بلوچستان ءِ دمگ اوتھل ءَ پاکستانی لشکر ءِ نیمگ ءَ بسانی دراجیں چیک ءِ وھد ءَ جانسلامتی ءِ کمک ءِ دیر کنگ ءِ سبب ءَ نادراھیں جنکوی بیران بوتگ۔
چمدیستگیں مردمانی رد ءَ شپ ءِ دیر ءَ بندات بوتگیں چیک ءَ تان سھب ءَ برجاہ بوتگ کہ ایشی ءِ تہ ءَ بازیں کچے ءَ مساپر ھمے رش ءُ کَش ءِ میان ءَ مھتل بیتگ انت-
مساپرانی رد ءَ اے وئیل سئے شمبے ءُ چار شمبے ءِ نیام ءِ شپ ءَ بوتگ کہ چہ بلوچستان ءَ کراچی ءَ روگ ءَ بازیں بس اوتھل چیک پوسٹ ءَ اوشتارینگ بوتگ اَنت۔
مساپرانی گشگ انت کہ بس 3 بج ءَ اوتھل ءَ سر بوتگ انت بلے پورسز ءَ درستیں بس داشتگ انت۔ بے تھمبلی ءَ چک ءُ تان کتگ انت۔ سھب ءِ نزیک ءَ زانگ بوت کہ بسانی تہ یَ یک جنکوی ءِ جاور ناگیگ انت۔ مات ءُ پتاں یکشل ءَ کمک لوٹ اِتگ بلے دیم ءَ روگ ءِ اجازت کس ءَ نہ داتگ۔
آیاں گوشتگ کہ اگاں لشکر ءَ مساپرانی دیم ءَ روگ ءِ اجازت داتگ اَت یا نزیکیں نادراھجاہ ءَ سر بوتگ اَت گڑا جنک ءِ جان رکّینگ بوت کنت بوتگ ات۔
آیاں گوشتگ کہ ما درستاں لوٹ کتگ کہ بس ءِ روگ ءِ اجازت دیگ بہ بیت پرچا کہ جنک بے ھوش بوتگ اَت۔ بلے مارا گْوشگ بوتگ کہ داں چیکنگ سرجم نہ بیت ھچ گاڑی ھچ وڑ ءَ رھادگ نہ بیت۔ لھتیں وھد ءَ پد جنک ءِ ساہ داتگ ۔
مساپرانی گشگ انت کہ بس اوتھل چیک پوسٹ ءَ باز براں کلاکانی کلاک دارگ بنت کہ ایشی ءَ چہ نہ ایوک ءَ لس مساپراں مشکل بیت بلکیں برے برے ہسپتال ءَ وھد ءِ سر ءَ سر بوھگ ھم مشکل بیت۔ اے اولی وئیل نہ انت۔ مساپراں کلاکانی کلاک مھتل بیگی انت- اگاں چیکنگ المی اِنت گڑا دگہ رھبندے ھست بہ بیت دانکہ انسانی جان ھترہ ءَ مہ کپ اَنت۔
پاکستانی لشکر ءَ بلوچستان ءِ جتاجتائیں دمگانی چیک پوسٹ جوڑ کتگ انت، بلے اے چیک ءِ کار ءِ سر ءَ شھریاں نیمگ ءَ وھد وھد ءِ سر ءَ ایرادی ھست انت۔ انسانی ھکانی گلاں ھم گوستگیں وھداں دراجیں سیکورٹی چیک ءِ وھد ءَ لس مھلوک ءِ دیم ءَ آؤکیں جیڑھانی سر ءَ زھر ءِ درشان کتگ۔