بلوچ کارکناں فورتھ شیڈول ءَ ھوار کنگ بُنکی انسانی ھکانی ھلاپ ورزی اِنت- بی وائی سی

بلوچ یکجھتی کمیٹی ءِ بُنجاھی درشان ءِ تہ ءَ گوشتگ کہ پاکستان انسداد ناشرکاری ءِ 1997 ءِ فورتھ شیڈول ءَ بازیں بلوچ کارکنان ءُ انسانی ھکانی پھاز کنوکاں وتی مستری ءُ درکانودی ھساب ءَ ھوار کنگ یک تُرسناکیں ءُ دلپدردیں کارے، چریشی ءِ مول ءُ مراد پُرایمنیں سیاسی ءُ انسانی ھکانی جُھد ءِ ایرموش کنگ، چائزیں اکتلاپ ءِ دارگ بے توار کنگ ءُ انسانی ھکانی کارکناں میاربار گوشگ اِنت-

درشان ءِ تہ ءَ گوشگ بیتگ کہ گل بازیں بُنجاھی ءُ دمگی رھشون ءُ ھمگرنچیں کارکنانی نام بید چشیں پلگاریں کانودی کار، منّانک ءِ فورتھ شیڈول ءَ ھوار کتگ اَنت- ھوار کنگ بیتگیں مردمانی نام-

ھُزدار : ڈاکٹر صبیحہ بلوچ ( بُنجاھی رھشون ، سمی دین ءُ دمگی مردم شکیل احمد ، عبدالغنی، حبیب اللہ، محمد طارق ، ءُ شفیق الرحمن ساسولی وھدے کہ چہ کیچ ءَ نازگل ءُ سید بی بی ( دوئیں گل ءِ کارکن اَنت، ءُ ڈاکٹر شلی، کہ بلوچ وویمن فورم ءِ آرگنائزر لسٹ ءَ ھوار اَنت-

چہ چاگہ ءَ سرجم بیست شش مردم کہ چہ تھسیل دالبندین ءَ دوازدہ، چہ تھسیل نوکنڈی یازدہ، ءُ چہ تھسیل تفتان ءَ سے مردم ھوار اَنت – اے سرجمیں مردم پُرایمن انسانی ھکانی پھاز، نودربر ءُ کمیونٹی آرگنائزر اَنت-

بلوچ یکجھتی کمیٹی ءَ گوشتگ کہ اے مردم فورتھ شیڈول ءَ ھوار کنگ بُنکی زمانتانی وڑ انساپ ءِ گوشدارگ، گل سازی ءِ آجوئی، ءُ ھیال ءُ لیکہ ءِ آجوئی ءِ ھلاپ ورزی اِنت – اے کار ناں تھنا آئین بلکیں میان استمانی انسانی ھکانی کانود ءِ ھم توھین اِنت-

جارکش ءَ درشان ءِ تہ ءَ گوشتگ کہ انسداد ناشرکاری ءِ کانود ءَ را رد کارمرز کنگ ریاست ءُ بلوچستان ءِ راج ءِ میان ءَ ستک ءِ سیادی ءَ گیش نزور کنگ ءَ اِنت ءُ کانود ءِ ھکمرانی ءَ نزور کنگ ءَ اِنت-

درشان ءِ رِد ءَ بلوچ یکجھتی کمیٹی ءَ ھکومت پاکستان ءَ چہ لوٹ کتگ کہ آ فورتھ شیڈول ءَ ھوار سرجمیں بے میاریں مردمانی نام ءَ زوت در بکنت ءُ انسانی ھکانی کارکنانی ھلاپ ءَ انسداد ناشرکاری ءِ کانود ءَ بستار سیاسی سلاہ ءِ کارمرزی ءِ درچ ءَ بند بہ کنت-

بلوچ یکجھتی کمیٹی ءَ راجی ءُ میان استمانی انسانی ھکانی گلاں، سول سوسائٹی، ءُ میانی استمانی مردماں چہ دزبندی کتگ کہ آ اے درانسانی گامگیج ءِ سر ءَ سنجیدگی ءَ چہ بزور اِیت ءُ سرجمیں بلوچ کارکنانی گوم ءَ ھمدردی بہ کن اَنت کہ آیانی یکیں جرم وتی راج ھک ءُ ازت ءِ ھاتر ءَ توار چست کنگ اِنت-

دومی نیمگ ءَ ڈاکٹر صبیحہ بلوچ ءَ وتی شنگ کتگیں درشان ءِ تہ ءَ گوشتگ کہ پیپلز پارٹی ءِ بلوچستان ءَ اُگّدہ ءِ رسگ ءَ پد انسداد ناشرکاری کانود ءِ رد کارمرزی ءِ تہ ءَ گیشی اتکگ، ءُ اے کانود سیاسی اکتلاپ داروک ءُ انسانی ھکانی کارکنانی ھلاپ ءَ سلاہ ءِ دروشم ءَ کارمرز کنگ ءَ اِنت-

ڈاکٹر صبیحہ ءَ گوشتگ اے ماہ ءَ من، سمی دین بلوچ، وویمن فورم ءِ شلی بلوچ، بی وائی سی ءِ آ دگہ کارکناں اَبید ڈیرہ بگٹی ءِ 32 ، دالبندین ءَ 26 ءُ کیچ، ھُزدار ، ھاران ، کلات ءُ منگوچر ءَ بازیں شھری یے فورتھ شیڈول ءَ ھوار کتگ اَنت-

ڈاکٹر صبیحہ بلوچ ءَ گْوشتگ کہ آ ایگزٹ کنٹرول لسٹ ءَ ھم ھوار کنگ بیتگ ءُ ھکومتی سمن ھم رستگ – آئی ءِ رِد ءَ بلوچستان ءَ زورانسری آوار جنی ءِ تہ ءَ گیشی گندگ آیگ ءَ اِنت وھدے کہ ھزارانی شھریانی نام ناشرکاری واچ لسٹ ءِ تہ ءَ ھوار کنگ بیگ ءَ اَنت-

آئی ءَ کڈن کتگ کہ اگاں مروچی انسداد ناشرکاری ءِ کانود ءِ رد کارمرزی ءِ سر ءَ توار چست کنگ نہ بیت آؤکیں وھداں سرجمیں پاکستان ءِ واستا ھترناکیں آسر دیم ءَ کئیت-