بلوچستان ءِ دمگ کولواہ ءُ ھاران ءَ لیویز فورس ءِ کارندھے ءَ ھوار دو مردم پاکستانی لشکر ءِ دست ءَ زورانسری بیگواہ کنگ بیتگ اَنت۔
گوستگیں روچ ءَ کولواہ ءِ دمگ آشال ءِ نندوکیں رضائی ء گزو پاکستانی لشکر ءِ فرنٹیئر کور ءَ زورانسری بیگواہ کتگ ءُ چہ ایشی ءَ پد آئی ءِ بابت ءَ ھچ وڑیں ھال ءُ اھوال سر نہ بیتگ انت-
چہ ھاران ءَ کاؤنٹر ٹیررازم ڈیپارٹمنٹ ( سی ٹی ڈی) ءُ انٹیلی جنس ایجنسیانی کارندھاں یک دمگی لیویز کارندھے دزگیر کتگ ءُ زورانسری بیگواہ کتگ۔ بیگواھیں کارندہ ءِ پجار خاران ءِ نندوکیں بشیر احمد کبدانی ء حاجی محمد حسین کبدانی ءِ نام ءَ بوتگ۔
اھوالانی رد ءَ 19 اکتوبر ءَ شپ ءِ 11 بج ءِ نزیک ءَ کارندھاں بشیر احمد ءِ لوگ ءَ اُرش کتگ ءُ آئی ءِ دزگیر کنگ ءَ پد آئی ءَ را ناشناسیں جاھے ءَ برتگ۔ ھاندان ءِ رد ءَ دیم پوشیں مردم سی ٹی ڈی ءَ گوں ھمگرنچ زانگ بوتگ اَنت۔
کھول ءِ گْوشگ اِنت کہ چہ اے وئیل ءَ پنچ روچ گوزگ ءَ پد ھم چہ بشیر احمد ءَ ھچ وڑیں ھال ءُ اھوالے نہ رس اِتگ۔ ایشاں وتی ترس درشان کتگ کہ بشیر احمد درکانودی بندی جاہ ءَ بند انت۔