبر ماپ نہ کنت آئی ءِ مسلہ بلوچ آجوئی ءِ لوٹوک نہ اِنت آئی ءِ مسلہ بلوچ اِنت ءُ بلوچ درست آجوئی لوٹوک اَنت ھمے واستا وتی رکینگ ءَ بہ جنز چوش مہ بیت تو باندا بے مَٹ ءَ بہ روئے ھمے داب ءَ وتی مٹ ءَ الم بہ بر گوں دانکہ تئی روگ ءَ پد کس اپسوز مہ کنت ایوک ءَ شتگ بلکیں پھر بہ بند اِیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-