بلوچستان ءِ جتاجتائیں دمگاں بیتگیں اُرشانی زمہ واری بی ایل ایف ءُ یو بی اے ءَ منّ اِتگ اَنت

بلوچستان ءَ جتاجتائیں دمگاں پاکستانی پوج، بند ساچی شرکت، دگانی بندگ ءُ سلاھانی دستیگ کنگ زمہ واری بی ایل ایف ءُ یو بی اے ءَ منّ اِتگ اَنت

بلوچستان لبریشن فرنٹ ءَ شنگ کتگیں درشان ءِ تہ ءَ گوشتگ کہ مئے سرمچاراں 24 اکتوبر ءِ سُھب ءَ ساھت دہ ءِ نزیک ءَ آواران ءِ دمگ نودڑہ بریت سر ءَ زورگریں پاکستانی پوج اُرش ءِ نشانگ کتگ اَنت چریشی ءِ آسر ءَ چار کارندہ جاہ پہ جاھی مرتگ اَنت ءُ بازین ئِے ٹپی بیتگ اَنت – سرمچاراں یک ادارے ءَ دراجکشیں میڑ ءَ مرتگیں پوج ءِ کارندھانی سلاہ دستیگ کتگ اَنت-

جارکش ءَ گوشتگ اے اُرش ءَ سرمچاراں پیسر ءَ بُنجل ءِ نزیک ءَ پیادگ گشت کنوکیں چار پوج ءِ کارندہ ھما وھد ءَ اُرش ءِ نشانگ کتگ اَنت وھدے آ بُنجل ءِ نزیک ءَ گشت کنگ ءَ بیتگ اَنت- آیانی کُمک ءِ ھاتر ءَ بکتر بند گاڑی یے اتکگ ءُ سرمچاراں بکتر بند گاڑی سر ءَ تُرندیں اُرشے کتگ چریشی ءِ آسر ءَ آ پُشت کنزی ءَ لاچار بیتگ- سرمچارانی اُرش ءَ بکتر بند ءَ سک تاوان رس اِتگ – سرمچاراں بُنجل ءَ پٹ کتگیں سرویلنس کیمرہ ءَ ھوار یک کواڈ کاپٹرے ھم نشانگ کتگ ءُ تاوان داتگ ءُ کاروائی ءِ سرجم کنگ ءَ پد پہ سلامتی دراھگ ءَ وتی مُھریں اوتاکاں سر بیگ ءَ سوبمند بیتگ اَنت-

جارکش ءَ گوشتگ بلوچستان لبریشن فرنٹ ءِ سرمچاراں 23 اکتوبر ءَ نال ءُ ھُزدار ءِ نیمگ ءَ رؤکیں سی پیک لنک شھدگ سر ءَ دو جتاجتائیں ھندانی سر ءَ سے کلاک ءَ تاں ناکہ بندی کتگ ءُ پٹ ءُ پول کتگ – اے میان ءَ سرمچارانی دگہ یک ٹولی یے ءَ نال ءَ پولیس اسٹیشن سر ءَ اُرش کتگ ءُ کارمند دزگیر کتگ ءُ جُست پُرس ءَ پد آ یل داتگ اَنت بلے تھانہ ساڑی سرکاری مشینری ءُ بازیں گاڑی یے مانداشتگ اَنت-

جارکش ءَ گوشتگ نال ءَ کلیڑی ءَ پُلپنانچیں شرکت ءِ بند ساچی بُنجل سر ءَ اُرش کتگ آئی ءِ مزنیں مشینری تاوان داتگ اَنت ءُ کنسٹرکشن کمپنی ءَ کارکنوکیں سرجمیں کارندہ دزگیر کتگ اَنت کہ آ تنی وھدے گل ءِ دست ءَ اَنت جُست ءُ پُرس برجاہ ءَ اِنت-

جارکش ءَ گوشتگ دگہ کاروائی یے بیست دو اکتوبر ءَ بلوچستان لبریشن فرنٹ ءِ سرمچاراں مستونگ ءِ دمگ کھڈکوچہ ءَ بلوچستان ءِ مڈیاں پُلّگ ءَ بروکیں گاڑی اُرش ءِ نشانگ کتگ اَنت-

ھمے وڑ یونائیٹڈ بلوچ آرمی ءَ شنگ کتگین درشان ءِ تہ ءَ گْوشتگ کہ مئے سرمچاراں بیست چار اکتوبر ءِ سُھب ءَ کساس 9:50 ءَ کچی ءِ دمگ سنی ءَ رودی کور ءِ ھند سر ءَ زورگریں پاکستانی پوج ءِ کاروان ءَ ھوار بمب ڈسپوزل اسکواڈ ھما وھد ءَ ریموٹ کنٹرول بمب تراک ءَ چہ نشانگ کتگ وھدے آ دگ ءِ ساپ کنگ ءَ دلگوش بیتگ اَنت-

جارکش ءَ گوشتگ لشکر ءِ کاروان سنی ءِ بُنجاھی بُنجل ءَ چہ ڈھاڈر شھر نیمگ ءَ روگ ءَ بوتگ – تراک ءِ آسر ءَ بمب ڈسپوزل اسکواڈ ءِ یک کارندھے جاہ پہ جاھی مرتگ وھدے کہ سے کارندہ سک ٹپیگ بیتگ اَنت – کہ اشی ءِ زمہ واری ءَ مئے گل یو بی اے منّ اِیت-