ڈیرہ بگٹی : نُھ مردم آوار جنگ ءُ بیگواہ کنگ بیتگ اَنت

بلوچستان ءِ دمگ ڈیرہ بگٹی ءِ جتاجتائیں ھنداں نُھ مردم آوار جنگ ءُ بیگواہ کنگ بیتگ اَنت-

گیشیں ھالانی رِد ءَ ڈیرہ بگٹی ءِ تھسیل سوئی ءَ گوستگیں شپ ءَ دریھان کالونی ءَ سی ٹی ڈی کارندھاں بیڑبرتگ دو مردم آوار جتگ ءُ بیگواہ کتگ اَنت – آوار جنگ بیتگیں ورنایانی نام ءَ امام جان ء کرمان بگٹی ءُ جان محمد ء دادان بگٹی نام ءَ چہ بیتگ اَنت – دوئینانی سیادی بگٹی ٹک ءِ جھلی شاک موندانی ءَ اِنت- اھوالکار رِد ءَ بیگواھیں ورنا نامی ئیں ٹھیکیدار سیٹھ جمعہ خان گرانی بگٹی ءِ برازتک اَنت-

مردمانی گوشگ ءِ رِد ءَ بیڑ میان ءَ سی ٹی ڈی ءِ کارندھاں لوگاں چہ سے چرائی، زالبولانی سُھر ءُ دگہ گرانبھائیں سامان ھم وتی ھمراھی ءَ برتگ اَنت-

اے ھم گوشگ بیگ ءَ اِنت کہ ٹھیکیدار جمعہ خان ءَ چہ سی ٹی ڈی ءِ ایس ایچ او عمر کھوسہ دہ لک ھرچ ماہ ءَ لوٹ اِتگ – زر نہ دیگ ءِ سر ءَ کارندھاں لوگانی سر ءَ بیڑبرتگ لُٹ ءُ پُل کتگ آئی ءِ برازتک بیگواہ کتگ اَنت-

ھمے وڑ سوئی ءِ تھسیل بازار ءَ ھم سی ٹی ڈی کارندھاں دگہ دو ورنا آوار جتگ ءُ بیگواہ کتگ اَنت کہ آیانی پجّار قمبر ء راحک بگٹی ءُ ملھار ء کشمیر بگٹی نام ءَ چہ بیتگ اَنت-

ھمے پاکستانی پوج ءَ ڈیرہ بگٹی ءِ ھند سوئی ءَ بگرا کالونی ءُ بگٹی کالونی ءَ بیڑ برتگ بیڑ برگ ءِ میان ءَ گوں مردماں زوراکی کتگ لوگ پٹ ءُ پول کتگ اَنت پنچ مردم آوار جتگ آیانی نام ابراھیم ء رستم بگٹی، لاکرم ء منشی بگٹی، احسان ء شریف بگٹی، ماندھا بگٹی ء اٹل بگٹی ءُ نوردین ء زُنو بگٹی اِنت۔

ھمے وڑ سی ٹی ڈی کارندھاں سوئی ءِ بازار ءَ چاہ ءِ ھوٹل ءَ کارکنوکیں یوسف ء شیرمحمد بگٹی نامیں مردمے آوار جتگ ءُ بیگواہ کتگ ۔