ریاستی رٹ ءِ ٹاہ : بلوچستان ءَ گوستگیں بیست ءُ چار کلاکانی تہ ءَ بیست ھپت کارندہ آوار جنگ ءُ سلاہ بندانی ناکہ بندی

بلوچستان ءَ ریاستی رٹ ءِ یکشلیں ٹاھاں چہ بلوچستان ءِ جتاجتائیں دمگاں گوستگیں روچاں سلاہ بندیں کاروائیانی تُرسناکے ءَ گیش گندگ آیگ ءَ اِنت-

گوستگیں بیست چار کلاکانی تہ ءَ ھُزدار، مستونگ، کلات ءُ آواران ءَ ھوار جتاجتائیں دمگاں سلاہ بندیں مردماں پاکستانی پوج ءُ سرکاری شوربندی ءُ بند ساچی شرکتانی سر ءَ اُرشانی میان ءَ اود ءَ ساڑی بیست ھپت کارمند آوار جتگ اَنت، دہ ءَ چہ گیش گاڑی مانداشتگ اَنت وھدے کہ اُرشاں پوج ءَ جانی تاوان چست کنگ کپتگ-

گوستگیں شپ ءَ بلوچستان ءِ دمگ ھُزدار ءِ تھسیل نال ءَ سلاہ بندیں مردماں شش کلاکاں چہ دستیگ کتگ، پولیس چوکی ءُ بند ساچی شرکت ءِ بُنجل سر ءَ دستیگ کنگ ءَ پد ھژدہ کارمند آوار جتگ اَنت،وھدے کہ مشینری ءُ گاڑی مانداشتگ اَنت-

اِھوالکار ءِ رِد ءَ مروچی آواران ءِ دمگ جھاؤ نوندڑہ ءَ بلوچ سرمچاراں پوج سر ءَ سنگر گپتگ ءُ اُرش ءَ پد کُشگ بیتگیں پوجی کارندھانی پوجی ساز ءُ سامان ھم دستیگ کتگ ءُ گوں وت برتگ اَنت-

پاکستانی پوج ءِ بنشون ءَ مروچی آواران ءَ بیتگیں اُرش ءَ چار کارندھانی کوش ءُ یکے ٹپی بیگ گپ راست ھم کتگ-

ھمے وڑ بلوچ آجوئی لوٹوکیں سلاہ بندیں گلاں پاکستان چائنہ ایکونومک کوریڈور ” سی پیک ” شھدگ سر ءَ جتاجتائیں ھندانی سر ءَ ناکہ بندی برجاہ داشتگ پٹ ءُ پول برجاہ داشتگ اے اُرشانی آسر ءَ پاکستانی پوج ءِ سُر ءُ پُر دارگ بیتگ اَنت وھدے کہ بازیں دمگاں سرکاری ادارھانی سر بیگ اسرمند بیتگ اَنت-

ھمے وڑ پھازوکی تُرس ءَ کراچی ءَ چہ شال ءُ شال ءَ چہ لاھور ءُ پشاور رؤکیں ریل سروس انگت اسرمند اِنت چریشی ءِ پچ کنگ ھاتر ءَ ریل ءِ واکدار پوج ءَ چہ پچ کنگ واستا ھال کنگ ءَ اِنت-

زانگ بہ بیت کہ بلوچستان ءَ صوبائی ھکومت ءُ پوج ءِ نیمگ ءَ چہ ریاستی ٹاہ یکو دیم ءَ کاینت وھدے کہ اے میان ءَ پاکستان پوج ءَ بلوچستان ءِ دمگ ھُزدار ءُ دالبندین ءَ بلوچ آجوئی لوٹوکانی ھلاپ ءَ لشکر کشی ءِ جار ھم جتگ-

بلے پاکستانی پوج ءُ صوبائی ھکومت ءِ نیمگ ءَ چہ ایمنی یکو جنگ بیتگین ٹاھاں ابید، زمینی راستی اے گپ ءَ پدر کنت کہ بلوچستان ءِ بازیں دمگ یکشل ءَ بلوچ آجوئی لوٹوکانی دست ءَ اَنت اود ءَ ریاستی رٹ ءِ کمی ءُ سلاہ بندیں تاکتانی ساڑی بیگ گندگ کئیت-