سپریم کورٹ ءَ ھیات بلوچ ءِ کوش ءِ کیس، مرگ ءِ سزا ءِ بندوک اُمر ءِ کید ءَ بندیگ

پاکستان سپریم کورٹ ءَ ھیات بلوچ ءِ کوش ءَ مرگ ءِ سزا واریں فرنٹیئر کور ایف سی ءِ کارندہ شادی اللہ ءِ سزا امر کید ءَ مٹ کتگ-

اے پیسلہ سپریم کورٹ ءَ جار جتگ کہ ایشی ءِ تہ ءَ آمید گس ءَ گشتگ کہ اے کیس ءِ تہ ءَ سبوت ناکابل انکاری المی ھست انت بلے شک ءِ نیت ءَ پش کپ ایت۔

پاکستانی اھوالکار حامد میر ءَ چاگردی ویب سائیٹ ٹویٹر ءِ سر ءَ نبشتگ کہ حیات بلوچ ءِ کوش کنوکیں ایف سی ءِ افسر ءِ موت ءِ سزا سپریم کورٹ ءَ کمتر کتگ ءُ عمر قید ءَ بدل کتگ۔ ایف سی ءِ افسر ءَ بے میاریں حیات بلوچ زمین ءِ سرا ایر کتگ ءُ آئی ءِ بزگیں مات ءُ پتانی دیم ءَ 8 تیر جتگ۔

اے پیسلہ چہ اے کیس ءَ پنچ سال ءَ پد بوتگ کہ ایشی ءَ چہ 2020 ءَ بلوچستان ءَ راج ءِ مزنیں لیکھے دیم ءَ اتکگ۔

سیزدہ اگست 2020 ءَ تربت ءِ دمگ آپسر ءَ یک ویلے بوتگ۔ کراچی یونیورسٹی ءِ نودربر حیات مرزا بلوچ وتی مات ءُ پت ءِ ھمراھی ءَ مَچانی باگ ءَ بوتگ کہ ایف سی ءِ گاڑی ءِ کش ءَ تراکے کپتگ۔ تراک ءَ پد ایف سی ءِ کارندھاں کش ءُ گور ءِ مردم داشتگ انت۔

چمدیستگیں مردمانی گشگ ءِ رد ءَ اے کارندھاں حیات بلوچ زمین ءِ سرا واپینتگ د ءُ آئی ءِ دست آئی ءِ پُشت ءَ بستگ ءُ آئی ءِ پیریں مات ءُ پتانی دیم ءَ ھشت تیر جتگ۔

ویل جاپ ءَ ھستیں مردماں گْوشتگ کہ حیات بلوچ ءِ مات ءُ پت ءَ پریات کتگ کہ مئے چُک بے گناہ اِنت بلے افسر ءَ تیرگواری برجاہ داشتگ۔

سوشل میڈیا ءَ اے وئیل ءِ اکس ءُ ویڈیو وائرل بوتگ انت چریشی ءَ پد بلوچستان ءَ سکیں زھرشانی ءِ بندات بوتگ – چاگردی مھم ءَ میان استمانی تک ءَ ھم دلگوش گپتگ۔

کوش ءَ پد ایف سی ءَ بندات ءَ اے وئیل رد کتگ بلے راج ءِ زور ءَ پد شادی اللہ دزگیر کنگ بوتگ۔

تربت ءِ ضلعی ءُ سیشن کورٹ ءَ 20 جنوری 2021 ءَ شادی اللہ ءَ را کوش ءِ پاھو ءِ سزا داتگ ءُ کشگ بیتگیں مردم ءَ جرمانہ ءِ پرمان داتگ۔

جرمدار پد ءَ بلوچستان ہائی کورٹ ءَ اپیل کتگ کہ چہ اود ءَ اے کیس گڈی ءَ سپریم کورٹ ءَ سر بوتگ۔ آمیدگس آمید گس ءَ پاھو ءِ سزا اُمر کید ءَ بدل کتگ۔