بلوچستان ءِ شھدگ مرگ راہ، 5 سالانی تہ ءَ 77 ھزار ویل، 1700 ءَ چہ گیش مردم بیران بوتگ انت-
میڈیکل ایمرجنسی رسپانس سینٹر 1122 ءِ رپورٹ ءِ رد ءَ بلوچستان ءَ اکتوبر 2019 ءَ بگر داں ستمبر 2025 ءِ نیام ءَ جتا جتائیں شھدگانی سر ءَ 77826 ٹریپک ویل بوتگ انت کہ اے ویلانی تہ ءَ 1743مردم بیران ءُ 103902 مردم ٹپیگ بوتگ اَنت۔
رپورٹ ءِ تہ ءَ گشگ بوتگ کہ بلوچستان ءَ ویلانی درچ سرجمیں ملک ءَ گیشتر انت، ءُ ھر گوزوکیں سال ءَ جاور گیش نگیگ کنگ ءَ انت۔
کچ ءُ کساسانی رد ءَ گیشتریں ویل نیشنل ہائی وے این 25 (کراچی ءَ بگر داں چمن) ءَ بوتگ انت کہ اود ءَ 35113 ویل بوتگ انت کہ ایشی ءِ تہ ءَ 900 مردم بیران بوتگ انت۔ اے شھدگاں بلوچستان ءِ مستریں تجارتی شریان انت بلے پروشت ءُ پروش ءُ یک نیمگی ، ترند روی ءُ مزنیں ٹریپک ءَ ایشی ءِ راہ ءُ رھبند ھراب کتگ انت-
ھمے رنگ ءَ این 50 شھدگ (شال ءَ بگر داں ڈیرہ اسماعیل خان) ءِ سر ءَ 24694 ویل بوتگ انت کہ ایشی ءِ تہ ءَ 421 مردم بیران بوتگ اَنت۔ اے راہ تنک، موڑ ءُ بے رُژنائی اِنت کہ شپ ءَ ایشی ءِ سر ءَ گاڑی ءِ رؤگ سک ترسناک اِنت۔
ایمرجنسی رسپانس سینٹر ءِ رد ءَ این 85 (سوراب ءَ بگر داں پنجگور)، این 70 (لورالائی ءَ بگر داں ڈی جی خان) ءِ سر ءَ ھم ویل ھال دیم ءَ اتکگ۔