بلوچستان ءِ دمگ چہ مستونگ ءَ لھتیں روچ پیسر آوار جنگ بیتگیں پولیس افسر ءِ جون دست کپتگ ۔
پولیس ءِ رد ءَ ڈی ایس پی محمد یوسف ریکی ءِ لاش مستونگ ءِ دمگ کردگاپ ءَ گرگینا کالی شربت خان ءَ دست کپتگ۔ دمگ ءِ لیویز انچارج غلام سرور ءَ گشتگ کہ لاش لھتیں کلاک ءِ بوتگ ءُ بیران بوتگیں مردم ءِ سر ءُ بدن ءِ سر ءَ تیرگواری بوتگ۔
آئی ءَ گیش گوشتگ کہ جون شال ءَ پہ کانونی چار ءُ تپاس کنگ ءَ دیم دیگ بوتگ ۔
نوشکی پولیس ءِ سروک ایس پی اللہ بخش ءِ رد ءَ بیران بوتگیں ڈی ایس پی محمد یوسف ریکی نوشکی ءَ سب ڈویژنل پولیس افسر ءِ بستار ءَ بوتگ۔ آئی ءَ پنچ روچ پیسر شمبے ءُ یک شمبے ءِ نیام ءَ شپ ءَ چہ نوشکی ءَ سوراب ءَ وتی لوگ ءَ روگ ءِ وھد ءَ مستونگ ءِ کردگاپ ءِ دمگ ءِ نزیک ءَ ناشناسیں سلاہ بندیں مردماں چہ گاڑی ءَ ھوار آوار جتگ بیتگ-
پولیس ءِ رد ءَ آوار جنگ ءَ چہ لھتیں ساھت پیسر محمد یوسف ریکی ءَ وتی لوگی ءَ را فون کتگ ءُ گْوشتگ کہ من ءَ سلاہ بندیں مردماں دزگیر کتگ۔ ایشی ءَ چہ پد گوں آھاں رھوت کٹ بیتگ-
بنداتی پٹ ءُ پول ءِ رد ءَ آ ابید ءِ پھزدار ءَ مزن شھدگ ءَ سپر کنگ ءَ ابید کوھی دمگاں سپر کنگ ءَ بیتگ ءُ تنی وھدی آئی ءِ گاڑی دز نہ کپتگ-
پولیس ءِ واکدارانی گوشگ انت کہ آوار جنگ ءُ کوش ءِ سبب انگت زانگ نہ بیتگ اَنت ۔
زانگ بہ بیت کہ گوستگیں ماہ ءَ سوراب ءِ نزیک ءَ مستونگ پولیس ءِ ڈی ایس پی ناشناسیں مردمانی دست ءَ آوار جنگ بوتگ بلے لھتے روچ ءَ پد یل دیگ بیتگ ات۔
دومی نیمگ ءَ مستونگ ءِ دمگ دشت ءَ چہ سیا پشت ءَ 9 مزدور آوار جنگ بوتگ انت ۔
تھانہ دشت لیویز ءِ SHO اختر محمد ءِ رد ءَ اے وئیل سئے روچ پیسر بوتگ۔ مزدور چیک پوسٹانی جوڑ کنگ ءِ کار ءَ بیتگ انت کہ نامالومیں سلاہ بندیں مردماں آوار جتگ انت۔
آئی ءِ گشگ اِنت کہ انگت ءَ کیس نبشتہ نہ بوتگ پرچا کہ سیادی داروکیں ٹھیکیدار ءُ واکداراں درھواست نہ داتگ-