بلوچستان ءِ آجوئی لوٹوکیں سلاہ بندیں گلانی ھمسنتیں گل بلوچ راجی آجوئی سنگر (براس) ءِ جارکش بلوچ ھان ءَ رسانکدراں وتی شنگ کرتگیں درشان ءِ تہ ءَ گوشتگ کہ براس ءِ چیردستی ءَ ھزدار ءِ دمگ زھری ءَ زورگریں پاکستانی پوج ءَ پہ زوراکی ءِ نیمون ءَ دیم ءَ آیگ ءِ جھد کتگ کہ چریشی ءَ ترندیں میڑ بندات بوتگ ۔ اے میڑاں دژمن ءِ بازیں کارندہ مرتگ انت ءُ بلوچ راجی آجوئی سنگر ءِ شش سرمچار ڈیھ ءِ دیمپانی ءَ نمیران بوتگ انت ۔
جارکش ءَ گوشتگ کہ نمیران بوتگیں سنگتانی تہ ءَ سنگت حافظ محمد عمر بلوچ ءُ سنگت عبدالعزیز بلوچ ھمے وڑ 26 ستمبر ءَ سنگت ثناء اللہ بلوچ، سنگت عبدالعزیز بلوچ، سنگت راشد احمد بلوچ ءُ سنگت فیاض بلوچ 30 ستمبر ءَ نمیران بوتگ انت ۔
جارکش ءَ گوشتگ کہ نمیرانیں سنگت حافظ محمد عمر بلوچ پنام ءِ جانان ء نوراللہ شال ءِ جھمنند بوتگ کہ دو سال ساری بلوچ لبریشن آرمی ھوار بوتگ ۔ حافظ عمر بلوچ ءَ وانگ ءِ وھد ءَ سیاسی زانشت دربرتگ ءُ ریاستی زوراکیانی بگیری ءَ سلاہ بندیں جھد ءِ راہ گپتگ ۔ کہ پد ءَ رند ءَ بی ایل اے ءَ ھوار بوگ ءَ پد پوجی ھیلکاری دربرتگ بازیں کارانی سروکی ءِ کتگ ۔ آ وتی لیکھی پھتوی ، گلی راہ ءُ رھبند ءُ نترسی ءِ سوب ءَ سنگتانی تہ ءَ بے مٹ بوتگ ، آئی ءِ پگر ءُ ھیال بس بلوچستان آجوئی ءُ وتواکی بوتگ کہ پریشی ءَ آئی ءَ وتی زند کربان کتگ ۔
براس ءِ جارکش ءَ گوشتگ کہ نمیرانیں سنگت عبدالعزیز بلوچ پنام ءِ کلیم اللہ ء پیر محمد کلات ءِ دمگ کھڈی نندوک بوتگ ۔ آ پنچ ماہ ساری بلوچ لبریشن آرمی ءَ ھوار بوتگ ۔ بلے آئی ءِ پوجی پند کم بوتگ بلے آئی ءَ وتی دلیری ءُ تمردی ءَ اے پدر کتگ کہ آجوئی ءِ جھد امر ءُ تجربگ مھتاج نہ انت ۔ کلیم اللہ وتی سنگتانی تہ ءَ وشگپتار ءُ نرم دل ءُ ادبداریں رنگے ءَ زانگ بوتگ وھدیکہ جنگ ءِ پڑ ءَ آ دلیری ءُ رھبندانی سر ءَ من اتگیں بے دروریں مردمے بوتگ ۔
بلوچ ھان ءَ گوشتگ کہ نمیرانیں سنگت ثناء اللہ بلوچ پنام ءِ بٹے خان ء پیر ولی بھٹار زھری جھمنند بوتگ ءُ چار ماہ ساری بی ایل اے ءَ ھوار بوتگ ۔ کسانیں وھدے ءِ تہ ءَ وتی زانشت، جزبگ ءُ پوجی کارشونیانی سرا آئیءَ جتائیں جاھے گپتگ ۔ شھری گوریلہ ءِ دروشم ءَ آئی ءَ دژمن ءِ سر ءُ پرانی سر ءَ ایر کنگ ، ھال اھوال ءُ زمین ءِ پھازگے دیمپانی جوانیں کرد ءِ پیلو کتگ ۔ وتی گڈی ساہ ءَ تاں ڈیھے دیمپانی ءَ گوں دژمن دیم پہ دیم بوتگ ۔
جارکش ءَ گوشتگ کہ نمیرانیں سنگت عبدالعزیز بلوچ پنام ءِ محمد ابراہیم ء عبدالحکیم کھڈی، کلات ءِ جھمنند بوتگ ۔ آ گھگیری سیاست ءِ کارکنوکیں باسکے بوتگ کہ آئی ءَ بلوچ ورنا سیاسی زانت ءُ سرپدی داتگ ءُ گل ءِ چیریں کار کتگ انت پد ءَ رند ءَ بلوچ لبریشن آرمی ءَ ھوار بوگ ءَ پد آئی ءَ فیلڈ آپریشنانی تہ ءَ جوانیں کرد پیلو کتگ ۔ آ رھبند ، برشانی ءُ لیکھی پیکرے زانگ بوتگ کہ آئی ءَ جھد ءَ را لیکہ داتگ ۔
آئی گوشتگ کہ نمیرانیں سنگت راشد احمد زہری پنام ءِ جمال خان ء محمد اشرف زہری نورگامہ زہری ءِ جھمنند بوتگ ۔ آئی ءَ نوزدہ سال ءِ امر ءَ آجوئی ءِ راہ گچین کتگ ءُ سے ماہ ساری بی ایل اے ءَ ھوار بوتگ ۔ کسانسالی ءَ ابید آئی ءَ وتی دلیری ءُ تمردی ءَ اے پدر کتگ کہ آجوئی ایمان ءِ چیدگ انت ۔
جارکش ءَ گوشتگ کہ سنگت فیاض جتک پنام ءِ شاہویز ء فضل جتک زہری جھمنند بوتگ ۔ آ ھمے سال ءِ جنوری ءَ بلوچستان لبریشن فرنٹ ءَ شتگ ۔ رھبندی ، ھاموشی ءُ مھکمی ءِ چیدگ بوتگ کہ آ جنگ ءِ تہ ءَ مدام زمہ دار ءُ دیمھونی دیگ ءَ چک ءُ پد نہ بوتگ ۔ آئی ءَ چریشی ءَ شری ءَ سرپد بوتگ کہ راجی آجوئی بید دیمھونی دیگ ءَ نہ بیت ۔ آئی وتی اے راستیں یکین گوں وتی ھوناں پدر کتگ ۔
براس ءِ جارکش بلوچ ھان ءَ گوشتگ کہ زھری ءِ اے میڑ بلوچستان ءَ برجاھیں گھگیری زرمبشت ءِ ھما درچ انت کہ زورگریں ریاست ءِ زوراکیاں ابید ھم نزور نہ تر اتگ بلکنہ ھر یک دیھونی ءَ پد گیشتر مھکم ءُ لیکھی پھتو بوتگ ۔ زھری ءَ نمیران بوتگیں سرانی رتکگیں ھون بلوچ آجوئی جھد ءِ یک دگہ بنھشت ئے کہ اے زرمبشت ءَ نوکیں دیم ، ھوسلہ ءُ گوستانکے دیگ ءَ انت ۔
جارکش ءَ گوشتگ کی بلوچ راجی آجوئی سنگر (براس )اے کول ءَ کنت کہ درسیں ھسنتیں گل بلوچ لبریشن آرمی، بلوچستان لبریشن فرنٹ، بلوچ ریپبلکن گارڈ اور سندھو دیش ریولوشنری آرمی ادارکی بگیرداریاں چہ برزتر ءُ راجی آجوئی ءِ یکیں بیرک ءِ چیر ءَ مھکم بیت ۔ براس ءِ یکجاھی ایوک ءَ پوجی ناں بلکیں سیاسی ءُ گلی تکاں ھم بلوچ راجی یکجاھی ءِ چیدگ انت کہ دژمن ءِ درسیں ھنر ءُ ھیلھاں ابید برجاہ انت ۔